Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Kiñi se ne si tisize kuli lizazi la December 25 li ketiwe ku ba lizazi la ku hupula ku pepwa kwa Jesu?

Linzwi la Mulimu ha li si ka bonisa kuli Jesu n’a pepilwe lili. Hatiso ya Enciclopedia Hispánica i bulela kuli: “Lizazi la December 25 ne li si ka tomiwa ku ba lizazi la Ngilisimusi ka libaka la kuli ki lona lizazi luli la n’a pepilwe Jesu kono ne li ka libaka la ku fetula mikiti ya maliha . . . kuli i be mikiti ya Sikreste.” Maroma ba ikale ne ba ezanga mukiti wa ku tabela ku pazula kwa lizazi mwa maliha ka ku ba ni mikiti ya malyalya, ya lilata, ni ya ku fanana limpo.—12/15, Makepe 4-5.

• Kana Likezo 7:59 i talusa kuli Setefani n’a lapela ku Jesu?

Batili. Bibele i bonisa kuli litapelo li swanela fela ku libiswa ku Jehova Mulimu. Kono ha n’a boni Jesu mwa pono, ku bonahala kuli Setefani n’a lukuluhile ku fitisa kupo ya hae ku yena, a li: “Mulena Jesu, amuhela moya wa ka.” Setefani n’a ziba kuli Jesu n’a filwe m’ata a ku zusa ba ba shwile. (Joani 5:27-29) Setefani kacwalo a kupa Jesu kuli a bukeleze m’ata a bupilo bwa hae ku fitela nako ya zuho.—1/1, likepe 31.

• Lu kona ku ziba cwañi kuli mafelelezo a mutu a si ka tomelwa cimo?

Mulimu u lu file tukuluho ya ku iketela, ili nto ye bonisa kuli lika ne li si ka tomelwa cimo. Neikaba kutokwa lilato ni ku luka kambe kuli Jehova n’a tomezi cimo bupilo bwa luna mi kihona a lu fa mulatu kabakala ze lu eza. (Deuteronoma 32:4; 1 Joani 4:8)—1/15, makepe 4-5.

• Ki kabakalañi ha ne ku si ke kwa luka ku bulela kuli limakazo ha li koni ku ezahala?

Ba sayansi ba bañwi ka ku lemuha kuli ba ziba fela kalulo ye nyinyani ya lika ze makaza za bupile Mulimu, ba itumelela kuli ha ba sa kona ku bulela ngambu ka za haiba nto ye ñwi ya konahala kamba kutokwa. Hañata ba kona fela ku akaleza kuli ku bonahala kuli mwendi nto ye ñwi ha i konahali.—2/15, makepe 5-6.

• Ki kabakalañi Samisoni h’a n’a bulelezi bashemi ba hae kuli n’a bata musizana wa Mafilisita kuli a be musal’a hae? (Baatuli 14:2)

Mulao wa Mulimu ne u hanisa ku nyala mulapeli wa buhata. (Exoda 34:11-16) Niteñi, Samisoni n’a “lata” musali wa Mufilisita yo luli. Samisoni n’a “bata sibaka sa ku lwanisa Mafilisita,” mi musali yo n’a ka mu tusa luli kuli mulelo wo u petahale. Mulimu n’a tusize Samisoni ka moya wa Hae. (Baatuli 13:25; 14:3, 4, 6)—3/15, likepe 26.

• Kana Mukreste wa Swanela ku yana mubeleki wa muuso, kamba ku mu fa mpo bakeñisa musebezi wa hae?

Ku fosahalile ku lifa likwambuyu kweta, ku mu fa mpo ye ñwi kuli a lobe mulao, a keluse katulo, kamba kuli a lu fe nto ye lu bata. Kono haki ku leka kweta haiba lu fa mubeleki mpo kamba ku mu yana h’a peta musebezi wa hae kamba kuli a lu shemube kamba kuli lu si ke lwa ketululwa.—4/1, likepe 29.