Ku Tusa Batu mwa Macedonia

“SILELA mwa Masedonia, u t’o lu tusa.” (Likezo 16:9) Manzwi ao a n’a bulezi munna ya n’a tile ku muapositola Paulusi mwa pono n’a bonisize kuli taba ye nde ya Mubuso wa Mulimu ne i tokwa ku shaelwa mwa libaka li sili, ili mwa litolopo ze se fumaneha mwa Greece cwale.

Mwa naha ya Macedonia ya mwa miteñi ye, mwahal’a sikwata ni sikwata sa batu b’a 1,840, ki a li muñwi fela ya li Paki ya Jehova. Batu ba bañata ba li ku ba ba utwe ka za Jehova Mulimu. Kaniti, batu ba mwa naha yeo ba tokwa hahulu ku utwa lushango lwa kozo.—Mateu 24:14.

Mulimu u kwaluzi nzila ya ku fitisa ka yona lushango l’o. Zazi le liñwi mwa November 2003, ofisi ya Lipaki za Jehova mwa Macedonia kwa Skopje ne i amuhezi luwaile lo ne lu si ka libelelwa. Ba ne ba lizize ki ba kopano ya Macedonian Center for International Cooperation, ba ba talima za ku tusa sicaba, mi ne ba kupa Lipaki kuli ba tome tende ya bona kwa sibaka ko ne ku ka ezezwa mukopano wa mazazi a malalu ku kala ka November 20 kuli ba yo talusa lituto za bona. Yeo ne li kolo ye nde hahulu ya ku fitisa taba ye nde ya Mubuso kwa likiti-kiti za batu!

Baitateli ne ba sebelize ka t’ata ku lukisa ni ku toma sibaka fa ku tanteka lihatiso ze fitana-fitana za Lipaki za Jehova mwa puo ya mwa Macedonia. Lihatiso ne li tantekilwe ilikuli bapoti ba ba li tabela ba kone ku ikungela kwateñi. Muezezo wo n’o file ba bañata kolo ya ku fumana mezi a katulusa a kwa moya ku si na tifo.—Sinulo 22:17.

Bapoti ne ba tabezi sihulu lihatiso ze ne bulela ka za bupilo bwa bona, ze cwale ka Questions Young People Ask—Answers That Work ni Sinotolo kwa Tabo ya Lubasi. * Ba 98 ne ba file likeyala za bona ni ku kupa kuli Lipaki za Jehova ba ba potele. Ba bañata ne ba lumbile Lipaki za Jehova bakeñisa musebezi wa bona o munde ni lihatiso za bona ze nde.

Munna yo muñwi n’a tile kwa tende ya Lipaki inz’a sweli mwan’a hae kwa lizoho. Ndate yo a buza ka za haiba ne ku na ni libuka za banana. Lipaki ba mu bonisa Buka Ya Ka ya Makande a Bibele. * A i apaula-apaula mi ka tabo a buza teko ya yona. Ha utwa kuli musebezi wa ku luta wa Lipaki za Jehova  u lifelwa fela ka linubu ze fiwa ka ku itatela, a taba hahulu mane ni ku fita. (Mateu 10:8) A bonisa mwan’a hae buka ye mi a li: “Ki buka ye nde luli ye! Ni ka ku balelanga mwateñi likande li li liñwi ka zazi!”

Caziba yo muñwi wa lituto za filosofi n’a tile kwa tende yeo. N’a bata hahulu ku ziba ka za bulapeli kaufela kono sihulu ka za lituto za Lipaki za Jehova. A apaula mwa buka ya Mankind’s Search for God, * mi a li: “Litaba ze li ñozwi ka bukwala luli! Kona mo ni tokwelanga litaba kuli li ñolwe cwana.” Hasamulaho baituti ba bañwi ba fa sikolo fa n’a zwa caziba y’o ba taha kwa tende ye swana ku t’o ikupela likopi za bona za buka ya n’a ngile muluti wa bona. Ne ba bata ku ituta buka yeo ni bona. Ne ba nahana kuli n’a ka itusisa yona mwa lituto za hae.

Tukiso yeo ya ku tanteka libuka ne i file ba bañwi kolo ya ku utwa lwa pili niti ya mwa Mañolo. Ne ku tile sikwata cwana sa bosusu ba banana. Yo muñwi wa Lipaki a fa ngambolo ye kuswani, ka tuso ya musizana yo muñwi ya n’a ba tolokezi mwa puo ya bona ya liswanisezo za ka mazoho. Ka ku itusisa maswaniso a mwa buka ya Mutu Yo Mutuna ka ku Fitisisa ya Kile a Pila fa Lifasi-Mubu, * a talusa kuli Jesu n’a folisize bakuli, hamohocwalo ni bosusu. Ne ba tabezi hahulu ku “utwa” sepiso ya Bibele ya kuli Jesu u ka tuha hape a folisa batu ba ba fa lifasi kacenu. Ba bañata ku bona ne ba amuhezi ka tabo lihatiso ze tomile fa Bibele, mi ne ku ezizwe litukiso za kuli Paki ya ziba puo ya liswanisezo za ka mazoho a ba potele.

Kwand’a lihatiso za puo ya mwa Macedonia, ne ku na ni hape lihatiso za puo ya kwa Albania, ya Sikuwa, ni ya kwa Turkey. Munna yo muñwi ya sa zibi puo ya mwa Macedonia a kupa lihatiso za Sikuwa. Ha s’a filwe limagazini za Watchtower ni Awake!, a talusa kuli yena u bulela puo ya kwa Turkey. Ha n’a bonisizwe lihatiso ze mwa puo ya habo, a ikomokela hahulu! A bona kuli Lipaki za Jehova ba bata ku tusa mañi ni mañi.

Ne ku filwe bupaki bo bunde luli lizazi leo, mi ne ku susueza luli ku bona batu ba bañata ba ba tabela niti ya mwa Bibele! Ki niti Jehova n’a kwaluzi nzila ye ñwi hape ya ku hasanya ka yona taba ye nde ya Mubuso mwa Macedonia.

[Litaluso za kwatasi]

[Mbokisi/Maswaniso a fa likepe 9]

KEZAHALO YE SA LIBALWI!

Ka la May 17, 2003 ne ku ngilwe muhato o mutuna wa ku ekeza kwa musebezi wa ku hasanya taba ye nde ya Mubuso wa Mulimu. Mwa Skopje ne ku kakuzwi ofisi ya Lipaki za Jehova. Musebezi wa ku yaha n’o kalile lilimo ze peli kwamulaho, ili ku ekeza kwa butuna bwa miyaho ye ne li teñi; ku i minahanya hane.

Ku yahilwe miyaho ye milalu mo ku na ni ofisi ya tamaiso ni liofisi za batoloki hamohocwalo ni mandu a ku lobala, liapehelo, ni litapisezo. Guy Pierce, wa mwa Sitopa Se Si Etelela sa Lipaki za Jehova, ki yena ya n’a file ngambolo ya kakulo. Bapoti ba ne ba zwelela kwa linaha ze 10 ne ba fumanehile kwa tukiso yeo ya kakulo. Kaufel’a bona ne ba nyakalalile hahulu ku bona miyaho ye minca ye minde.

[Mapa ye fa likepe 8, 9]

(Kuli mu bone mo i hatiselizwe luli, mu bone hatiso)

BULGARIA

MACEDONIA

Skopje

ALBANIA

GREECE

[Siswaniso se si fa likepe 8]

Skopje, Macedonia