Ku Piliswa, Isiñi ka Misebezi I Nosi, Kono ka Sishemo
Ku Piliswa, Isiñi ka Misebezi I Nosi, Kono ka Sishemo
“Mu pilisizwe . . . ka tumelo. Hasi ka misebezi, kuli ku tokwe ni ya ka itumba.”—MAEFESE 2:8, 9.
1. Ka za lika ze ba petile ka butu, Bakreste ba fapahana cwañi ni batu kaufela, mi libaka ki lifi?
BATU kacenu ba itumba kabakala lika ze ba petile, mi hañata ba matukelanga ku itundumunela zona. Kono Bakreste ha ba cwalo. Ba ambuka ku tumisa hahulu ze ba petile, mane nihaiba zona ze ba petile mwa bulapeli bwa niti. Niha ba nyakalala bakeñisa ze ba petile batu ba Jehova ka sikwata, ha ba tumisi kalulo ye ba petile bona ka butu. Ba lemuha kuli za butokwa mwa sebelezo ya Jehova ki milelo ye minde isiñi z’a peta mutu ka butu. Mutu kaufela ya ka fiwa mpo ya bupilo bwa kamita kwa mafelelezo, u ka i fiwa isiñi kabakala za petile ka butu kono kabakala tumelo ya hae ni kabakala sishemo sa Mulimu.—Luka 17:10; Joani 3:16.
2, 3. Ki nto mañi ya n’a itumbezi Paulusi, mi ne li kabakalañi?
2 Muapositola Paulusi n’a izibela hande yona taba ye. Hamulaho wa ku lapela halalu kuli a t’olwe “muutwa mwa mubili,” a amuhela kalabo ya Jehova, ye li: “Sishemo sa ka sa ku likana; kakuli mata a ka a petahala mwa mifokolo.” Ka ku amuhela katulo ya Jehova ka buikokobezo, Paulusi n’a ize: “Hakulicwalo, ka tabo luli, ni lata ku itumba ka mifokolo ya ka, kuli ni apeswe mata a Kreste.” Buikokobezo bwa Paulusi ki bona bo lu swanela ku likanyisa.—2 Makorinte 12:7-9.
3 Nihaike kuli Paulusi n’a petile ze ñata hahulu mwa misebezi ya Sikreste, n’a lemuhile kuli za n’a petile n’a si ka li peta kabakala buikoneli bwa hae. N’a bulezi ka buishuwo kuli: “Sishemo seo si filwe na, ni li yo munyinyani kwa balumeli kamukana; ki sa ku bulelela bamacaba bufumu bwa Kreste, bo bu sa konwi ku fumanwa butuna bwa bona.” (Maefese 3:8) Manzwi a Paulusi a bonisa hande kuli n’a si na moya wa ku ikuhumusa kamba wa ku itundumuna. “Mulimu u hanela ba ba ikuhumusa, mi u shemuba ba ba ishuwa.” (Jakobo 4:6; 1 Pitrosi 5:5) Kana lwa likanyisa mutala wa Paulusi, ku ikunga ka buikokobezo kuli lu ba banyinyani ku fita mizwale ba luna?
‘Mu Hupule Kuli Ba Bañwi Ba Mi Fita’
4. Ki kabakalañi fokuñwi ha ku kana kwa lu bela t’ata ku nga ba bañwi kuli ba lu fita?
4 Muapositola Paulusi n’a elelize Bakreste kuli: “Mu si ke mwa eza se siñwi ka kañi, kamba ka buipabazo kwa fela; kono ka buikokobezo mutu ni mutu a hupule kuli ba bañwi ba mu fita.” (Mafilipi 2:3) Ku eza cwalo ku kona ku ba t’ata, sihulu haiba lu na ni buikalabelo. Mwendi lu fumana butata bakeñisa kuli lu kukuelizwe ka nzila ye ñwi ki moya wa kangisano o yambile lifasi kacenu. Mwendi ha ne lu li banana ne lu lutilwe ku kangisana, ibe ni banyani kamba bahulwani ba luna kwa ndu kamba ni bana ba sikolo ba bañwi ba mwa sitopa sa luna. Mwendi ka nako kaufela ne lu susuezwanga ku lika ka t’ata kuli lu be ba pili mwa lipapali za fa sikolo kamba kuli lu be muituti ya zwile mubano. Ki niti kuli ku ikataza ku eza hande mwa sika sifi kamba sifi se lu eza ki nto ye nde. Kono Bakreste ba sebezanga ka t’ata isi ka libaka la ku bata ku iponahalisa fela, kono ka mulelo wa kuli musebezi o ba eza u ba tuse hahulu mi mwendi ni ku tusa kwateñi ba bañwi. Kono ku tundamena kuli kamita lu bubane kuli ki luna ba pili kwa kona ku lu kenya mwa kozi. Ka mukwa ufi?
