Lipuzo Ze Zwa kwa Babali

Ki kabakalañi Paulusi ha n’a ñozi ka za musali wa Sikreste kuli: “U ka piliswa h’a pepa bana”?—1 Timotea 2:15.

Taba ye ambolwa i bonisañi ka za sa n’a talusa Paulusi mwa timana ye? Ka ku susumezwa ki moya o kenile, n’a fa kelezo ya za musebezi wa basali ba Sikreste mwa puteho. N’a ñozi kuli: “Ni lata kuli basali ba apale ka mukwa o swaneleha, ku kaba kwa bona ibe buikokobezo ni buiswalo; ba si ke ba kaba milili ya lunyeze, niheba gauda, kamba lipelela, kamba liapalo ze feza mali; kono mukabo wa bona ibe misebezi ye minde, ili ye lukela basali ba ba ipulezi kuli ba sebeleza Mulimu.” (1 Timotea 2:9, 10) Paulusi n’a eleza likaizeli za hae za Sikreste kuli ba be ba ba ishuwa kwa ku ikabisa, ba si ke ba tula tikanyo, ni kuli ba ‘ikabise’ ka misebezi ye minde.

Ku tuha f’o, Paulusi n’a talusize za tukiso ya butoho mwa puteho, ka ku bulela kuli: “Ha ni lumeli kuli musali a lute, kamba a pahamele munna; kono a ikuzeze.” (1 Timotea 2:12; 1 Makorinte 11:3) U bonisa libaka tukiso yeo ha i li cwalo ka ku talusa kuli Adama n’a si ka kwashekiwa ki Satani, kono Eva “a man’o pumiwa a tahisa foso.” Musali wa Sikreste u kona ku silelezwa cwañi kwa sibi sa Eva? Paulusi u alaba kuli: “Nihakubacwalo u ka piliswa h’a pepa bana, inz’a tundamezi mwa tumelo ni lilato, ni ku ikenisa ni ku iswala.” (1 Timotea 2:14, 15) Paulusi n’a talusañi ha n’a bulezi manzwi ao?

Batoloki ba bañwi ba bonisa inge kuli ku puluswa kwa musali ku itingile fa ku ba ni bana. Ka mutala, Bibele ye Kenile, hatiso ya 1984, i li: “Musali u ta piliswa ka ku ba ni bana.” Kono toloko yeo ya manzwi a Paulusi ha i si ka nepahala. Mañolo a mañata a bonisa kuli mutu kuli a piliswe u tokwa ku ziba Jehova, ku lumela ku Jesu, ni ku bonisa tumelo yeo ka misebezi. (Joani 17:3; Likezo 16:30, 31; Maroma 10:10; Jakobo 2:26) Fahalimw’a seo, Paulusi n’a sa talusi kuli basali ba balumeli ha ba na ku ba ni butata ha ba puluha. Basali ba konile ku puluha ku si na butata ibe kuli ki balumeli kamba kutokwa. Mi ka bumai, ba bañwi ba shwile ka nako ya ku puluha, ibe kuli ne li balumeli kamba kutokwa.—Genese 35:16-18.

Kelezo ya Paulusi kwa basali ya n’a ekelize mwa liñolo le hasamulaho i lu tusa ku utwisisa sa n’a talusa. U eleza limbelwa ba likalibe ba ne ba na ni “buzwa ha ba pota-pota mwa mandu; mi hasi ba buzwa fela, kono hape ki babuabui, ba ikenya mwa litaba za ba bañwi, ba bulela ze sa swaneli.” Ki ifi kelezo ya n’a fa Paulusi fo? U zwelapili ku bulela kuli: “Ka zeo lu lata kuli limbelwa za likalibe li nyalwe; ba pepe bana, ba lise mandu a bona, ba si ke ba fa muhanyezi sibaka sa ku nyaza.”—1 Timotea 5:13, 14.

Paulusi fo u bonisa lika ze yahisa ze ba kona ku eza basali mwa lubasi. Musali ya eza lika ze cwale ka ‘ku pepa bana ni ku lisa mandu,’ hape inze a zwelapili “mwa tumelo ni lilato, ni ku ikenisa ni ku iswala” h’a na ku yembululwa ki muzamao o sa yahisi. Tumelo ya hae i ka bukelezwa kamba ku “piliswa.” (1 Timotea 2:15) Ku eza cwalo ku ka tusa likalibe ba bañata ku pima tutwa twa Satani.

Manzwi a Paulusi ku Timotea a hupulisa luna kaufela, banna ni basali, kuli lu patehe ku eza lika ze yahisa. Linzwi la Mulimu li eleza Bakreste kaufela kuli: “Mu tokomele mo mu zamaela, mu si ke mwa ba sina likuba, kono mu be sina ba ba butali.”—Maefese 5:15.