Mu Si Ke Mwa Katala ku Eza Hande

MUAPOSITOLA PITROSI n’a elelize kuli: “Mu be ni muzamao o munde mwahali a bahedeni.” (1 Pitrosi 2:12) Linzwi la Sigerike le li tolokikwe kuli “o munde” li ama kwa nto ye “buheha, ye kutekeha, ye tompeha, ye cisa pasa.” Mwa linako za cwale, ku kana kwa bonahala ku komokisa ku libelela kuli batu kaufela ba be ni muzamao o munde kamba o kutekeha. Kono batu ba Jehova ka sikwata ba konile hande ku sebelisa kelezo ya Pitrosi kacenu. Mane mwa lifasi kaufela ba zibahala ka muzamao wa bona o munde.

Taba yeo i lemuseha hande sihulu ha lu nahana ka za liñalelwa ni litiko ze lu kopana ni zona mwa “linako ze tata” ze. (2 Timotea 3:1) Litiko li atile mwa bupilo bwa luna bwa ka zazi ni zazi, mi twaniso kwa mupilelo wa luna wa Sikreste i atile ni yona. Fahalimwa seo, nihaike kuli litiko ze ñwi ki za nakonyana fela, ze ñwi zona li swalelela fela ona cwalo li sa kuyuki, mwendi mane inze li ekeza fela kwa buhali bwa zona. Niteñi, muapositola Paulusi n’a elelize kuli: “Lu si ke lwa katala ku eza hande, kakuli lu ka kutula mwa nako ya teñi ha lu sa zwafi.” (Magalata 6:9) Kono lu kona cwañi ku eza hande ha lu nze lu kopana ni litiko ze tomohisa pilu ni sitoyo se si sa feli?

Z’e Lu Tusa ku Eza Hande

Ku ba “ya kutekeha, ya tompeha, ya cisa pasa” ku si na ku kakanya ku ama mutu wa mwahali, ili muinelo wa pilu. Kacwalo ku zwelapili ku ba ni muzamao o munde ha lu kopana ni litiko ni manyando haki nto ye ikezahalela fela, kono i tiswa ka ku zwelapili ku latelela ni ku sebelisa likuka za mwa Bibele ka zazi mwa likalulo kaufela za bupilo. Ki lifi ze ñwi za lika ze kona ku lu tusa ku eza cwalo? Ha mu nyakisise lisupo ze latelela.

Mu be ni maikuto a Kreste. Mutu u tokwa buikokobezo kuli a kone ku tiyela lika ze bonahala ku sa luka. Mutu ya ipahamisa h’a koni ku itiisa ha nyandiswa. Kono Jesu, “a ikokobeza, a ipeya ku utwa ku isa kwa lifu.” (Mafilipi 2:5, 8) Ha lu ka mu likanyisa ha lu na ku ‘katala kamba ku fela pilu’ mwa sebelezo ya luna ku Mulimu. (Maheberu 12:2, 3) Mu bonise buikokobezo ni buipeyo ka ku swalisana ka tabo ni ba ba etelela mwa puteho ya mina. (Maheberu 13:17) Mu itute ku ba ni mubonelo wa kuli ba bañwi ba mi “fita,” ka ku beya ze ba tokwa mwa sibaka sa pili ku fita ze mu tokwa mina.—Mafilipi 2:3, 4.

Mu hupule kuli Jehova wa mi lata. Lu lukela ku kolwa kuli Jehova “u teñi, ni kuli ki Yena ya fa ba ba mu bata mupuzo.” (Maheberu 11:6) Wa lu tokomela luli mi u bata kuli lu be ni bupilo bo bu sa feli. (1 Timotea 2:4; 1 Pitrosi 5:7) Ku hupula kuli ha ku na nto ni ye kana ye kona ku lu kauhanya kwa lilato la Mulimu ku ka lu tusa ku sa katala ku eza hande ha lu kopana ni litiko.—Maroma 8:38, 39.

