‘Tuso Ya Ka I Zwa Ku Jehova’

Makwasha Ba Ba Fumana Tabo mwa Sebelezo ya Jehova

MUSALI yo muñwi wa Sikreste kwa Spain n’a ize: “Buñata bwa luna lu ba ba tabile luli nihaike kuli ha lu si ka nyalwa.” Ki kabakalañi ha li ya tabile? U li: “Lu ikutwa hande ku lukuluha kwa lipilaelo za manyalo ilikuli lu sebeleze Mulimu wa luna Jehova ka ku tala.”

Maikuto a’ cwalo a lumelelana ni se li bulela Linzwi la Mulimu ka za bukwasha. Muapositola Paulusi ha n’a talusa litaba ze ama manyalo, n’a susumelizwe ki moya wa Mulimu ku bulela manzwi a butali a, a li: “Ku ba ba si ka nyala, ni kwa basali ba limbelwa, se ni ka bulela ki se: Bunde kiha ba ka itulela sina na.” Paulusi yena n’a li likwasha. Kono ki mabaka mañi a n’a file a ku babaza bukwasha? N’a bonisize kuli ya nyezi u aluhani, hailif’o ya si ka nyala yena u “tokomela za Mulena.” (1 Makorinte 7:8, 32-34) Ku sebeleza Jehova kona libaka le lituna le li tahiseza likwasha ku ba ni tabo.

Bukwasha ka Mulelo O Munde

Za n’a bulezi Paulusi li kana za utwahala ku komokisa kwa batu ba b’a nga manyalo ni ku uta lubasi ku ba za butokwa hahulu. Nihakulicwalo, Jesu Kreste, ya n’a li likwasha kono ili ya n’a tabile, n’a bulezi ka za mulelo o munde wa Bakreste ba ba li makwasha. N’a ize: “Ku na ni ba ba sa koni ku nyala, ba ba ikezize cwalo kabakala mubuso wa kwa lihalimu. Ya kona ku amuhela linzwi leo, a li amuhele.”—Mateu 19:12.

Ka ku lumelelana ni manzwi ao, ba bañata ba boni kuli bukwasha bu ba konisa ku sebeleza Mulimu ku si na ku hakanyiswa ko ku fumaneha mwa manyalo. (1 Makorinte 7:35) Likiti-kiti za Bakreste ba sebeleza Jehova inze ba tabile ku si na sinyalana ni bona, mi ba na ni tabo ka ku tusa ba bañwi. *

Bakreste ba makwasha ba bañata ba lemuha kuli ba ba mwa manyalo haki bona fela ba ba tabile, ni kuli haki makwasha kaufela ba ba si na tabo. Fokuñwi, ibe ba ba nyezi kamba makwasha ba banga ni tabo kamba masitapilu. Mane Bibele ka ku nepahala i bulela kuli linyalo li tiseza “manyando mwa nama.”—1 Makorinte 7:28.

Bukwasha Bakeñisa Muinelo

Ba bañata ki makwasha, isi ka ku lata, kono bakeñisa miinelo. Ba kana ba lakaza silikani ni lilato ze mwa tukiso ya linyalo. Kono ba bañwi bona ba kana ba palelwa ku nyala cwale bakeñisa ku tokwa masheleñi kamba lika ze ñwi. Bakreste ba bañwi—ili bao buñata ki likaizeli ba ba kateleha kwa moya—ba zwezipili ku ba makwasha kakuli ba ikatulezi ku latelela kelezo ya Bibele ya ku nyalelwa ‘fela ku Mulena.’ (1 Makorinte 7:39) Ka busepahali, ba bata sinyalana ni bona mwahal’a balapeli ba Jehova fela, ba ba ineezi ni ba ba kolobelizwe.

 Fokuñwi, makwasha ba bañwi bao ba ikutwanga buinosi. Ha s’a itumelezi kuli u ikutwanga buinosi, Mukreste yo muñwi wa likwasha u bulela kuli: “Lwa ziba mulao wa Jehova, mi ha lu lati ku filikanya Jehova ka nzila ifi kamba ifi. Lu kana lwa tabela ku ba ni sinyalana ni yena, kono ku si na taba ni sineneketo ya batu ba silifasi ya ku lu ‘ketela ba ku lu nyala,’ lu ikatulela ku ba makwasha. Ha lu lati nihaiba ku ikeza sango ni banna ni basali ba ba si Bakreste.” Bakreste ba ba cwalo ba lukela ku babazwa bakeñisa ku mamela likelezo za Bibele ni ku zwelapili ku ba ni muzamao o munde ilikuli ba tabise Jehova, ku si na taba ni masitapilu e ba kana ba ba ni ona.

Jehova U Fa Tuso Ye Tuna

Jehova wa sepahala ku ba ba sepahala ku yena mwa litaba ze cwale ka za ku sa nyalwa ki batu ba ba sa mu sebelezi. Ka ku ya ka za n’a iponezi, Mulena Davida n’a kona ku paka kuli: “Ku ya sepahala, u iponahalisa ku sepahala.” (Samu 18:25) Mi ku ba ba sepahala ka ku ipeya ku mu utwa, Mulimu u sepisa kuli: “Ha ni na ku ku tuhela, ha ni na ku ku fulalela.” (Maheberu 13:5) Ka ku likanyisa Jehova, lwa kona ku babaza hahulu Bakreste ba makwasha, ba banana ni ba bahulu, ba ba kumalela Linzwi la Mulimu ka ku sepahala. Mi hape lwa kona ku ba lapelela kuli Jehova a ba fe m’ata a ku ba konisa ku tiyela matata.—Baatuli 11:30-40.

Bakreste ba bañata ba makwasha ba na ni tabo ka ku abana mwa musebezi wa ku luta Bibele. Ka mutala, mu nahane ka za Patricia, musali wa likwasha wa lilimo za mwa ma-30 ya li paina, kamba mukutazi wa evangeli wa ka nako kaufela. U li: “Nihaike kuli bukwasha bu na ni miliko, bu ni file kolo ya ku ba paina wa kamita. Ka ku ba likwasha, tomahanyo ya ka i bunolo ku i cinca, mi i ni konisa ku ba ni nako ye ñata ya ku ituta. Hape ni boni tuso ya ku itinga ku Jehova ka ku tala, sihulu ha ni kopana ni miliko.”

Maikuto a cwalo a tomile fa sepiso ye mwa Bibele ye tiisa pilu, ye li: “U beye nzila ya hao ku [Muñ’a] Bupilo. U mu sepe, mi ku ka sebeza Yena.” (Samu 37:5) Kaniti, balapeli ba Jehova ba ba sepahala kaufela, ibe ba ba nyezi kamba ba makwasha, ba kona ku tiiswa pilu ni ku matafazwa ki manzwi a tahile ka moya wa Mulimu, a li: ‘Tuso ya ka i zwa ku Jehova.’—Samu 121:2.

[Litaluso za kwatasi]

[Manzwi a fa likepe 9]

“Ya si ka nyala u tokomela za Mulena, mw’a ka tabiseza Mulena.”—1 MAKORINTE 7:32

[Mbokisi fa likepe 8]

MWA KU FUMANELA LIMBUYOTI MWA BUKWASHA

Jesu, ya n’a li likwasha, n’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” —Joani 4:34.

Bana ba Filipi ba basizana ba makwasha ne ba patehile ku “polofita.” —Likezo 21:8, 9.

Likaizeli ba Sikreste ba makwasha ba ba shaela taba ya Mubuso ba mwahal’a ‘mpi ye tuna ya bana ba basizana ba ba tumisa taba’ ye nde.—Samu 68:11.