Kana mwa Ambolisananga ni Balatiwa ba Mina?

PAMPILI ya Sipolishi ye hatiswanga ka sunda ni sunda ye bizwa Polityka i biha kuli: “Buikoneli bwa luna bwa ku ambolisana ni balatiwa ba luna bu sweli bwa fokola ka bubebe.” Mwa United States, ku kulubelwa kuli bosinyalana ba ambolisananga fela hande ni bosinyalana ni bona ka mizuzu ye silezi ka zazi. Bocaziba ba bañwi ba nahana kuli licika la manyalo kaufela a ba ba kauhani ni ba ba lelekani li tiswa ki ku sa ambolisana hande k’o.

Ku cwañi ka za ku ambolisana mwahal’a bashemi ni bana? Pampili ye bulezwi yeo i li, hañata “lingambolo za bashemi ni bana ba bona, ha li bangi za ku ambolisana luli, kono li banga fela za ku tosangisa: Lituto li zamaile cwañi? Balikani ba hao bona ba cwañi?” Pampili yeo i buza kuli: “Haiba kona mo lu ambolelanga cwalo, bana ba luna ba ka ituta cwañi moya wa ku ba ni liango ni ba bañwi?”

Bakeñisa kuli bukwala bwa ku ziba mwa ku ambolisanela hande ha bu itahelangi fela, lu kona ku hulisa cwañi buikoneli bwa luna bwa ku ambolisana? Mulutiwa wa Sikreste Jakobo n’a lu file kelezo ya butokwa: “Mutu kaufela ibe ya teeleza kapili, ya liyeha kwa ku bulela, ya liyeha ni kwa ku halifa.” (Jakobo 1:19) Ki niti, kuli lu be ni lingambolo ze yahisa, lu tokwa ku teeleza ka tokomelo ni ku sa kauleza puhisano bakeñisa kutokwa pilu-telele kamba ku matukela ku fa katulo. Mu ambuke ku nyaza-nyaza ba bañwi bakeñisa kuli ku kona ku kauleza puhisano ka bunolo. Hape, Jesu n’a itusisize lipuzo ka maseme, isiñi ka ku tosangisa, kono na itusisize zona kuli a shitule ze n’e li mwa lipilu za bateelezi ba hae ni ku tiisa tamo ye n’e li mwahal’a bona.—Liproverbia 20:5; Mateu 16:13-17; 17:24-27.

Likuka ze nde ze fumaneha mwa Bibele li mi luta ku ikupulisa ku ikambota ni balatiwa ba mina. Mi ku eza cwalo ku kona ku tahisa silikani se sinde se mu ka ikola ka lilimo ze ñata—mane nihaiba mwahal’a bupilo bwa mina kaufela.