Lipuzo Ze Zwa kwa Babali

Ki kabakalañi Davida ni Bati-sheba ha ne ba si ka bulaiwa hamulaho wa ku buka, hailifo mwan’a bona ya n’a sa zo pepwa yena n’a shwile?

Mulao wa Mushe ne u bonisize fo kusweu kuli: “Ha ku ka fumanwa munna ya fosa ni musali ya nyezwi ki yo muñwi, ba shwe ba babeli, munna ni musali ba ba bukani hamoho; mu zwise bumaswe bo bu cwalo mwa Isilaele.” (Deuteronoma 22:22) Kambe Jehova Mulimu n’a tuhelezi taba ya sibi sa Davida ni Bati-sheba ku atulwa ka Mulao ki baatuli ba butu, batu ba babeli ba ne ba bukile bao ne ba kabe ba bulailwe. Bakeñisa kuli baatuli ba butu ne ba sa koni ku bona ze mwa lipilu, ne ba kabe ba atuzi ka ku ya ka bumaswe bo ne ba iponezi bwa lifosi zeo. Katulo ya sibi sa bubuki ne li lifu. Baatuli ba Maisilaele ne ba si ka fiwa m’ata a ku swalela sibi seo.

Kono Mulimu wa niti yena wa kona ku bona ze mwa lipilu ni ku swalela libi haiba ku na ni libaka la ku eza cwalo. Bakeñisa kuli taba yeo ne i amile Davida ya n’a itamile bulikani bwa Mubuso ni yena, Jehova n’a ikatulezi ku i talima. (2 Samuele 7:12-16) “Muatuli wa lifasi kaufela” u na ni tukelo ya ku eza cwalo.—Genese 18:25.

Jehova n’a boniñi ha n’a tatubile pilu ya Davida? Toho ya taba ya Samu 51 i bonisa kuli samu ye i patulula maikuto a Davida muta ‘mupolofita Natani n’a tile ku yena, ha n’a sa keni ku Bati-Sheba.’ Samu 51:1-4 i bulela kuli: “U ni utwele butuku Mulimu ka sishemo sa hao, ka makeke a matuna a hao, u takule lifoso za ka. U ni tapise bumaswe bwa ka kaufela, mi u ni kenise kwa sibi sa ka. Kakuli ni itumelela lifoso za ka, mi sibi sa ka si fapil’a ka, ka nako ni nako. Ki Wena, Wena u li nosi ye ni foselize, se ni ezize ki se si maswe mwa meto a hao.” Jehova n’a ngile buinyazo bwa Davida sina bupaki bwa kuli n’a bakile luli, mi kona ha n’a boni kuli ne ku na ni libaka la ku swalela lifosi zeo. Mi mane Davida n’a na ni sishemo, mi Jehova u shemuba ba ba na ni sishemo. (1 Samuele 24:4-7; Mateu 5:7; Jakobo 2:13) Kona libaka muta Davida n’a itumelezi sibi sa hae, Natani n’a mu bulelezi kuli: “Ni Yena [Muñ’a] Bupilo s’a felisize sibi sa hao, ha u na ku shwa.”—2 Samuele 12:13.

Davida ni Bati-Sheba ne ba si ke ba banda ze maswe kaufela ze n’e ka tiswa ki sibi sa bona. Natani n’a taluselize Davida kuli: “Kono kakuli u file lila za [Muñ’a] Bupilo libaka la ku mu nyefula, mwana ya pepezwi wena u ka shwa luli.” Mwan’a bona n’a kulile hahulu mane s’a shwa ku si na taba kuli Davida n’a itimile lico ni ku lila ka mazazi a 7.—2 Samuele 12:14-18.

Ba bañwi ha ba utwisisi libaka mwana ha n’a shwile, kakuli Deuteronomy 24:16 i bulela kuli: “Bana ba si ke ba bulawa mwa sibaka sa bondat’a bona.” Kono lu swanela ku hupula kuli kambe taba yeo ne i atuzwi ki baatuli ba butu, bashemi ni mwan’a bona ya n’a si ka pepiwa kale ne ba kabe ba bulailwe. Mwendi lifu la mwana ne li tusize Davida ku utwisisa kuli Jehova n’a si ka tabela sibi sa n’a ezize ni Bati-sheba. Lu kolwa kuli Jehova n’a atuzi taba yeo hande, kakuli “nzila ya Mulimu i lukile.”—2 Samuele 22:31.

[Siswaniso se si fa likepe 31]

Davida n’a bakile luli