“Tabo Ki Ya Ba Ba Lemuha Butokwi bwa Bona Bwa kwa Moya”
“Tabo Ki Ya Ba Ba Lemuha Butokwi bwa Bona Bwa kwa Moya”
LINYUNYWANI ha li zuha kakusasana, hañata za cobila ka nakonyana, mi hamulaho za fufa ili ku yo bata-bata lico. Manzibwana ha li kutela kwa liyaleto za zona, za cobila ka nakonyana hape, ni ku yo lobala. Ka linako ze ñwi za mwaha, za palisanga, ku latela mai, ni ku hulisa tuzwinyani. Lifolofolo ze ñwi ni zona ki mo li ezezanga.
Luna batu ha lu cwalo. Ki niti kuli lwa canga, ku lobala, ni ku ba ni bana, kono buñata bwa luna ha lu kolwiswi fela ki lika zeo. Lu bata ku ziba libaka ha lu pila. Lu bata ku pila ka tabo. Mi hape lu lakaza ku ba ni sepo ya nako ya kwapili. Takazotuna yeo i bonisa kalemeno ka ka ipitezi kwa batu—ka ku lata za Mulimu, kamba ku ba ni butokwi ni buikoneli bwa ku eza lika za kwa moya.
Ba Ezizwe ka Siswaniso sa Mulimu
Bibele i talusa libaka batu ka taho ha ba na ni butokwi bwa za kwa moya, ha i li: “Mulimu a eza mutu ka siswaniso sa hae; a mu eza ka siswaniso sa Mulimu. A ba eza ili munna ni musali.” (Genese 1:27) Ku eziwa kwa luna “ka siswaniso sa Mulimu” ku talusa kuli ni ko lu silafalizwe ki sibi ni ku sa petahala, lu na ni buikoneli bwa ku bonisa tulemeno to tuñwi twa Mulimu. (Maroma 5:12) Ka mutala, lwa kona ku hupula ni ku panga lika. Hape lu na ni sipimo sa butali, katulo ye lukile, ni buikoneli bwa ku bonisa lilato la buitomboli ku ba bañwi. Mi lwa kona ku yeya lika ze ne li ezahezi kwamulaho ni ku lela za kwapili.—Liproverbia 4:7; Muekelesia 3:1, 11; Mika 6:8; Joani 13:34; 1 Joani 4:8.
Buikoneli bwa luna bwa ku eza lika za kwa moya bu boniswa hande-nde ki takazo ya luna ya ka taho ya ku lapela Mulimu. Ha lu koni ku fumana tabo ya niti ye inelela haisi haiba lu taleleza ka swanelo butokwi bwa ku ba ni silikani se si nde ni Mubupi wa luna. Jesu n’a ize: “Tabo Mateu 5:3, NW) Nihakulicwalo, lu na ni ku bona teñi kuli lwa taleleza butokwi b’o ka niti ya kwa moya—ili litaba ka za Mulimu, ka za likuka za hae ni mulelo wa hae kwa neku la batu. Lu kona ku fumana kai niti ya kwa moya? Lu kona ku i fumana mwa Bibele.
ki ya ba ba lemuha butokwi bwa bona bwa kwa moya.” (“Linzwi la Hao Ki Yona Niti”
Muapositola Paulusi n’a ñozi kuli: “Liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza.” (2 Timotea 3:16) Manzwi a Paulusi a lumelelana ni a Jesu, ili y’o mwa tapelo ku Mulimu n’a ize: “Linzwi la hao ki yona niti.” Linzwi leo kacenu lu li ziba kuli ki Bibele ye Kenile, mi ne lu ka eza ka butali ha ne lu ka tatuba haiba lituto ze lu lumela ni likuka za luna za lumelelana ni ze ku yona.—Joani 17:17.
Ka ku bapanya lituto ze lu lumela ni Linzwi la Mulimu, lu likanyisa batu ba kwa Berea ya kwaikale, ba ne ba ikolwisize kuli lituto za Paulusi ne li lumelelana ni Mañolo. Ku fita ku nyaza batu ba kwa Berea, Luka n’a ba babalize bakeñisa moya wa bona. N’a ñozi kuli: “Ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze ba bulelelwa kana ki mo li inezi.” (Likezo 17:11) Bakeñisa lituto ze kopami za bulapeli ni muzamao ze atile kacenu, lu tokwa ku likanyisa mutala wa batu ba kwa Berea ba lipilu ze nde.
Nzila ye ñwi ya ku ziba ka yona niti ya kwa moya ki ka ku bona mo i amela bupilo bwa batu. (Mateu 7:17) Ka mutala, ku pila ka niti ya Bibele ku lukela ku bisa mutu ku ba munna yo munde, ndate yo munde, musali yo munde, kamba me yo munde, ili nto ye ekeza kwa tabo ya mwa lubasi ni ku tahisa buiketo bwa mwa pilu ya mutu. Jesu n’a ize: “Ba ba na ni mbuyoti ki ba ba utwa Linzwi la Mulimu, mi ba li mamela.”—Luka 11:28.
