Lipuzo Ze Zwa kwa Babali

Ha ne ba utwile kuli Pitrosi ya n’a tamilwe wa ngongota fa munyako, ki kabakalañi balutiwa ha ne ba ize: “Ki lingeloi la hae”?—Likezo 12:15.

Balutiwa mwendi ka mafosisa ne ba nahanile kuli lingeloi le ne li yemela Pitrosi ki lona le ne li tile kwa sikwalo. Ha mu nyakisise taba kaufela mo ku fumaneha timana ye.

Pitrosi n’a tamilwe ki Heroda, ya n’a bulaile Jakobo. Kacwalo balutiwa ne ba na ni libaka le li utwahala la ku lumela kuli Pitrosi ni yena n’a ka bulaiwa. Ha n’a kenyizwe mwa tolongo Pitrosi n’a tamilwe ka mawenge mi n’a kantelwa ki litopa ze ne za masole mi sitopa se siñwi ni se siñwi ne si na ni masole ba bane. Cwale busihu bo buñwi, n’a lukuluzwi ka makazo mi lingeloi la mu etelela ku mu zwisa mwa tolongo. Pitrosi kwa nalule-lule ha n’a lemuhile ze ne ezahala, a li: “Cwale na ziba kuli ki niti, kuli Mulimu u lumile lingeloi la hae, mi u ni lamulezi mwa lizoho la Heroda.”—Likezo 12:1-11.

Pitrosi a pakisa ku liba kwa ndu ya Maria, mahe Joani Mareka, ko ne ku putahanezi balutiwa ba bañata. Ha n’a ngongotile fa sikwalo sa kwa makozwana, musizana wa mwa lapa ya bizwa Roda a liba kwa munyako ku yo alaba ya n’a ngongota. Ha sa zibile linzwi la Pitrosi, a kitimela ku yo taluseza ba bañwi pili mane a si ka mu kwalulela kale kuli a kene! Kwa makalelo balutiwa ne ba si ka lumela kuli Pitrosi n’a yemi kwa sikwalo. Kono ka mafosisa ba nahana kuli: “Ki lingeloi la hae.”—Likezo 12:12-15.

Kana balutiwa ne ba lumela kuli Pitrosi n’a sa bulailwe kale ni kuli moya wa hae o si na mubili ki ona o ne u yemi kwa sikwalo? Ha ku koni ku ba cwalo, kakuli balateleli ba Jesu ne ba ziba niti ya mwa Mañolo ya za muinelo wa bafu—kuli “ha ba na se ba ziba.” (Muekelesia 9:5, 10) Kono cwale balutiwa ne ba talusañi ha ne ba bulezi kuli: “Ki lingeloi la hae”?

Balutiwa ba Jesu ne ba ziba kuli ku zwa kwamulaho, mangeloi n’a tusanga batu ba Mulimu. Ka mutala, Jakobo n’a bulezi za “lingeloi le li ni lamulezi mwa bumaswe kamukana.” (Genese 48:16) Mi ka ku ama ku mwanana ya n’a li mwahal’a bona, Jesu n’a bulelezi balateleli ba hae kuli: “Mu tokomele, mu si ke mwa nyenya a li muñwi wa ba banyinyani bao; kakuli ni li ku mina, kwa lihalimu mangeloi a bona, a buha kamita pata ya Ndate ya kwa lihalimu.”—Mateu 18:10.

Mi toloko ya Bibele ya Young’s Literal Translation of the Holy Bible i toloka pulelo ya age’ge los (“lingeloi”) kuli “numwana.” Ku bonahala kuli Majuda ba bañwi ne ba na ni tumelo ya kuli mutang’a Mulimu kaufela n’a na ni lingeloi la hae—ili “lingeloi la mulibeleli.” Ki niti kuli mubonelo wo ha u si ka bulelwa ka ku nonga mwa Linzwi la Mulimu. Kono ku bonahala kuli balutiwa ha ne ba bulezi kuli, “Ki lingeloi la hae,” ne ba nahanile kuli lingeloi le ne li yemela Pitrosi ne li yemi kwa sikwalo.