Lituto Za Niti—Mu Kona Ku Li Fumana Kai?

MUNNA yo muñwi kwa Tibet u pikulusa liwili la mungomo mo ku na ni litapelo ze ñozwi. U lumela kuli litapelo za hae li sweli za kuta-kutelwa liwili ha li pikuluha. Mwa mandu a matuna a mañwi kwa India, ku na ni muzuzu o munyinyani o itusiswa kwa milapelo ya Sihindu ye kana ya kopanyeleza ku fa insense, mapalisa, ni lika ze ñwi kwa milimu ye fitana-fitana ya maswaniso. Kwa naha ya Italy ye fumaneha likilomita ze ñata ku zwa India, musali u kubamela siswaniso sa Maria, mahe Jesu mwa keleke ye kabisizwe hahulu, mi u lapela a nze a sweli bufaha bwa rozari.

Mwendi mu iponezi nzila yeo bulapeli bu ama ka yona bupilo bwa batu. Buka ye bizwa The World’s Religions—Understanding the Living Faiths i bonisa kuli “Bulapeli . . . bu petile kalulo ya butokwa kwa batu mwa lifasi kamukana mi bu sa zwelapili ku eza cwalo.” Mwa buka ya hae ye bizwa God—A Brief History, muñoli ya bizwa John Bowker u li: “Kwa li ku simwa, ha ku si ka ba kale ni lusika lwa batu lo ne lu s’a ngi kuli Mulimu ki yena muzamaisi ni mubupi. Ku bile cwalo luli nihaiba kwa macaba a iketezi ku sa lumela ku Mulimu kabomu.”

Kaniti, bulapeli bu zamaisize bupilo bwa batu ba bañata-ñata. Kana bo haki bupaki bo butuna bo bu bonisa kuli mutu u na ni z’a tokwa kwa moya? Mwa buka ya hae ye bizwa The Undiscovered Self, Dr. Carl G. Jung, caziba ya tumile wa za munahano, u talusa kuli mutu h’a koni ku ina fela u tokwa ku lapela Mulimu, mi n’a ize “taba yeo i bonahezi kwa batu ku zwa fela kwa simuluho ya bona.”

Nihakulicwalo batu ba bañata ha ba lumeli  ku Mulimu mi ha ba tabeli za bulapeli. Ba bañwi ba ba honona kamba ku hana kuli Mulimu u teñi ba ikutwa cwalo bakeñisa kuli bulapeli bo ba ziba bu palezwi ku ba fa ze ba tokwa kwa moya. Bulapeli bu talusizwe kuli ki “ku latelela sikuka se siñwi; ku sepahala ka ku tala; ku tiiseza; ku bonisa lilato kamba ku tabela.” Ku likana ni taluso yeo, ibat’o ba mañi ni mañi wa bonisanga bulumeli mwa bupilo. Mane nihaiba bona bosilatula Mulimu.

Mwahal’a nako kaufela ye ba pilile batu, takazo ya bona ya ku bata ku fumana ze ba tokwa kwa moya i tahisize kuli ba like milapelelo ye miñata. Mi mafelelezo ku bile ni litumelo ze fapahana-fapahana mwa lifasi kaufela. Ka mutala, nihaike kuli ibat’o ba bulapeli kaufela bu lumela kuli ku na ni Mulimu, bu na ni mibonelo ye fapahana ya kuli Mulimu yo ki mañi. Bulapeli bo buñata hape bu koñomekanga hahulu za puluso kamba tukuluho. Kono ze ba luta ha li lumelelani ni taluso ya puluso yeo ni mo i kona ku fumanelwa. Bakeñisa kuli litumelo ze li teñi ki ze ñata, lu kona ku ziba cwañi lituto za niti ze tabisa Mulimu?