“Ne Ba Si Ka Latula Tumelo Ya Bona”

JESU KRESTE n’a bulelezi balutiwa ba hae kuli: “Mu ka ba ni mbuyoti ha ba mi tapaula kabakala ka, ha ba mi nyandisa, ba mi tameleza bumaswe kamukana ka buhata.” (Mateu 5:11) Lipaki za Jehova kacenu ba tabile bakeñisa kuli ku likana ni za n’a lutile Kreste ni mutala wa hae, “hasi ba lifasi” mi ba zwelapili ku ikambusa luli ku za bupolitiki ni ku sepahala ku Mulimu mwa miinelo kaufela.—Joani 17:14; Mateu 4:8-10.

Ka za muhato o ne ba ngile Lipaki za Jehova ba mwa sibaka se ne si busiwa ki ba Soviet Union, ku kopanyeleza cwalo ni Estonia, wa ku hana ku latula tumelo ya bona, Toomas Paul, muluti wa bulapeli bwa Lutheran ni mutoloki wa Bibele, n’a ñozi cwana mwa buka ya hae ye bizwa Kirik keset küla (Keleke mwa Munzi): “Ki ba sikai ba ba utwile ze ne ezahezi kakusasa-sasa la April 1, 1951. Ne ku ngilwe muhato wa ku lundula Lipaki za Jehova ni ba ba swalisana ni bona kaufela—batu ba 279 ne ba swelwi ni ku isiwa kwa Siberia . . . Ne ba filwe kolo ya ku nyatela fomu ye ñwi ye ne bonisa kuli ba latula tumelo ya bona ilikuli ba si ke ba lundulwa kamba ku lengiwa mwa tolongo. . . . Palo hamoho ya batu ba ne ba tamilwe ku kopanyeleza cwalo ni ba ne ba swelwi pili ne li 335 mi ne ku na ni mwateñi batu ba 171 ba ne ba swalisana fela ni liputeho za bona. Ne ba si ka latula tumelo ya bona nihaiba ha ne ba li kwa Siberia. . . . Ki ba sikai fela ba Keleke ya [Lutheran ya kwa Estonia] ba ne ba na ni tumelo ye swana ni ya Lipaki za Jehova.”

Lipaki za Jehova mwa lifasi kamukana ba sepile Mulimu kuli u ka ba tusa ku zwelapili ku sepahala ni ku ipeya ku utwa ku yena ku si na taba ni nyandiso. Ba fumana tabo bakeñisa ku ziba kuli ba ka fiwa mupuzo o mutuna kabakala busepahali bwa bona.—Mateu 5:12.