Lifasi Mo Ku Si Na Bunjebwe Li Fakaufi

MASWANISO a bonisa Paradaisi, inge cwalo a bonisizwe fa likepe la pili la magazini ye, a’ tabisa kwa batu ba ba pila mwa bunjebwe. Bosinyalana ba pili, bo Adama ni Eva, ne ba pilile luli mwa paradaisi. Ndu ya bona ne li simu ya Edeni. (Genese 2:7-23) Nihaike kuli Paradaisi yeo ne i latehile, sepo ya kuli paradaisi i ka ba teñi kwa nako ya kwapili—mwa lifasi le linca mo ku si na bunjebwe—haki tolo fela. I tomile luli fa lisepiso ze fumaneha mwa Bibele.

Ha lu nyakisiseñi sepiso ya n’a file Jesu Kreste fa lizazi la hae la mafelelezo la bupilo bwa hae bwa fa lifasi. Yo muñwi wa lisinyi ze n’e shwile ni Jesu n’a bonisize tumelo mwa m’ata a Mulimu a ku kona ku tatulula matata a batu. N’a bulelezi Jesu kuli: “Mulena, u ni hupule ha u kena mwa mubuso wa hao.” Manzwi ao a bonisa kuli sisinyi seo ne si lumela kuli Jesu n’a ka busa sina Mulena ni kuli ba ba shwile ne ba ka zusiwa. Jesu n’a si alabile kuli: “Kaniti na ku bulelela kacenu, u ka ba ni na mwa Paradaisi.”—Luka 23:42, 43, NW.

Bibele i bulela cwana ka za ba ba ka pila mwa Paradaisi: “Ba ka yaha mandu, ba pile ku ona; ba cale likota za veine mi ba ce ze bewa ki zona.” (Isaya 65:21) Ki niti, “ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa; kakuli ki s’o bulezi mulomo wa [Muñ’a] Bupilo wa limpi.”—Mika 4:4.

Kono ki kabakalañi bunjebwe ha bu tuhelezwi cwale? Ki tuso mañi ya fa Mulimu kwa linjebwe? Bunjebwe bu ka fela lili?

Ki Kabakalañi Bunjebwe Ha Bu Tuhelezwi?

Paradaisi mo ne ba beilwe bo Adama ni Eva ne i latehile bakeñisa bukwenuheli bo ne bu tisizwe ki lingeloi le li maswe, Satani Diabulosi. Ka ku itusisa noha sina sibulelelo sa hae, Satani n’a kwashekile Eva ni ku mu lobisa mulao wa Mulimu wa ku sa ca muselo kwa kota ye n’e hanisizwe. N’a mu kwashekile ka ku mu kolwisa kuli ku itukulula ku Mulimu ne ku ka mu konisa ku ipilela hande. Eva ha n’a file Adama muselo o ne u hanisizwe wo, ni yena a ca, ili ku fulalela Mulimu bakeñisa ku bata ku tabisa musal’a hae.—Genese 3:1-6; 1 Timotea 2:14.

Bosinyalana ba bakwenuheli bao ne ba lunduzwi ka swanelo mwa Paradaisi mi ku zwa ona fo ne ba na ni ku sebeza ka t’ata kuli ba ipilise. Ku zwa ka nako yeo ku t’o fita cwale, Jehova u tuhelezi Satani ku busa batu ba ba li baezalibi, ili ku bonahaza ze zwa mwa ku sa utwa Mulimu. Litaba za bupilo bwa batu li bonisize kuli batu ha ba koni ku tisa Paradaisi fa lifasi. (Jeremia 10:23) Kono ku itukulula ku Mulimu ku tisize matata a matuna, a kopanyeleza cwalo ni bunjebwe.—Muekelesia 8:9.

 Nihakulicwalo, babotana ha ba si ka yumbiwa fela simulamu mwa lifasi le li mwa butata le. Linzwi la Mulimu le li ñozwi ka ketelelo ya moya, yona Bibele, li ba fa ketelelo ye nde.