5. Haiba u sa tokomelwi, moya wa kangisano u kona ku libisa kwa nto mañi?
5 Moya wa kangisano kamba wa ku bata ku ba wa pili ha u sa tokomelwi wa kona ku tahiseza mutu ku ba ni lishwau ni ku ikutwisisa. Mutu mane wa kona ku utwela ba bañwi muna bakeñisa buikoneli ni matohonolo a bona. Liproverbia 28:22 i li: “Mutu ya pilu-seta [kamba muna] u matela bufumu, kanti h’a zibi kuli bubotana bu ka mu kenela.” Mane ka buikanyiso a kana a ipeya fa mayemo a si ka fiwa. Mi ka ku bata ku yemela likezo za hae, u kana a kalisa ku tongoka ni ku nyaza-nyaza ba bañwi—ili mikwa ye ba swanela ku ambuka Bakreste. (Jakobo 3:14-16) Ku be cwañi kamba cwañi, mutu ya cwalo a tuha a kala ku hulisa moya wa buitati.
6. Bibele i lemusa cwañi ka za moya wa kangisano?
6 Ki ka lona libaka leo Bibele ha i eleza Bakreste kuli: “Lu si ke lwa bata ku bubekwa ko ku si na tuso, ka ku ishemaeta ni ku shwelana muna.” (Magalata 5:26) Muapositola Joani n’a bulezi ka za Mukreste ka yena ya n’a hulisize moya o swana wo. N’a ize: “Ni ñolezi Keleke; kono Diotrefi ya lata ku ipeya kwapili h’a lu amuheli. Cwale, ha ni taha, ni ka mi hupulisa misebezi ya hae, y’a eza h’a lu sebanga ka manzwi a’ na ni lunya.” Wo ki muinelo o maswe luli haiba Mukreste a wela ku ona.—3 Joani 9, 10.
7. Ki nto mañi ya ka bata ku ambuka Mukreste ka za moya wa kangisano o kwa libaka za misebezi kacenu?
7 Kono hasi niti ku nahana kuli Mukreste wa kona ku ambuka ka ku tala lika kaufela ze ama kangisano. Ka mutala, kwa musebezi Mukreste a kana a ba mwa kangisano ya litekisano ni batu kamba ba lipisinisi ze ñwi ze panga lika kamba ze eza misebezi ye swana ni ya hae. Kono nihaiba mwa miinelo ye cwalo, Mukreste u ka bata ku eza pisinisi ya hae ka likute, lilato ni ka ku hupula ba bañwi. U ka hana ku itusisa mikwa ye loba mulao ni ye si ya Sikreste mi u ka pima ku ba mutu ya zibahala hahulu ka bulyangelino. H’a na ku ikutwa kuli ku ba wa pili—mwa nto ifi kamba ifi—ki yona nto ya butokwa hahulu mwa bupilo. Haiba ku bonisa moya o cwalo ki kwa butokwa mwa misebezi ya silifasi, u zibe he ki kwa butokwa hahulu ku bonisa o moya cwalo ha ku taha ku za bulapeli!
“Isi Ka Za Yo Muñwi”
8, 9. (a) Ki kabakalañi maeluda ha ba sa swaneli ku kangisana mwahal’a bona? (b) Ki kabakalañi 1 Pitrosi 4:10 ha i ama batanga ba Mulimu kaufela?