Manzwi a Jesu a lu hupulisa manzwi a Ndat’ahe wa kwa lihalimu, ya n’a bulelezi sicaba sa Isilaele sa kwaikale kuli: “Ki Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila y’o lukela ku zamaya ku yona. Mawe, kabe n’o utwile milao ya ka! n’o kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.” (Isaya 48:17, 18) Kaufela ba ba lata bunde ni ku luka ne ba ka susumezwa luli ki kupo ye cwalo ye lilato!
Ba Bañwi Ba Tabela “ku Baba mwa Lizebe”
Mulimu n’a fitisize kupo ye buniti yeo kwa Maisilaele bakeñisa kuli ne ba yaululwa ki litaba za buhata za bulapeli. (Samu 106:35-40) Ni luna lu swanela ku itibelela kwa litaba za buhata. Ka ku ama kwa batu ba ba ipala kuli ki Bakreste, Paulusi n’a ñozi kuli: “Ku ka taha nako, ye ku yona, batu ba ka hana tuto ye pilisa; kono kabakala ku baba mwa lizebe ba ka ikubukanyeza baluti, ka ku ya ka litakazo za bona. Ba ka kelusa lizebe za bona kwa niti.”—2 Timotea 4:3, 4.
Baeteleli ba bulapeli ba tabisa batu ka ku lumeleza likezo ze maswe, ze cwale ka tobali kwand’a linyalo, kalombe, ni butahwa. Bibele i bulela fo ku sweu kuli ba ba lumeleza likezo ze cwalo ni ba ba li eza “ha ba na ku luwa sanda sa 1 Makorinte 6:9, 10; Maroma 1:24-32.
mubuso wa Mulimu.”—Ku si na ku kakanya, ku pila ka ku lumelelana ni likuka za Bibele ku tokwa bundume, sihulu haiba mutu u talimana ni sheununo. Niteñi, kwa konahala. Mwahal’a Lipaki za Jehova, ku na ni batu ba bañata ba ne ba hapilwe ki milyani ye kola, ba ne ba li matahwa, mahule, ba mifilifili, masholi, ni mahata. Kono ne ba ngile Linzwi la Mulimu ka tukufalelo, mi ka tuso ya moya o kenile, ba eza licinceho mwa bupilo bwa bona ilikuli ba “zamaye ka mukwa o swanela Mulena.” (Makolose 1:9, 10; 1 Makorinte 6:11) Bakeñisa kuli se ba pila mwa kozo ni Mulimu, hape ki kale ba fumana mombecima tota, ni sepo ye tiile ya nako ya kwapili, sina ha lu ka bona.
Sepiso ya Mubuso
Sepo ye mwa Bibele ya kozo ye inelela kwa batu ba ba ipeya ku utwa i ka talelezwa ki Mubuso wa Mulimu. Mwa tapelo ya hae ye li mutala, Jesu n’a ize: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Ee, ki Mubuso wa Mulimu fela o kona ku bona teñi kuli tato ya Mulimu ya ezwa fa lifasi. Kabakalañi? Bakeñisa kuli Mubuso wo wa kwa lihalimu —ili mulonga o mwatas’a tamaiso ya Jesu Kreste—kona nzila yeo Mulimu a bonisa ka yona tukelo ya Hae ya ku busa lifasi.—Samu 2:7-12; Daniele 7:13, 14.
Ka ku ba Mulena wa Mubuso wo wa kwa lihalimu, Jesu Kreste u ka lukulula batu ba ba ipeya ku utwa kwa butanga kaufela, ku kopanyeleza cwalo ni butanga bwa sibi sa Adama ni sihozo sa makulanu ni lifu. Sinulo 21:3, 4 i li: “Mu bone Tabernakele ya Mulimu, i inzi ni batu . . . Mi [Jehova] Mulimu u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”
Kozo ye inelela i ka ata mwa lifasi kaufela. Ki kabakalañi ha lu kona ku ba ni sepo ye cwalo? Libaka li sinuzwi kwa Isaya 11:9, ye li: “Ha ku sa na [kwa babusiwa ba Mubuso] ya ka holofaza kamba ku sinya fa lilundu la ka le li kenile; kakuli lifasi li ka tala zibo ya [Muñ’a] Bupilo, sina mezi mw’a kwahelezi liwate.” Ee, mutu kaufela fa lifasi u ka ba ni zibo ye nepahezi ya Mulimu ni ku ipeya ku mu utwa. Kana sepo yeo ya mi nyakalalisa? Haiba ku cwalo, u zibe ye ki yona nako ya ku kalisa ku ba ni “zibo ya [Muñ’a] Bupilo” ya butokwa.