“Mu Si Ke Mwa Bilaela”

Ha n’a bulela kwa nyangela ye ne kopanyeleza batu ba bañata ba ne ba li babotana, Jesu n’a ize: “Mu talime linyunywani za lihalimu; kakuli ha li cali, ha li kutuli, ha li buluki mwa matuli; kono Ndat’a mina ya kwa lihalimu wa li uta. Ha ni li, mina mu li fita hahulu? . . . Hakulicwalo mu si ke mwa bilaela, inze mu li: Lu ka cañi? kamba, Lu ka nwañi? kamba, Lu ka apalañi? Kakuli linto zeo kaufela li batwa ki bahedeni; kono Ndat’a mina ya kwa lihalimu u ziba kuli mwa li tokwa kamukana. Kono mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.”—Mateu 6:26-33.

Mutu ya shebile h’a tokwi ku uzwa. (Liproverbia 6:30, 31) U ka babalelwa haiba a beya Mulimu mwa sibaka sa pili mwa bupilo bwa hae. Ha mu nyakisise mutala wa munna ya bizwa Tukiso, ya pila mwa Lesotho, kwa mboela wa Africa. Ka 1998, masole ba mwa linaha li sili ne ba keni mwa Lesotho kuli ba ombalise mifilifili ya ba ne ba kwenuhezi mulonga wa naha. Bakeñisa ndwa yeo, lintolo ze ñata ne li bukuzwi, batu ne ba zwile misebezi, mi lico ne li taezi luli.

Tukiso n’a pila mwa kalulo ye ne shebile ka ku fitisisa mwa tolopo. Buñata bwa batu ba n’a yahile ni bona ne ba taselize lintolo kuli ba kone ku ipilisa. Tukiso ha n’a kutile kwa ndu ya hae ya muzuzu u li muñwi mwa n’a ina, a t’o fumana kuli Maseiso, musali ya n’a pila ni yena, n’a na ni lico ze ñata za n’a izo lobela. Tukiso a mu bulelela kuli: “U Zwiseze lika ze fande,” ni ku mu taluseza kuli mulao wa Mulimu wa hanisa ku uzwa. Maseiso a eza cwalo. Bomuyahwa ni bona ba ba sheununa ni ku ikungela lico zeo za ku uzwa.

Tukiso n’a ngile muhato wo bakeñisa lika za n’a itutile mwa tuto ya hae ya Bibele ni Lipaki za Jehova. Kana ku latelela kwa hae mulao wa Mulimu ne ku tisize kuli a lape? Batili. Nakonyana hasamulaho, maeluda ba mwa puteho ya Lipaki za Jehova ya n’a swalisana ni yona ba bata kwa n’a inzi Tukiso ni ku mu iseza za ku ca. Mane Lipaki za Jehova ba mwa naha ye li mabapa ya South Africa ne ba lumezi lituso ze fitelela litani ze peli kwa mizwale ni likaezeli za bona za Sikreste mwa Lesotho. Maseiso n’a susumelizwe ki moya wa Tukiso wa ku ipeya ku utwa Mulimu ni tuso ye lilato ya puteho. Ni yena a kalisa ku ituta Bibele. Hañihañi sibeli sa bona ba nyalana ka mulao mi ba fita fa ku kolobezwa sina Lipaki za Jehova. Ba zwezipili ku sebeleza Mulimu ka busepahali.

 Jehova Mulimu wa iyakatwa babotana. (Mu bone sikwenda se si li “Mulimu U Nga Cwañi Babotana?”) Ka lilato Mulimu u ezize litukiso za ku tusa batu ba ba cwale ka Tukiso ni Maseiso kuli ba itute ka za hae. Mi mwa Linzwi la hae, u file kelezo ye nde ye kona ku itusiswa mwa bupilo.