Mu sepe Jehova ka ku tala. Ku sepa Jehova ki kwa butokwa sihulu haiba litiko z’e lu unjami li bonahala ku sa fela kamba haiba li bonahala ku bata ku lu omba moyo. Lu lukela ku sepa ka ku tala kuli Jehova ha n’a ku lumeleza kuli lu likwe ki nto ifi kamba ifi ‘ye lu fita,’ ni kuli kamita u ka lu ‘fa nzila ya ku zwa ku yona.’  (1 Makorinte 10:13) Ha lu sepa Jehova lwa kona ku yema ka bundume nihaiba ha lu bembeha bakeñisa lifu.—2 Makorinte 1:8, 9.

Mu tundamene mwa ku lapela. Tapelo ye zwelela kwa pilu ki ya butokwa hahulu. (Maroma 12:12) Tapelo ye buniti ki ye ñwi ya linzila zeo lu kona ku sutelela ka zona ku Jehova. (Jakobo 4:8) Ku zwelela ku ze lu ipumana ku zona ka butu, lu ituta kuli “ha lu kupa nto . . . , wa lu utwa.” (1 Joani 5:14) Haiba Jehova a tuhelela tiko ku zwelapili ili ku lika busepahali bwa luna, lu kupanga kuli a lu tuse ku itiisa. (Luka 22:41-43) Tapelo i lu luta kuli ni kamuta ha lu yo lu nosi, ni kuli bakeñisa kuli Jehova u inzi ni luna, lu ka kona ku tula kamita.—Maroma 8:31, 37.

Misebezi Ye Minde ‘I Fumanisa ku Lumbwa, ni ku Tompeha’

Ka linako ze ñwi, Bakreste kaufela ba ‘swabiswanga ki miliko ya mifuta ye miñata.’ Kono “lu si ke lwa katala ku eza hande.” Ha mu kalezwi, mu tiiswe ki ku ziba kuli busepahali bwa mina kwa mafelelezo bu ka ‘mi fumanisa ku lumbwa, ni kanya, ni ku tompeha.’ (1 Pitrosi 1:6, 7) Mu itusise hande litukiso kaufela za kwa moya ze zwa ku Jehova kuli li mi tiise. Ha mu tokwa tuso ya ka butu mu ye ku ba ba sebeza sina balisana, baluti, ni baelezi mwa puteho ya Sikreste. (Likezo 20:28) Mu fumanehange kamita kwa mikopano ya puteho, ye ‘lu susumeza ku latana ni ku ba ni misebezi ye minde.’ (Maheberu 10:24) Ku ba ni tukiso ya kamita ya ku balanga Bibele ka zazi ni ku ba ni tuto ya ka butu ku ka mi tusa ku tona ni ku tiya kwa moya; mi hape mu ka tiiswa ka nzila ye swana ha mu abana kamita mwa bukombwa bwa Sikreste.—Samu 1:1-3; Mateu 24:14.

Ka mo i hulela zibo ya mina ya ku iponela lilato ni pabalelo ya Jehova, ki mo i ka hulela ni takazo ya mina ya ku “tukufalelwa misebezi ye minde.” (Tite 2:14) Mu hupule kuli “ya tundamena ku isa kwa mafelelezo, ki yena ya ka piliswa.” (Mateu 24:13) Kacwalo he, mu ikatulele ‘ku sa katala ku eza hande’!

[Manzwi a fa likepe 29]

Lu lukela ku sepa ka ku tala kuli Jehova ha n’a ku lumeleza kuli lu likwe ki nto ifi kamba ifi ‘ye lu fita,’ ni kuli kamita u ka lu ‘fa nzila ya ku zwa ku yona’

[Maswaniso a fa likepe 30]

Ku pateha mwa misebezi ya kwa moya ku kona ku lu tusa ku itukiseza ku kopana ni litiko