Ba Sweli ku Kopana Inze Ba Lata
Ba Sweli ku Kopana Inze Ba Lata
“SICABA sa hao si kopana si nze si lata.” (Samu 110:3) Manzwi ao a na ni taluso ye tuna kwa baituti ba 46 ba mwa sitopa sa bu-118 sa Sikolo sa Bibele sa Giliadi. Ne ba itukisize cwañi kuli ba to fumaneha kwa sikolo se, se si luta batu ku ba balumiwa ba ba yo tusa batu kwa moya mwa linaha li sili? Bo Mike ni Stacie, ba mwa sitopa sa bu-118, ne ba ize: “Keto ya luna ya ku pila mupilelo o bunolo i lu tusize ku sa yauluka ni ku tukufalelwa za kwa moya mwa bupilo bwa luna. Ne lu ikatulezi kuli ha lu na ku tuhelela pisinisi ya luna ye ne lu fumanisa masheleñi ku lu palelwisa ku peta milelo ya luna ya kwa moya.” Sina bo Mike ni Stacie, baituti ba bañwi ba mwa sitopa seo ne ba tile kwa sikolo ka ku itatela mi cwale se ba sebeza sina bashaeli ba Mubuso mwa mafasi a mane.
La Mukibelo, March 12, 2005, baputehi ba 6,843 ne ba teelelize ka tabo ye tuna kwa tukiso ya mukiti wa ku feza sikolo sa Giliadi. Theodore Jaracz, wa mwa Sitopa Se Si Etelela sa Lipaki za Jehova, ne li yena muina-situlo. Ha sa amuhezi ka mazoho a mabeli baenyi ba ne ba zwelela kwa linaha ze 28, a koñomeka butokwa bwa tuto ya Bibele. Ka ku ama kwa manzwi a William Lyon Phelps, muluti wa kwa America, Muzwale Jaracz n’a ize: “Mañi ni mañi ya na ni zibo ye tungile ya Bibele u kona ku bulelwa luli kuli ki mutu ya itutile.” Nihaike tuto ya kwa sikolo ki ya butokwa, tuto ya Bibele ki yona ya butokwa ni ku fita. Yona i tusa batu ku ipumanela zibo ya Mulimu, ye libisa kwa bupilo bo bu sa feli. (Joani 17:3) Muzwale Jaracz n’a babalize baituti bakeñisa takazo ya bona ya ku bata ku abana hahulu mwa musebezi wa ku luta batu Bibele o sweli ku eziwa mwa liputeho za Lipaki za Jehova ze fitelela 98,000 mwa lifasi kaufela.
Susuezo ye Swanela Baituti
Hamulaho wa manzwi a ku kwalula a muina-situlo, William Samuelson n’a file ngambolo ye li, “Mo Mu Kona ku Bela Sina Kota ya Olive ye Tubuzi mwa Ndu ya Mulimu,” ili ye ne tomile fa Samu 52:8. N’a talusize kuli kota ya olive i itusiswa ka swanisezo mwa Bibele ku talusa miselo, bunde, ni likute. (Jeremia 11:16) Mubuleli y’o n’a bapanyize baituti kwa likota za olive, a li: “Jehova u ka mi fa bunde ni likute ha mu nze mu peta ka busepahali musebezi wa mina wa ku kutaza Mubuso sina balumiwa.” Sina kota ya olive ha i tokwa mibisi ye miñata kuli i bande linanga, baituti bao ni bona ba tokwa ku tiisa mibisi ya bona ya kwa moya kuli ba tiyele ku sa tabelwa mwa simu, twaniso, kamba litiko ze ñwi cwalo ze ba kona ku kopana ni zona mwa bulumiwa bwa bona.—Mateu 13:21; Makolose 2:6, 7.
John E. Barr, yo muñwi ku ba balalu ba mwa Sitopa Se Si Etelela ba ne ba abanile mwa tukiso ye, n’a file ngambolo ye li “Mu Lizwai la Lifasi.” (Mateu 5:13) N’a talusize kuli sina lizwai ha li tisanga kuli lico li si ke za bola, musebezi wa balumiwa wa ku kutaza Mubuso wa Mulimu ni ona u ka pilisa batu ba ba teeleza, ni ku ba sileleza kwa ku bola mwa muzamao ni kwa moya. Mi cwale ka linzwi la bushemi, Muzwale Barr a susueza baituti kuli ba “pilisane mwa kozo” ni ba bañwi. (Mareka 9:50) Mubuleli y’o a li: “Mu ikataze ku beya muselo wa moya, mi muzamao ni lipulelo za mina li be ze nde ili ze sa sitatalisi ba bañwi.”
Wallace Liverance, yo muñwi wa baluti ba kwa Giliadi, n’a file ngambolo ye li “Mu Fuluhe mwa Mezi a Tungile.” Sina sisepe se si fita fo ku tungile ha si kona ku liba kwa lineku le li swanela, ka nzila ye swana ku utwisisa “ze tungile za Mulimu”—zona litaba ze ama mulelo wa Mulimu ni mo u ka petelwa—ku kona ku tusa mutu ku eza zwelopili kwa moya. (1 Makorinte 2:10) Ku fuluha mwa mezi a’ si ka tunga a kwa moya ka ku ituta fela “matatekelo a litaba za Mulimu” ku ka lu tibela ku zwelapili kwa moya mi mane ku kona ku libisa kwa ku ‘lwela ka za tumelo ya luna.’ (Maheberu 5:12, 13; 1 Timotea 1:19) Muzwale Liverance n’a felize ngambolo ya hae ka ku bulela kuli: “Haike ‘buliba bwa bufumu ni bwa butali ni bwa zibo ya Mulimu’ bu mi tiise mwa musebezi wa mina wa bulumiwa.”—Maroma 11:33.