Tukiso Ye Nde

Lipaki za Jehova kamita ba likanga ku likanyisa Mulimu mwa iyakatelwa babotana. (Magalata 2:10) Hañata muta mwa sibaka ku ba ni kozi ye ama Bakreste ba niti, ku eziwanga litukiso za ku fa tuso ye tokwahala. Nto ya butokwa sihulu kikuli, Lipaki ba iyakatwanga butokwi bwa kwa moya bwa batu kaufela, ku kopanyeleza cwalo ni babotana. (Mateu 9:36-38) Mwahal’a lilimo ze 60 ze felile, likiti-kiti za likombwa ba ba lutilwe hande ba itatezi ku yo sebeza sina balumiwa mwa linaha li sili. Ka mutala, bosinyalana ba kwa Finland ba ne ba itutile puo ya Sesotho ki bona ba ne ba konile ku luta Tukiso ni Maseiso ku ba balutiwa ba Jesu. (Mateu 28:19, 20) Musebezi wa bulumiwa wo hañata u tokwanga ku itombola bupilo bo bunde mwa naha ye fumile ni ku ya mwa naha ye shebile.

Bakreste ba niti ha ba ngi busholi ku ba nzila ye ñwi ya ku ipilisa ka yona. Kono ba na ni tumelo ya kuli Jehova Mulimu u ka ba babalela. (Maheberu 13:5, 6) Nzila ye ñwi yeo Jehova a babalela ka yona batu ba hae ki ka ku itusisa kopano ya mwa lifasi kamukana ya balapeli ba hae ba ba babalelana.

Mi nzila ye ñwi yeo Jehova a babalela ka yona babotana ki ka ku ba fa kelezo ye nde ya  mwa ku ipiliseza ka zazi. Ka mutala, Bibele i laela kuli: “Ya n’a uzwa, a si ke a uzwa hape; kono a sebeze ka tata, a eze ze nde ka mazoho a hae, kuli a be ni s’a ka tusa ya tokwile.” (Maefese 4:28) Batu ba bañata ba ba si ka kena misebezi ba konile ku ipumanela misebezi ya ku ipelekela, ili ku eza misebezi ye t’ata, inge cwalo ku lima miloho. Bibele hape i tusa babotana ku babalela mali ka ku ba luta ku ambuka mikwa ye maswe, ye cwale ka ku nwa maswe bucwala.—Maefese 5:18.

Lifasi Mo ku Si Na Bunjebwe —Li Ka Ba Teñi Lili?

Bibele i bonisa kuli lu pila mwa “mazazi a maungulelo” a puso ya Satani. (2 Timotea 3:1) Ona cwale-cwale fa, Jehova Mulimu u ka luma Jesu Kreste kuli a t’o atula batu. Ku ka ezahalañi ka nako yeo? Jesu n’a alabile puzo yeo ku ye ñwi ya liswanisezo za hae. N’a ize: “Mwan’a mutu nako y’a ka taha mwa kanya hae, a na ni mangeloi a hae kaufela, u ka ina fa lubona lwa kanya ya hae. Ku ka kopana fapil’a hae macaba kaufela; mi u ka keta ba bañwi ku ba bañwi, sina mulisana h’a keta lingu mwa lipuli.”—Mateu 25:31-33.

Lingu ze bulezwi mwa swanisezo ye ki batu ba ba ipeya kwatas’a bulena bwa Jesu. Jesu n’a ba swaniselize kwa lingu bakeñisa kuli b’a mu latelela sina Mulisan’a bona. (Joani 10:16) Bona batu ba ba swana sina lingu bao ba ka fumana bupilo mwa puso ya Jesu ye petehile. B’o bu ka ba bupilo bo bu tabisa mwa lifasi le linca mo ku si na bunjebwe. Batu ba ba swana sina lipuli, ba ba hana puso ya Jesu, ba ka timezwa ku ya ku ile.—Mateu 25:46.

Mubuso wa Mulimu u ka felisa bumaswe. Kacwalo bunjebwe bu kabe bu felile. Kono mwa lifasi ku ka pila batu ba ba latana ni ku babalelana. Se si bonisa kuli l’a konahala ku ba teñi ki kopano ya Lipaki za Jehova ya mizwale ba ba latana mwa lifasi kamukana, kakuli Jesu n’a bulezi kuli: “Se ba ka ziba batu kaufela kuli mu balutiwa ba ka ka sona, ki ha mu latana.”—Joani 13:35.

