Lipuzo Ze Zwa kwa Babali

Kana linzwi la “mwendi” le li kwa Zefania 2:3 li talusa kuli batanga ba Mulimu ha ba koni ku sepa hande kuli ba ka fumana bupilo bo bu sa feli?

Liñolo le li bala kuli: “A mu bate [Muñ’a] Bupilo, mina kaufela ba ba ishuwa mwa lifasi, ba ba zamaya ka milao ya hae; a mu bate ze lukile, mu bate buikokobezo; mwendi mu ka suhana mu silelezwa mwa lizazi la buhali bwa [Muñ’a] Bupilo.” Ki kabakalañi timana ye ha i li “mwendi”?

Kuli lu utwisise mw’a ka ezeza Jehova ku ba ba sepahala ku yena fa Armagedoni, lu tokwa ku hupula ze i luta Bibele ka za zeo Mulimu a ka ezeza ba ba shwa pili nako yeo ya katulo i si ka fita kale. Ba bañwi ba ka zuha kwa bafu ni ku fiwa bupilo bwa ku sa shwa hape; ba ka ba libupiwa za moya mwa lihalimu. Ba bañwi ba ka zuswa, ku kutela fa lifasi mi ba ka ba ni sepo ya ku pila ku ya ku ile mwa Paradaisi. (Joani 5:28, 29; 1 Makorinte 15:53, 54) Haiba Jehova wa hupula ni ku fa mupuzo kwa batanga ba hae ba ba shwa pili Armagedoni i si ka taha kale, kaniti u ka eza nto ye swana ni kwa batanga ba hae ba ba ka ba teñi fa lizazi la buhali bwa hae.

Manzwi a n’a ñozi muapositola Pitrosi ka ketelelo ya moya ni ona a susueza. N’a ñozi kuli: “[Mulimu] u pilisize Nuwe, yena mubuleli wa Ku Luka, ni ba bañwi ba ba 7, nako y’a tisa Munda o bulaile lifasi la banyefuli; hape n’a atuzi minzi ya Sodoma ni Gomora, ka ku i sinya ki ku i fetula mulola, . . . mi n’a pilisize Lota ya n’a lukile . . . Mulena u ziba ku lamulela batu ba balapeli kwa miliko, ni ku bulukela ba ba maswe lizazi la Katulo, ku ba nata koto.” (2 Pitrosi 2:5-9) Jehova niha n’a yundisize ba ba maswe mwa linako za kwamulaho, n’a pulusize bo Nuwe ni Lota, ba ne ba mu sebeleza ka busepahali. Jehova h’a ka tisa sinyeho fahalimw’a ba ba maswe fa Armagedoni, ni fona f’o u ka lamulela ba ba mu lapela. “Buñata bo butuna” bwa batu ba ba lukile bu ka punyuha.—Sinulo 7:9, 14.

Kacwalo ku bonahala kuli linzwi la “mwendi” ha li si ka itusiswa kwa Zefania 2:3 bakeñisa ku kakanya m’ata a Mulimu a ku kona ku pulusa b’a lata. Kono muta mutu a kalisa ku bata ze lukile ni buikokobezo haki kuli kipeto u ka silelezwa mwa lizazi la buhali bwa Jehova. Ku puluswa ku ka itinga haiba mutu y’o a zwelapili cwalo ku bata ze lukile ni buikokobezo.—Zefania 2:3.

[Siswaniso se si fa likepe 31]

“Mulena u ziba ku lamulela batu ba balapeli kwa miliko”