Ku Zuha Butata

OWEN, mushimani wa lilimo ze peli ni licika za ku pepwa, n’a bapalela mwa sitapelo se si mwa ndu ya habo. N’a konile ku pahama fahalimw’a kabati ye bulukelwanga milyani ye ne ba hupula bashemi ba hae kuli n’a si ke a kona ku yo fita kwateñi. Kwa lika ze n’e bulukilwe mwa kabati, Owen a bona botela ye ne hohile mamelelo ya hae. A i kwalula mi a nwa sitipwitipwi se ne si li mwateñi. Ne ku zuhile butata.

Mwa botela m’o ne ku inzi mulyani o baba o bulaya, mi ka bumai, Owen s’a timela. Bashemi ba hae ne ba tomohile hahulu pilu. Bondat’ahe bo Percy ne ba ile ku ba keleke kuli ba ba omba-ombe. Se ba buza kuli: “Ki kabalakañi butata b’o ha bu ezahalile?” Yo muhulu wa bulapeli a ba alaba kuli: “Mulimu n’a bata lingeloi le liñwi la mwanana kwa lihalimu.” Ka ku utwa hahulu butuku, mushemi ya shwezi y’o a ikutwa kuli ku eza cwalo ha ku si ka luka. Kana Mulimu ki yena ya n’a tahisize kuli ku zuhe butata b’o? Ka ku felelwa ki sepo, Percy a iketela ku sa swalisana ni keleke ya hae.

Ha n’a sweli ku nahana ze n’e ezahezi, Percy a ipuza kuli: ‘Kana mwan’a ka u sa utwa butuku? Kana ni ka mu bona hape?’

Mwendi ni mina mu se mu kengeyezi kale ze ezahalanga fa lifu ni ka za haiba ku ka konahala kuli lu yo bonana ni balatiwa ba luna ba ba shwile kwapili. Linzwi la Mulimu, yona Bibele, la kona ku alaba lipuzo zeo. Ku yona ku na ni likalabo ze utwahala ni ze omba-omba batu kaufela ba ba se ba ipumani mwa butata bo bu swana. Hape i patulula tibelelo ye makaza y’a sepisize Mulimu—tibelelo yeo ki zuho ya bafu.

Shangwe mu bale taba ye tatama kuli mu itute ze ñata ka za sepo ye omba-omba yeo.