“U Nyandiselizwe Tumelo ya Hae”

MWA parki ye mwa tolopo ya Cernobbio ye kwa mutulo wa Italy ku tomilwe muyaho wa ku hupula batu ba ne ba nyandisizwe ka ku sa luka. Yo muñwi wa batu ba ba hupulwa, ya ñozwi za hae fa litapa, ki Narciso Riet. Riet n’a pepezwi mwa Germany, kono bashemi ba hae ki ba kwa Italy, mi n’a bile yo muñwi wa Lipaki za Jehova mwa ma-1930. Mwatas’a puso ya Hitler, Lipaki za Jehova ne ba nyandisizwe bakeñisa ku hana ku bubeka Hitler ku fita Mulimu wa niti, yena Jehova.

Ba Gestapo ha ne ba lemuhile kuli Riet n’a tisanga likopi za Tora ya ku Libelela mwa munganda wa tukufazo, a balehela kwa Cernobbio. Teñi k’o, a yo kupiwa ku toloka Tora ya ku Libelela mwa puo ya kwa Italy ni ku abela balumeli ba bañwi ba ne ba li bukaufi. Musebezi wa n’a fufulezwi ku eza ne u lemuhilwe. Ofisa wa SS ni batu ba hae ba to taeka ndu ya Riet, ba mu tama, ni ku shimba bupaki bo ne ba ize ki bupaki bwa “bukebenga” bwa hae—ili Bibele ni mañolo a sikai! Riet n’a kutiselizwe kwa Germany, a kenywa mwa munganda wa tukufazo wa kwa Dachau, mi a bulaiwa nakonyana pili Ndwa ya Lifasi ya Bubeli i si ka fela kale. Litapa la kwa Cernobbio fo ku ñozwi za hae li bonisa kuli n’a “nyandiselizwe tumelo ya hae.”

Tumelo ya Narciso Riet ni Lipaki ba bañwi ba bañata ba ne ba nyandisizwe ki ba Nazi i susueza Bakreste kacenu ku zwelapili ku sepahala ku Jehova, Yena a nosi ya swanela ku lapelwa mwa pupo kamukana. (Sinulo 4:11) Jesu n’a ize: “Mbuyoti ki ya ba ba nyandiswa kabakala Ku Luka.” Mulimu u ka hupula likezo za bona ni ku ba fuyola bakeñisa bundume bo ba bonisize.—Mateu 5:10; Maheberu 6:10.