Ku Bonisa Bundume Niha Ku Na ni Twaniso

ÑUMBILI ya batu ba ba halifile ne i tundanisize bo Gayusi ni Arisitarko, balikani ba muapositola Paulusi, ku ba kenya mwa teatere ya Efese. Teñi m’o, ñumbili ya batu ye ne bifile ya huweleza ka lihora ze peli kuli: “Ki yo mutuna Diana wa Maefese!” (Likezo 19:28, 29, 34) Kana balikani ba Paulusi ne ba tiyezi twaniso yeo? Mi ki nto mañi ye ne shangumuzi muinelo wo?

Paulusi n’a kutalize hande mwa munzi wa Efese ibat’o ba ka lilimo ze talu. Kabakaleo buñata bwa Maefese ne ba tuhezi ku lapela milimu ya maswaniso. (Likezo 19:26; 20:31) Siswaniso se ne si itusiswa hahulu mwa Efese n’e li sa katempele ka silivera ka Diana, mulimu wa musali wa lupepo, ili yo tempele-tuna ya hae ne i li fa sibaka fo ku lumbile ku bapana ni munzi. Tuswaniso twa tempele t’o ne tu tiniwanga sina miulu kamba ku pahekiwa mwa mandu. Kono Bakreste bona ne ba sa lekangi maswaniso a cwalo.—1 Joani 5:21.

Demetriusi, yo muñwi wa bapangi ba lika za silivera, n’a nga kuli bukombwa bwa Paulusi ne bu ka wisa pisinisi ya bona ye n’e ba fumanisa mali. Ka ku kopamisa niti ni ku shangela litaba, a kolwisa bapangi ba bañwi kuli batu ba mwa Asia Minor kaufela ne ba ka tuhela ku lapela Diana. Bapangi ba lika za silivera ba ne ba tezi mabifi ha ne ba kalile ku lumbeka Diana, kwa ba ni mufilifili mi munzi kaufela wa tala mufilifili.—Likezo 19:24-29.

Batu ba bañata-ñata ba kopana mwa teatere, mo ne ku kona ku kwana batu ba 25,000. Paulusi a ikupela ku bulela kwa ñumbili yeo ya batu ba mundwela, kono manduna ba ba silikani ba mu kolwisa kuli a si ke a eza cwalo. Kwa nalulelule, muñoli wa Kuta a kona ku ombalisa sicaba, mi Gayusi ni Arisitarko ba ñweha ba si ka holofazwa.—Likezo 19:35-41.

Kacenu, batu ba Mulimu ni bona ba kana ba talimana ni balwanisi mane nihaiba mifilifili ha ba nze ba peta bukombwa bwa bona. Hañata ba kutazanga taba ye nde mwa minzi mo ku atile bulapeli bwa maswaniso, buitamaeli ni bufetuheli. Kono ka bundume ba likanyisa muapositola Paulusi, ili yo n’a si ka tuhela ‘ku luta fande mwa mapatelo ni mwa ndu ni ndu’ mwa muleneñi wa Efese. (Likezo 20:20) Mi ka nzila ye swana, ba nyakalalanga ha ba bona ‘linzwi la Mulena ha li hula ni ha li sebeza ka m’ata.’—Likezo 19:20.

[Siswaniso se si fa likepe 30]

Matota a teatere ya Efese