Lipuzo Ze Zwa kwa Babali

Kana muapositola Paulusi n’a si ka shengoka tumelo ya hae ya Sikreste ha n’a bulelezi Kuta ye Tuna kuli: “Na, ni mufalisi”?

Kuli lu utwisise pulelo ya Paulusi ye fumaneha kwa Likezo 23:6, lu tokwa ku nyakisisa taba kaufela.

Hamulaho wa ku tasezwa ki ñumbili ya Majuda mwa Jerusalema, Paulusi a bulela kwa nyangela. N’a talusize kuli n’a ‘hulezi mwa Jerusalema, mwa mautu a Gamaliele; mi n’a lutilwe ka mukwa o petehile ka ku ya ka mulao wa bokuku a bona.’ Nihaike kuli nyangela ne i teelelize ka nakonyana ha n’a nze a ikalabela, kwa mafelelezo nyangela ha ne i halifile, mulauli wa masole a isa Paulusi mwa ndu ye tiile. Ha ne ba li ba mu nate, Paulusi a bulela kuli: “Kana ki tukelo kuli mu nate mutu wa Muroma, a si ka atulwa pili?”—Likezo 21:27–22:29.

Habusa, muzamaisi wa masole a isa Paulusi fapil’a Kuta ye Tuna ya Majuda. Paulusi a ba talimisisa mi a lemuha kuli ba Kuta ye Tuna ba bañwi ne li Basaduki mi ba bañwi ne li Bafalisi. Cwale kiha li: “Banabahesu, na, ni mufalisi, ni mwan’a mufalisi; ni atulwa kabakala sepo ni zuho ya bafu.” Kabakaleo, kwa taha fapano mwahal’a Bafalisi ni Basaduki, “kakuli basaduki ba bulela kuli ba ba shwile ha ba zuhi, ni kuli ha ku na lingeloi, nihaiba moya; kanti bafalisi ba lumela zeo kaufela.” Ba bañwi ba ne ba yemela Bafalisi ba hanisa katulo, ba li: “Ha lu boni bumaswe ku mutu yo.”—Likezo 23:6-10.

Bakeñisa kuli n’a zibahala ka ku ba Mukreste ya na ni cisehelo ye tuna, Paulusi n’a sa koni ku kolwisa Kuta ye Tuna kuli n’a li Mufalisi tota. Bafalisi ba ne ba li teñi ne ba si ke ba amuhela Mufalisi ufi kamba ufi ya n’a sa lumeli lituto za bona kaufela. Kacwalo, pulelo ya Paulusi ya ku bulela kuli n’a li Mufalisi ne i na ni maciñekelo, mi Bafalisi ba ne ba li teñi mwendi kona mo ne ba utwisiselize manzwi a Paulusi.

Ka ku bulela kuli n’a atulelwa sepo ya zuho ya bafu, kwa iponahaza hande kuli Paulusi n’a talusa kuli ku yona taba yeo n’a swana ni Bafalisi. Mwa kañi ifi kamba ifi ya yona taba ye, tumelo ya Paulusi ne i ka mu zibahaza sina yo muñwi wa Bafalisi isiñi wa Basaduki ba ne ba sa lumeli mwa zuho ya bafu.

Za n’a lumela Paulusi ka ku ba Mukreste ne li sa lwanisani ni tumelo ya Bafalisi mwa litaba ze cwale ka zuho ya bafu, mangeloi, ni tunango to tuñwi twa Mulao. (Mafilipi 3:5) Kacwalo ku zona litaba zeo fela, Paulusi n’a kona ku ibapanya kwa Bafalisi, mi ba ne ba li mwa Kuta ne ba utwisisize manzwi a hae ka yona nzila ye na ni maciñekelo yeo. Kacwalo n’a itusisa simuluho ya hae kuli a kone ku felisa sobozi ya kuta ye tuna ya Majuda.

Kono bupaki bo butuna ka ku fitisisa bo bu bonisa kuli Paulusi n’a si ka shengoka tumelo ya hae ki bwa kuli n’a zwezipili ku katelwa ki Jehova. Busihu bo bu tatama, Paulusi ha sa bulezi yona pulelo ye nyakisiswa ye, Jesu n’a ize: “U itiise Paulusi, kakuli sina ha u ni pakile mwa Jerusalema, u na ni ku y’o ni paka cwalo ni mwa Roma.” Bakeñisa kuli Paulusi n’a katelwa ki Mulimu, lu swanela ku fita fa kutwisiso ya kuli Paulusi n’a si ka shengoka tumelo ya hae ya Sikreste.—Likezo 23:11.