Lipuzo Ze Zwa kwa Babali

Deuteronoma 14:21 i bala kuli: “Mu si ke mwa ca nama ya ze ishwezi.” Kana liñolo leo la lwanisana ni la Livitike 11:40, le li bala kuli: “Ya ka ca nama ya situpu sa yona, u ka tapisa liapalo za hae, ibe ya masila ku isa kwa manzibwana”?

Litimana ze peli zeo ha li lwanisani. Liñolo la pili li kutela ku bulela mulao o ne u hanisa ku ca nama ya folofolo ye ishwezi, mwendi ili ye ne i bulailwe ki libatana. (Exoda 22:31; Livitike 22:8) Liñolo la bubeli li talusa seo Muisilaele n’a swanela ku eza ha n’a ka tula mulao wo, mwendi ili ka ku sa ziba.

Mulao ha ne u hanisa sika, ne ku sa talusi kuli ne u si ke wa tulwa ka nako ye ñwi. Ka mutala, ne ku na ni milao ye ne i hanisa ku uzwa, ku bulaya, ku fa bupaki bwa buhata, ni ze ñwi cwalo. Kono hape ne ku banga ni likoto ze ne li fiwa bakeñisa ku tula milao yeo ye ne ba filwe ki Mulimu. Likoto ze cwalo ne li tiisa milao ni ku bonisa butokwa bwa yona.

Mutu ya n’a tula mulao o ne u hanisa ku ca nama ya folofolo ye ishwezi n’a li ya masila fapil’a Jehova, mi n’a na ni ku latelela mukwa o swanela wa ku ikenisa ka ona. Haiba n’a ka palelwa ku ikenisa ka swanelo, u zibe n’a ka “itwalela mulatu wa hae.”—Livitike 17: 15,16.