Mark Noumair, muluti yo muñwi hape wa kwa Giliadi, n’a file ngambolo ye li “Kana Mu Ka Itebuha Sanda sa Mina?” Ka lilimo ze fitelela 60, Sikolo sa Bibele sa Giliadi si ipumanezi libizo le linde hahulu bakeñisa ‘tutuma ya bupaki’ bo ba file ba ba itutile kwa sikolo seo. (Genese 31:48) Sona sanda sa Giliadi seo si filwe ni kwa baituti ba mwa sitopa sa bu-118. Muzwale Noumair a susueza baituti ku likanyisa batu ba kwa Tekoa ba mwa miteñi ya Nehemia ni ku sebelisana ka buikokobezo ni puteho ya habo bona ni balumiwa ba bañwi. Ne ba elelizwe ku sa ba ni moya wa ‘manduna’ ba ba ikaca ba n’a talusize Nehemia kono ba tabele ku sebeza inze ba kuzize, ba sa iponahalisi.—Nehemia 3:5.
Ze Bonwi ni Lipuhisano Ze Tusa
Ngambolo ye tatama ne i na ni toho ya taba ye li “Linzwi la Mulimu Ne Li Nze Li Zwelapili.” (Likezo 6:7) Ka ketelelo ya Lawrence Bowen, muluti wa kwa Giliadi, baituti ne ba ezize liponiso za lika ze ne ba ikozi mwa bukombwa bwa bona ha ne ba nze ba li kwa sikolo. Liponiso zeo ne li bonisize kuli baituti ne ba shaezi Linzwi la Mulimu ka tukufalelo ni kuli Jehova n’a fuyauzi hahulu musebezi wa bona.
Richard Ashe n’a buhisani ni ba ba fa Betele ba ba eza misebezi ya ku tusa sikolo. Ze ne ba bulezi ne li bonisize ka m’o lubasi lwa Betele lu tusezanga baituti ba kwa Giliadi kuli ba kone ku ituta hande. Ku zwa f’o, Geoffrey Jackson a buhisana ni mizwale ba bañwi ba ne ba kile ba taha kwa Giliadi. Ne ba bonisize linzila li sikai zeo bulumiwa bu kona ku tusa mutu ku lumbeka Jehova. Yo muñwi wa balumiwa bao n’a ize: “Batu ba talimisisanga nto ni nto y’a eza mulumiwa. Ba teelezanga, ku buha, ni ku hupula.” Kacwalo baituti ne ba susuelizwe ku toma mutala o munde ka nako kaufela. Kelezo ye nde yeo ku si na ku kakanya i ka tusa hahulu mwa mazazi a taha.
Stephen Lett, wa mwa Sitopa Se Si Etelela, n’a file ngambolo ya mafelelezo, ye li “Ha Mu Yeñi Sina Balwali ba ‘Mezi a Pilisa.’” (Joani 7:38) N’a bulezi kuli ka likweli ze ketalizoho ze felile, baituti ne ba fumani tuso ye tuna ka ku nwa hahulu kwa mezi a Linzwi la Mulimu la niti. Kono cwale balumiwa ba banca bao ba ka ezisañi zibo ye ba ipumanezi? Muzwale Lett n’a susuelize baituti kuli ba si ke ba ipulukela mezi a kwa moya ao kono ba fe kwateñi ba bañwi kuli ni bona ba ipumanele “liweluwelu la mezi a buba, ku isa kwa bupilo bo bu sa feli.” (Joani 4:14) Mubuleli y’o n’a ekelize kuli: “Mu si libali ku fa Jehova, yena ‘liweluwelu la mezi a’ pilisa’ tompo ye mu swanela. Mu be ni pilu-telele ha mu luta ba ba zwa mwa Babilona yo Mutuna ya kenwi ki linanga.” (Jeremia 2:13) Muzwale Lett n’a felize ka ku susueza baituti kuli ba likanyise ka tukufalelo moya ni munyaliwa inze ba zwelapili ku bulela kuli: “Taha! Mi ya shwile linyolwa a tahe; ya lata, a nge fela kwa mezi a bupilo.”—Sinulo 22:17.
Muzwale Jaracz n’a unguzi tukiso ka ku balela baputehi litumeliso ze ne zwa kwa linaha ze ñata. Hamulaho yo muñwi wa baituti a bala liñolo la buitumelo.
Kana mwa kona ku itatela ku yo sebeleza ko ku na ni butokwi? Haiba ku cwalo, mu tukufalelwe za kwa moya, sina mo ne ba ezelize baituti bao ba ba felize kwa Giliadi. Haike mu ipumanele tabo ni nyakalalo ye zwa mwa ku ifana mwa sebelezo ya Mulimu—ibe ka ku ba mulumiwa ya sebeleza mwa naha i sili kamba ka ku ba sikombwa ya sebeleza habo yena.
[Mbokisi fa likepe 13]
LITABA KA ZA SITOPA
Palo ya linaha ko ba zwa baituti: 8
Palo ya linaha ko ba lumezwi: 19
Palo ya baituti: 46
Avareji ya lilimo za ku pepwa: 33.0
Avareji ya lilimo za ku ba mwa niti: 16.5
Avareji ya lilimo za ku ba mwa bukombwa bwa ka nako kaufela: 12.9
[Siswaniso se si fa likepe 15]
Sitopa Sa bu-118 Se Si Feza kwa Sikolo sa Giliadi sa Bibele
Fa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa silyo mwa mulaini o muñwi ni o muñwi.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O.
(4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D.;(8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.