‘Tuso ya Ka I Zwa ku Jehova’

Mabasi A Tiiswa ki Zibo ya ku Ziba Mulimu

BO SINYALANA ba bañwi mwa Argentina ne ba yahile limota mwa ndu ya bona kuli ba i alule mwa likalulo ze peli, mi se ba biza limota leo kuli ki “Berlin Wall.” Ne ba fapahani hahulu; ne ba sa koni ku pila hamoho.

Ki bumai kuli bosinyalana bao hasi bona fela ba ba talimana ni muinelo o cwalo. Mabasi a mañata a ziyelizwe ki lifapahano, ku sa sepahala, ni sitoyo luli. Taba yeo y’a swabisa bakeñisa kuli lubasi ki tukiso ye tomilwe ki Mulimu tota. (Genese 1:27, 28; 2:23, 24) Mpo yeo ye zwa ku Mulimu, lona lubasi, ki sibaka se si swanela luli ili mo ba kona ku bonisana batu lilato. (Ruti 1:9) Ba ba mwa lubasi ha ba peta buikalabelo bwa bona bo ba filwe ki Mulimu, b’a kona ku lumbeka Jehova ni ku tabisana yo muñwi ku yo muñwi. *

Bakeñisa kuli Mulimu ki yena ya n’a tomile tukiso ya lubasi, lu na ni ku tuhelela mubonelo wa hae kuli u etelele kutwisiso ya luna ya za mo lu swanela ku bela lubasi. Linzwi la hae li fa likelezo ze nde ze lukiselizwe ku tusa mabasi kuli a kondise, sihulu ha ku zuha matata. Bibele i bulela cwana ka za ze ba swanela ku eza banna: “Banna ba swanezi ku lata basali ba bona sina mubili wa bona.” Munna ha eza cwalo, musali ku mu bela bunolo kuli “a kuteke munn’a hae.”—Maefese 5:25-29, 33.

Ka za bashemi ni bana ba bona, muapositola Paulusi n’a ñozi kuli: “Mina bondate, mu si ke mwa halifisa bana ba mina; kono mu ba hulise ka ku ba lemusa, ni ka tuto ya Mulena.” (Maefese 6:4) Ku eza cwalo ku ka tisa moya o munde mwa lubasi, o nolofaleza bana kuli ba utwe bashemi ba bona.—Maefese 6:1.

Lisupo ze sa zwo bulelwa li bonisa kelezo ya Bibele ye nde ya za bupilo bwa lubasi. Ba bañata ba ikola tabo mwa mandu a bona kabakala ku latelela likuka za Mulimu. Lu ngeñi ka mutala bosinyalana ba kwa Argentina ba ba bulezwi kwa makalelo a taba ye. Ha se ba itutile Bibele ni Lipaki za Jehova ka likweli ze talu, kaufel’a bona ba kalisa ku sebelisa kelezo ye butali ya Bibele mwa linyalo la bona. Ba lika ka t’ata ku kondisa muambolelo wa bona, ni ku utwelana butuku, ni ku swalelana. (Liproverbia 15:22; 1 Pitrosi 3:7; 4:8) Ne ba itutile ku iswala ha ba bata ku halifa ni ku kupa tuso ku Jehova lika ha ne li bonahala ku ba tatafalela. (Makolose 3:19) Kapili-pili limota la “Berlin Wall” la wela fafasi!

Mulimu W’a Kona ku Tiisa Lubasi

Ku ba ni zibo ni ku sebelisa likuka za Mulimu kw’a kona ku tiisa lubasi kuli lu tiyele matata. Ku eza cwalo ki kwa butokwa, kakuli ne ku polofitilwe kale kuli mwa miteñi ya luna lubasi ne lu ka kena mwa nyewanyewa. Paulusi n’a bulezi kale za ku sinyeha kwa muzamao ni ku shandauka kwa nyangela. N’a ize “mazazi a maungulelo” n’a ka zibahala ka kutokwa busepahali, kutokwa “lilato la taho,” ni ku sa utwa bashemi, mane nihaiba mwahal’a batu “ba ba eza mukwa wa bulumeli.”—2 Timotea 3:1-5.

