Kana Batu B’a Kona ku Felisa Bunjebwe?

BOLULE-LULE ba batu ba hulile cwalo ku si na ku ipumana mwa bunjebwe. Ha ba si ka lobala kale ni tala kamba ku andiwa ki silami ha ba lobezi. Kono buñata bwa batu bao ba utwelanga babotana butuku mi ba ezanga ka t’ata kuli ba ba tuse.

Kono batu ba ba ziyelizwe ki lindwa za mukowa, munda, linanga, ni matata a mañwi, ba sa unjamwi ki bunjebwe. Balimi ba ba itimela lico za bona beñi mwa Africa ha ba boni buloko bakeñisa mapacaca ao. Ba bañwi ba hapelelizwe ku yubeka mandu a bona ni ku tutela mwa litolopo ze tuna kamba ku balehela mwa naha i sili. Batu ba bañwi ba ba pila mwa mahae ba tutelanga mwa litolopo bakeñisa ku sepa kuli ba ka yo pila hande.

Hañata mwa litolopo mo ku tezi batu ku banga hahulu ni bunjebwe. Ha ku na hande mubu fa ku lima licalo. Hañata ku t’ata ku fumana musebezi. Bakeñisa ku ziyeleha, batu ba bañata ba fetuhanga libangoki. Batu ba ba yahile mwa litolopo ba kupanga lituso, kono mibuso ya butu ha i koni ku felisa bunjebwe bo bu sweli ku ekezeha. Ka za piho ya Kopano ya ba Macaba ye ne hatisizwe mwa November 2003, hatiso ya The Independent ya kwa London ne i ize: “Mwa lifasi ku na ni batu ba bañata ba ba sweli ku lapa.” Ne i zwezipili ku bulela kuli: “Mwa lifasi kamukana batu ba bat’o eza 842 milioni kacenu ha ba na hande lico—mi mane palo yeo i sweli ya ekezeha, silimo ni silimo ku ekezeha batu ba ba bañwi ba 5 milioni ba ba lapile.”

Fokuñwi ofisi ya mutai wa Lipaki za Jehova mwa South Africa i amuhelanga mañolo a zwelela kwa batu ba ba mwa bunjebwe. Ka mutala munna wa kwa Bloemfontein n’a ñozi kuli: “Ha ni sebezi, mi ni uzwanga lika za batu mwa tolopo ni sa fumana fela kolo. Ha ni sa ezi cwalo, kipeto lu ka lapa ka mazazi—lu sa buleli za silami. Ha ku na musebezi ni o mukana. Batu ba bañata ba sweli ba yambaela mwa makululu ku bata misebezi ni sa ku ca. Ku na ni batu be ni ziba ba ba batanga lico mwa bingungulu. Ba bañwi ba ipulayanga. Ba bañata ba ba cwale ka na ba zwafile ni ku felelwa ki sepo. Ku bonahala kuli ha ku na ze nde kwapili. Kana Mulimu ya lu bupile kuli lu cange ni ku apala, ha boni zeo kaufela?”

Likalabo ze alaba lipuzo za munna y’o za fumaneha, mi z’a omba-omba. Sina mo i ka boniseza taba ye tatama, likalabo zeo li fumaneha mwa Linzwi la Mulimu, yona Bibele.