8 Moya o ba swanela ku ba ni ona Bakreste mwa bulapeli bwa bona u bonisizwe hande mwa manzwi a ñozwi ka moya wa Mulimu, a’ li: “Mutu ni mutu a tatube likezo za hae, kih’a ka ba ni sibaka sa ku itumba ka za hae a nosi, isi ka za yo muñwi.” (Magalata 6:4) Maeluda mwa puteho, ka ku lemuha kuli ha ba kangisani mwahal’a bona, ba swalisana hande ni ku sebelisana hamoho sina sitopa. Ba tabela kalulo ya peta mañi ni mañi wa ku bona ilikuli puteho ibe mwa buiketo. Kacwalo ba ambuka moya o filikanya wa kangisano mi ba tomela puteho kaufela mutala o munde wa swalisano.
9 Kabakala buhulu, butelele bwa nako ye ba sebelize, kamba buikoneli bwa ka sipepo, maeluda ba bañwi ba kana ba kondisa hahulu kamba ba kana ba ba ni kutwisiso ye tungile hahulu ku fita ba bañwi. Bakeñisa libaka leo, maeluda ba na ni buikalabelo bo bu fapahana-fapahana mwa kopano ya Jehova. Ku fita ku ibapanya ku ba bañwi, ba hupula kelezo ye li: “Mutu ni mutu, mw’a fezwi mpo ki Mulena, a sebeleze ba bañwi ka yona, sina ha ku lukela likombwa ze nde za sishemo sa Mulimu se si taha ka mikwa ye miñata.” (1 Pitrosi 4:10) Mane yona timana ye i ama batanga ba Jehova kaufela, kakuli kaufel’a bona ka nzila ye ñwi ba amuhezi mpo ya zibo ye nepahezi mi kaufela bona ba ikola tohonolo ya ku abana mwa bukombwa bwa Sikreste.
10. Sebelezo ya luna ye kenile i kona fela ku amuhelwa ki Jehova ka nzila ifi?
10 Sebelezo ya luna ye kenile i kona fela ku ba ye tabisa ku Jehova haiba i ezwa ka lilato ni ka buineelo, isiñi ka mulelo wa ku bata ku pahamela ba bañwi. Kacwalo he ki kwa butokwa hahulu ku ba ni mubonelo o itikanelezi ka za musebezi o lu eza mwa ku yemela bulapeli bwa niti. Nihaike ha ku na ya kona ku atula milelo ya mutu yo muñwi ka ku nepahala, Jehova “u likanyeza lipilu fa sikala.” (Liproverbia 24:12; 1 Samuele 16:7) Kacwalo lu lukela ku no ipuzanga kamita kuli, ‘Mulelo wa ka kanti ki ufi ha ni nze ni peta misebezi ya tumelo?’—Samu 24:3, 4; Mateu 5:8.
Mubonelo O Munde wa Musebezi wa Luna
11. Ki lipuzo mañi ze ama musebezi wa luna wa mwa bukombwa ze lu swanela ku nyakisisa?
11 Haiba milelo ki yona ya butokwa haiba lu bata kuli lu shemubiwe ki Jehova, lu lukela ku iyakatwa ha kuma kai ka za misebezi ya luna ya tumelo? Ibile fela lu peta bukombwa ka mulelo o munde, kana ki kwa butokwa luli ku ñola misebezi ye lu eza kamba ku ñola butuna bwa yona? Ze ki lipuzo ze utwahala luli, bakeñisa kuli ha lu bati ku tangeta lipalo ku fita misebezi ya tumelo kamba kuli ku ba ni piho ye nde ibe yona nto ye lu iyakatwa hahulu kwa misebezi ya luna ya Sikreste.
12, 13. (a) Ki afi a mañwi a mabaka e lu ñolelanga lipiho za musebezi wa luna wa mwa simu? (b) Ki kabakalañi ha lu tabelanga muta lu bona piho ya lifasi kaufela ya musebezi wa luna wa ku kutaza?