Ku lika ku tabisa Mulimu kw’a kona ku lu tusa  ku lwanisa moya o maswe cwalo mwa lubasi. Mabasi a mañata a lemuhile kuli a tokwa tuso ya Mulimu kuli a tatulule buñata bwa matata a ona. Haiba ba mwa lubasi ba bata ku ba ni silikani se sinde ni Mulimu, se ba tokwa hahulu ku fita nto ifi kamba ifi ki ku sebelisa likuka za Bibele ni ku lemuha kuli “kabesi [Muñ’a] Bupilo ku yaha ndu, ba ba i yaha kabe ba sebeza mbango.” (Samu 127:1) Tabo mwa lubasi i fumanwa ka ku beya Mulimu mwa sibaka sa pili mwa bupilo bwa lubasi.—Maefese 3:14, 15.

Mwa Hawaii munna ya bizwa Dennis n’a lemuhile buniti bwa taba yeo. Nihaike n’a ipala ku ba Mukreste, n’a kenwi ki moya wa matapa ni lindwa. Hamulaho wa ku beleka mwa busole, bulwani bwa hae ni sitoyo za ekezeha. U bulela kuli: “Ne ni lwanisana ni ba bañwi nako kaufela. Ne ni si na taba ni ze n’e ka ezahala ku na, mi ne ni sa sabi ku shwa. Na zwelapili ni matapa ni lindwa za ka. Musal’a ka, ya n’a li yo muñwi wa Lipaki za Jehova, a ni susueza kuli ni itute Bibele.”

Dennis n’a hanile ku utwa musal’a hae. Kono muzamao wa Sikreste wa musal’a hae wa nolofaza pilu ya hae ye t’ata. Hañihañi Dennis a ya ni musal’a hae ni bana ba bona kwa mukopano wa Sikreste. Hamulaho wa f’o Dennis a kalisa ku ituta Bibele, mi a eza zwelopili ye tuna. Nihaike n’a felize lilimo ze 28 inz’a li muzubi wa kwai a lisela ku zuba mi a tuhela ku eza siango ni balikani ba hae ba ne ba eza lika kaufela za n’a bata ku tokolomoha. Ka ku bonisa buitumelo bwa hae ku Jehova, Dennis n’a ize: “Bupilo bwa ka mwa lubasi bwa cinca ku ba hande. Ne lu yanga kwa mikopano ni mwa simu sina lubasi. Bana ba ka ba babeli ne ba tuhezi ku ni saba, bakeñisa kuli ne se ni itutile ku iswala ha ni bata ku halifa mi ne ni tuhezi matapa. Ne lu canga makande mi ne lu ikola ku buhisana za Bibele. Kambesi niti ya Bibele, kambe kacenu le ha ni yo fa; ne ni nyema-nyema fela.”

Mabasi a’ kona ku ba mwa tabo haiba a ikataza ku eza tato ya Jehova. Ze ezahezi li bonisa kuli mwa lubasi ha ku ba fela nihaiba mutu a li muñwi ya latelela likuka za Bibele, lika li ba hande ku fita ha ku si na nihaiba a li muñwi. Ku yaha lubasi lwa Sikreste ki musebezi o mutuna, o tokwa bukwala ni nako. Kono batu ba mwa mabasi ao ba na ni buikolwiso bwa kuli Jehova u ka fuyaula buikatazo bwa bona bwa ku yaha kuli ba kondise. B’a kona ku bulela sina walisamu kuli: ‘Tuso ya ka i zwa ku Jehova.’—Samu121:2.

[Litaluso za kwatasi]

[Manzwi a fa likepe 9]

Ka Mulimu “ku shikulwa lusika ni lusika lo lu li teñi mwa lihalimu ni mwa lifasi.”—MAEFESE 3:15

[Mbokisi fa likepe 8]

JEHOVA U TABELA HAHULU TUKISO YA LUBASI

“Mulimu a ba fuyaula, mi Mulimu a ba bulelela, a li: Mu tahise lusika, mu ate, mu tale mwa lifasi.”—Genese 1:28.

“Mbuyoti i fiwa mutu ya saba [Muñ’a] Bupilo . . . Mufumahali wa hao, mwa ndu ya hao, u ka ba inge kota ya veine ye beya hahulu.”—Samu 128:1, 3.