Mwa ku Itusiseza Hande Lizazi ni Lizazi Le Lu Pila

“U LU lute ku bala mazazi a luna, kuli lu ise lipilu za luna ku ze talifisa.” (Samu 90:12) Kona mwa n’a lapelezi ka buikokobezo Mushe, yo muñwi wa bañoli ba Bibele. Ki nto mañi luli ya n’a kupa? Kana ni luna lwa swanela ku kupa nto ye swana ka tapelo?

Mwa timana 10, Mushe n’a lilokile za bukuswani bwa bupilo bwa mutu. Ka nako ye ñwi, n’a ñozi manzwi a Jobo, ya n’a bulezi kuli: “Mutu ya pepilwe ki musali, bupilo bwa hae ki bo bukuswani, mi bu tezi maziyezi.” (Jobo 14:1) Kwa bonahala kuli Mushe n’a ziba bukuswani bwa bupilo bwa batu ba ba si ka petahala mi n’a utwa butuku. Kacwalo, n’a nga lizazi kaufela la n’a pila ku ba mpo ya butokwa. Ka ku bulelela Mulimu kupo ye, Mushe n’a bonisa kuli n’a bata ku itusisa hande mazazi a hae a bupilo a n’a siyezi ka nzila ye ne ka tabisa Mubupi wa hae. Kana ni luna ha lu swaneli ku itusisa hande mazazi a bupilo bwa luna? Lu ka tabela ku eza cwalo haiba lwa lata kuli Mulimu a lu katelwe cwale.

Ne ku na ni nto ye ñwi hape ye ne susumelize Mushe ni Jobo, ili nto ye swanela ku lu susumeza ni luna. Sibeli sa bona banna bao ba ne ba saba Mulimu ne ba libelezi ku fiwa mupuzo kwapili, ili bupilo bwa fa lifasi-mubu mwa miinelo ye minde. (Jobo 14:14, 15; Maheberu 11:26) Ka nako yeo, misebezi ye minde ya mutu ha i na ku yemiswa ki lifu ni kamuta. Mubupi wa luna u bata kuli basepahali ba pile ku ya ku ile mwa paradaisi fa lifasi-mubu. (Isaya 65:21-24; Sinulo 21:3, 4) Yeo ya kona ku ba sepo ya mina haiba mu ‘bala mazazi a mina, kuli mu ise pilu ya mina ku ze talifisa.’