Kana Mu Ka Teeleza kwa Taba ya Mubuso?
Ka ku itusisa Mubuso, Mulimu u ka felisa misebezi ya Satani kaufela ni ku luta batu ka linzila za Hae ze lukile. Kacwalo, ha ku komokisi he kuli Mubuso ne li ona makanatelo a lituto za Jesu. N’a ize: “Ni swanezi ku y’o bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:43) Kreste n’a laezi balutiwa ba hae kuli ba abane taba ye swana yeo ni ba bañwi. (Mateu 28:19, 20) N’a bulezi cimo kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Mafelelezo ao a taha a cibilika. Kacwalo, ki kwa butokwa hakalo kuli batu ba lipilu ze sepahala ba teeleze kwa taba ye nde ye pilisa!
Albert, ya n’a bulezwi mwa taba ye felile, n’a utwile taba ye nde muta musal’a hae ni mwan’a hae ne ba kalisize ku ituta Bibele ni Lipaki za Jehova. Sapili, Albert n’a honona. Mane n’a kupile mukutazi yo muñwi wa mwa sibaka sa habo kuli a potele musal’a hae ni mwan’a hae, ilikuli a y’o beya buhata bwa Lipaki fa ngandaleza. Kono mukutazi y’o n’a si ka bata ku ikenya teñi. Kacwalo Albert s’a iponela fela kuli a teeleze kwa puhisano ya Bibele ilikuli a kone ku kwacisa mafosisa afi kamba afi. A man’o fumaneha fa tuto iliñwi fela, a kalisa ku ituta ka ku bata ku ziba ze ñata. Hasamulaho, n’a talusize libaka ha n’a cincize mubonelo wa hae. N’a ize: “Kona nto ye ne ni sweli ku bata yona ye.”
Kwa nalulelule, Albert a kalisa ku taleleza butokwi bwa hae bwa kwa moya, mi n’a si ka inyaza. Niti ya Bibele ya mu fa za n’a sweli ku bata mwa bupilo bwa hae kaufela—ku fumana tatululo kwa ketululo ni buputeleli ze atile mwa lifasi ni ku ba ni sepo ya nako ya kwapili. Niti ya Bibele ya mu fumanisa mombecima tota. Kana mu sweli mwa fepiwa kwa moya? Mwa memiwa ka nakonyana kuli mu bale lipuzo ze kolohanyizwe mwa sikwenda fa likepe 6. Haiba mu bata ku ziba litaba ze ñwi, Lipaki za Jehova ba ka tabela ku mi tusa.
[Mbokisi/Maswaniso a fa likepe 6]
KANA BUTOKWI BWA MINA BWA KWA MOYA BWA TALELEZWA?
KANA mwa kolwa ka lico za kwa moya ze mu sweli ku amuhela? Lu mi mema ku bala lipuzo ze latelela mi mu laitele ze mu kona ku alaba ka ku nepahala.
□ Mulimu ki mañi, mi libizo la hae ki lifi?
□ Jesu Kreste ki mañi? Ki kabakalañi ha n’a na ni ku shwa? Lifu la hae li kona ku mi tusa cwañi?
□ Kana Diabulosi u teñi? Haiba u teñi, u simuluha kai?
□ Ki sifi se si ezahala ku luna ha lu shwa?
□ Mulelo wa Mulimu kwa neku la lifasi-mubu ni batu ki ufi?
□ Mubuso wa Mulimu ki nto mañi?
□ Ki lifi lipimo za muzamao z’a tokwa Mulimu?
□ Ki misebezi mañi yeo Mulimu a file bo munna ni musali mwa lubasi? Ki lifi ze ñwi likuka za Bibele ze tahisa tabo ya mwa lubasi?
Haiba mwa kakanya likalabo za ye ñwi ya lipuzo zeo, mwa kona ku ikupela broshuwa ye li Ki Sifi Seo Mulimu A Tokwa ku Luna? Broshuwa yeo, ye hatisizwe ki Lipaki za Jehova mwa lipuo ze bat’o eza 300, i tolongosha lituto za butokwa ze 16 ze tomile fa Bibele, mi i fa likalabo za ka Mañolo kwa lipuzo kaufela ze kolohanyizwe fahalimu.
[Maswaniso a fa likepe 4]
Ka ku sa swana ni lifolofolo, batu ba na ni butokwi bwa za kwa moya
[Siswaniso se si fa likepe 5]
“Kabakala ku baba mwa lizebe ba ka ikubukanyeza baluti.”—2 Timotea 4:3
[Siswaniso se si fa likepe 7]
Kozo ye inelela i ka tahiswa ki Mubuso wa Mulimu wa Bumesiya