12 Buka ya Mo Lu Swalisanezi ku Eza Tato ya Jehova i li: “Balateleli ba kwa makalelo ba Jesu Kreste ne ba tabela ku utwa lipiho za zwelopili ya musebezi wa ku kutaza. (Mare. 6:30) Buka ya Bibele ya Likezo i lu taluseza kuli ne ku na ni batu ba 120 muta moya o kenile n’o sululezwi fahalimw’a balutiwa fa Pentekonta. Hamulahonyana, palo ya balutiwa ya hula ku fita fa 3,000 kihona hape i fita fa 5,000. . . . (Lik. 1:15; 2:5-11, 41, 47; 4:4; 6:7) Lipiho zeo ku si na kakanyo ne li susuelize hahulu balutiwa!” Ka libaka le li swana leo, Lipaki za Jehova kacenu ba lika ka t’ata ku buluka lipiho ze nepahazi za ze petilwe mwa lifasi lote mwa ku taleleza manzwi a Jesu, a’ li: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Lipiho ze cwalo li fa pono sakata ya ze petilwe mwa lifasi kamukana. Li bonisa ko ku na ni butokwi ni mufuta wa lihatiso ze tokwahala ni kuli ki lihatiso ze kai za mufuta wo ze tokwahala mwa ku zwisezapili musebezi wa ku kutaza.
13 Kacwalo ku biha musebezi wa luna wa ku kutaza ku lu konisa ku peta hande musebezi o lu filwe wa ku kutaza taba ye nde ya Mubuso ka buanyu luli. Kwand’a zeo, kana ha lu ikutwangi ku tiiswa muta lu utwa ka za musebezi o ba eza mizwale ba luna mwa libaka ze ñwi za lifasi? Lipiho za kekezeho ni kulo ya mwa lifasi kamukana li yubokisa lipilu za luna ka tabo, li lu susumeza ku eza ze ñata, mi li lu kolwisa ka za limbuyoti za Jehova. Mi kwa tabisa luli ku ziba kuli piho ya luna ka buñwi i kopanyelelizwe kwa piho yeo ya lifasi kaufela! Piho ya luna ya ka butu ki ye nyinyani ha i bapanywa kwa piho ya lifasi lote, kono Jehova wa lemuha ze lu peta ka butu. (Mareka 12:42, 43) Mu hupule kuli ha mu sa fitisi piho ya mina, piho ya lifasi kaufela ha i na ku kwanelela.
14. Kwand’a ku kutaza ni ku luta, ki lika mañi hape ze kopanyelezwa kwa bulapeli bwa luna ku Jehova?
14 Ki niti kuli buñata bwa z’a peta Paki kaufela kuli a taleleze buikalabelo bwa hae ka ku ba mutang’a Jehova ya ineezi ha li boniswangi fa piho ya hae ka butu. Ka mutala, piho ha i bonisangi za tuto ya Bibele ya ka butu, linako za konile ku fumaneha ni ku abana kwa mikopano ya Sikreste, buikalabelo bwa mwa puteho, za tuso ya fa kwa balumeli ka yena ha i tokwahala, za nubu ya file kwa musebezi wa Mubuso wa mwa lifasi kaufela, ni ze ñwi cwalo. Kacwalo, hailif’o piho ya sebelezo ya luna ya mwa simu ki ya butokwa kwa ku lu tusa ku zwelapili ku tukufalelwa ku kutaza ni ku ambuka ku kutela mwamulaho, lu lukela ku ba ni mubonelo o munde ka za yona. Piho yeo ha i lukeli ku ngiwa kuli ki situpa kamba pasipoti ya kwa moya ye ka lu fumanisa bupilo bo bu sa feli.
‘Ku Tukufalelwa Misebezi Ye Minde’
15. Nihaike kuli misebezi i nosi ha i koni ku lu pulusa, ki kabakalañi ha i li ya butokwa?
15 Kwa iponahaza hande kuli nihaike kuli misebezi i nosi ha i koni ku lu pulusa, ki ya butokwa. Ki ka lona libaka leo Bakreste ha ba bizwa “sicaba se li sa hae luli, se si tukufalelwa misebezi ye minde” ni ha ba susuezwa ku ‘babalelana, kuli ba susumezane mwa lilato ni mwa misebezi ye minde.’ (Tite 2:14; Maheberu 10:24) Ka ku koñomeka sisupo, Jakobo, muñoli yo muñwi wa Bibele, n’a ize: “Mo ku inezi ka mubili, kuli ha u si na moya u shwile; ku cwalo ni ka tumelo, ha i si na misebezi, i shwile.”—Jakobo 2:26.