[Mbokisi/Maswaniso a fa likepe 6, 7]

MULIMU U NGA CWAÑI BABOTANA?

Bibele i talusa Mubupi wa batu kuli ki yena “ya fa ya lapile buhobe.” (Samu 146:7) Bibele i na ni litimana ze fitelela ze mwanda ze bonisa Mulimu mwa iyakatelwa babotana.

Ka mutala, muta Jehova n’a file Maisilaele ba ikale Mulao wa hae, n’a laezi linjimi za Maisilaele ku sa kutulelela masimu a bona. Ne ba sa swaneli ku kutela mwa simu ku yo yangelela litolwana ze ne siyezi kwa likota za olive kamba likota za veine. Milao yeo ne li tukiso ye lilato ye ne tusa bazwahule, likuzana, limbelwa, ni batu ba bañwi ba ne ba nyandile.—Livitike 19:9, 10; Deuteronoma 24:19-21.

Hape Mulimu n’a laezi Maisilaele kuli: “Mu si ke mwa swenya mbelwa kamba ndiala. Ha u ka ba swenya mi ba huweleza ku Na, ni ka utwa mihuwelezo ya bona; buhali bwa ka bu ka tuka, mi ni ka mi bulaya ka lilumo; basali ba mina ni bona ba be limbelwa, ni bana ba mina ba be lindiala.” (Exoda 22:22-24) Ka bumai, buñata bwa limbombo za Maisilaele ne ba keshebisize manzwi ao. Bakeñisa ku tula mulao wo ni bufosi bo buñwi bo ne ba ezize, Jehova Mulimu a lemusa Maisilaele ka ku itusisa bapolofita ba hae. (Isaya 10:1, 2; Jeremia 5:28; Amosi 4:1-3) Kwa mafelelezo, Mulimu a tahisa kuli Maasirya mi hamulaho ni Mababilona ba hape naha ya Maisilaele. Maisilaele ba bañata ne ba bulailwe, mi ba ne ba punyuhile ne ba hapilwe ni ku isiwa mwa linaha li sili.

Mwan’a Mulimu ya lateha, Jesu Kreste, n’a bonisize moya wa Ndat’ahe wa ku iyakatwa babotana. Ha n’a talusa mulelo wa bukombwa bwa hae, Jesu n’a ize: “Moya wa Mulena u fahalimw’a ka, kakuli u ni tozize, kuli ni bulelele babotana Evangeli.” (Luka 4:18) Seo ha si talusi kuli Jesu n’a kutalize fela kwa babotana. N’a tusize ni batu ba ba fumile ka lilato la hae. Kono niha n’a tusa bafumi, Jesu hañata n’a bonisize kuli n’a iyakatwa babotana. Ka mutala n’a file kelezo ye ku mubusi yo muñwi ya n’a fumile: “U lekise z’o luwile kaufela mi u li fane kwa babotana, mi u ka ba ni bufumu kwa lihalimu. Ku zwa fo, taha, u ni latelele.”—Luka 14:1, 12-14; 18:18, 22; 19:1-10.

Jehova Mulimu ni Mwan’a hae ba iyakatwa hahulu babotana. (Mareka 12:41-44; Jakobo 2:1-6) Ka ku bonisa mw’a iyakatelwa babotana, Jehova u beile mwa muhupulo wa hae mabizo a bafu ba ba shebile ba ba eza bolule-lule. Batu bao kaufela ba ka zusezwa mwa lifasi le linca mo ku si na bunjebwe.—Likezo 24:15.

[Maswaniso]

Kopano ya Lipaki za Jehova ya mizwale ba ba latana mwa lifasi kamukana i bonisa kuli lifasi le linca la konahala ku ba teñi

[Siswaniso se si fa likepe 5]

Tukiso ni Maseiso ni mulumiwa ya n’a itutile Bibele ni Tukiso

[Siswaniso se si fa likepe 5]

Maseiso fa munyako wa ndu ya hae ni mulumiwa ya n’a itutile Bibele ni yena