16. Ki nto mañi ya butokwa hahulu ku fita mane ni misebezi, kono lu swanela ku ambuka nto mañi?
16 Nihaike kuli misebezi ye minde ki ya butokwa, milelo ya ku eza misebezi yeo ki yona ya butokwa hahulu ni ku fita. Kacwalo lu ka eza hande ku no tatubanga milelo ya luna ka nako ni nako. Kono bakeñisa kuli ha ku na mutu ya kona ku ziba ka ku nepahala milelo ya ba bañwi, lu lukela ku ambuka ku atula ba bañwi. Lu buziwa kuli: “Kana ki wena mañi, kuli u nyaze mutang’a mulena yo muñwi?” Mi kalabo i bunolo: “Nih’a tiya kamba a wa, ki taba ya mulen’a hae.” (Maroma 14:4) Jehova yena Muñali wa linto zote, ni muatuli wa hae ya ketile, Kreste Jesu, ba ka lu atula, isiñi ka ku ya ka misebezi ya luna fela kono hape ni ka milelo ya luna, kolo ye lu na ni yona, lilato la luna, ni buineelo bwa luna. Ki Jehova fela ni Kreste Jesu ba ba kona ku atula ka ku nepahala ka za haiba lu ezize zeo Bakreste ba laelwa ku eza mwa manzwi a muapositola Paulusi a’ li: ‘Tundamena ku itahisa ku Mulimu unz’o lumelelwa, u li mubeleki ya sa nyazwi, ya aba Linzwi la niti ka mukwa o lukile.’—2 Timotea 2:15; 2 Pitrosi 1:10; 3:14.
17. Ha lu nze lu satalala ku eza ka mo lu konela kaufela, ki kabakalañi ha lu swanela ku hupula Jakobo 3:17?
17 Jehova h’a tokwi lika ze ñata ku fita ze lu kona. Kwa Jakobo 3:17, ku izwe “butali bo bu zwa kwahalimu” hape “bu na ni kutwisiso.” (NW) Kana hasi nto ye butali ili kezo ye nde ha ne lu ka likanyisa Jehova mwa taba ye? Kacwalo ha lu swaneli ku itomela kamba ku tomela mizwale ba luna lika ze t’ata kamba ze ba sa koni ku peta.
18. Lu kona ku libelelañi haiba lu na ni mubonelo o itikanelezi wa misebezi ya luna ni sishemo sa Jehova?
18 Ibile fela lu ba ni mubonelo o itikanelezi wa misebezi ya luna ya tumelo ni sishemo sa Jehova, lu ka zwelapili ku ba ni tabo ye li sizibelo sa batanga ba Jehova ba niti. (Isaya 65:13, 14) Lu ka nyakalala bakeñisa limbuyoti zeo Jehova a sululela batu ba hae ka sikwata, ku si na taba ni zeo luna ka sibili lu kona ku eza ka butu. Ha lu ka zwelapili ka “tapelo ni ka kupo ye na ni buitumelo” lu ka kupa Mulimu kuli a lu tuse ku tundamena ku eza mo lu konela kaufela. Ha lu ka eza cwalo ku si na kakanyo, “kozo ya Mulimu ye fita kutwisiso kaufela, i ka buluka lipilu za [luna] ni mihupulo ya [luna] ku Jesu Kreste.” (Mafilipi 4:4-7) Ki niti, lwa kona ku omba-ombiwa ni ku tiiswa ki ku ziba kuli lwa kona ku piliswa, isi ka misebezi fela i nosi, kono ka sishemo sa Jehova!
Kana Mwa Kona ku Talusa Libaka Bakreste
• ha ba ambuka ku itumbela ze ba petile ka butu?
• ha ba ambuka moya wa kangisano?
• ha ba biha misebezi ya bona ya Sikreste ya mwa bukombwa?
• ha ba pima ku atula Bakreste ka bona?
[Lipuzo za Tuto]
[Siswaniso se si fa likepe 15]
“Sishemo sa ka sa ku likana”
[Maswaniso a fa likepe 16, 17]
Maeluda ba tabela za peta mañi ni mañi wa ku bona ilikuli puteho ibe mwa buiketo
[Maswaniso a fa likepe 19]
Ha mu sa fitisi piho ya mina, piho ya lifasi kaufela ha i na ku kwanelela