Lipuzo Ze Zwa kwa Babali

Mwa Isilaele ya kwaikale, liseli le ne li biziwanga fokuñwi kuli ki Shechinah le ne li bonahalanga mwa Sibaka se si Kenile Hahulu sa tabernakele ni mwa tempele ne li yemelañi?

Jehova, Ndate ya lilato ni Musilelezi wa batu ba hae n’a tahisize kuli ku ba teñi kwa hae ku bonahale hande-nde mwa Isilaele. Nzila ye ñwi ya n’a ezize cwalo ka yona ne li ka ku itusisa lilu le li benya mwa sibaka sa hae sa milapelo.

Liseli leo ne li yemela ku ba teñi kwa Jehova ko ne ku sa bonahali. Ne li bonahalanga mwa Sibaka se si Kenile Hahulu sa tabernakele ni sa mwa tempele ya n’a yahile Salumoni. Liseli la ka makazo leo ne li sa bonisi kuli Jehova n’a li teñi luli mwa sibaka seo. Mulimu ha koni ku ina mwa muyaho ufi kamba ufi o yahilwe ki batu. (2 Makolonika 6:18; Likezo 17:24) Liseli le li tahisizwe ki Mulimu leo la mwa sibaka sa hae se si kenile ne li kona ku fa bupaki ku muprisita yo muhulu mi ka yena ni kwa Maisilaele kaufela kuli ku ba teñi kwa Jehova ne ku ba sileleza ni ku ba babalela.

Hamulaho wa ku ñolwa kwa Bibele, liseli leo ne li bizizwe Shechinah (shekhi·nahʹ), mwa puo ya Siarami, ili linzwi le li talusa “nto ye ina.” Linzwi leo ha li yo mwa Bibele kono li fumanwa mwa litoloko za Siarami za Mañolo a Siheberu, ili le li bizwa hape kuli Targums.

Ha n’a fa Mushe litaelo za mwa ku yahela tabernakele, Jehova n’a bulezi ku Mushe kuli: “U ka beya situlo sa sishemo fa aleka, mi mwa aleka u ka beya Bupaki bo ni ka ku fa. Mi ki mo ni ka kopana ni wena, ni bulele ni wena ni nze ni li fa halimu a situlo sa sishemo, mwahali a likerubimi ze peli ze fa aleka ya bupaki.” (Exoda 25:21, 22) Aleka ye bulezwi ne li likwati le ne li basizwe gauda le ne li li mwa Sibaka se si Kenile Hahulu. Ne ku na ni likerubimi ze peli za gauda fa sikwahezo sa Aleka.

Jehova n’a ka bulelela kai? N’a file kalabo ha n’a bulelezi Mushe kuli: “Ni ka iponahalisa mwa lilu, fahalimw’a situlo sa sishemo.” (Livitike 16:2) Lilu leo ne li zengana fahalimw’a Aleka ye kenile ye ne li mwahal’a likerubimi ze peli za gauda. Bibele ha i talusi butelele bwa ku ya mwahalimu bwa lilu leo kamba butelele bwa ku ya mwahalimu ku zwa fa likerubimi zeo.

Lilu le ne li benya leo ne li benyisize Sibaka se si Kenile Hahulu. Mane ne li sona fela simbule sa liseli mwa muzuzu w’o. Muprisita yo mutuna n’a tusiwa hahulu ki liseli leo ha n’a kena mwa muzuzu o mwahali wo fa Lizazi la Swalelo ya Libi. N’a yemi mwa sibaka sa n’a li ku sona Jehova.

Kana liseli la ka makazo leo li na ni taluso ya butokwa kwa Bakreste? Muapositola Joani n’a boni munzi mwa pono ili m’o “ha ku na busihu.” Munzi w’o ki Jerusalema yo Munca, wa Bakreste ba ba tozizwe ba ba zusiwa ku yo busa ni Jesu. Liseli la ona munzi wa swanisezo w’o ha li zwi kwa lizazi kamba kwa kweli. Kanya ya Jehova Mulimu ki yona ye benyisa kopano yeo sina lilu la Shechinah ha ne li benyisize Sibaka se si Kenile Hahulu. Hape Ngunyana, yena Jesu Kreste, ki yena “lumonyi” lwa munzi w’o. Hape “munzi” wo u benyisa liseli la ona la kwa moya ni ku shemuba batu ba ba liuluzwi kwa macaba kaufela ni ku ba etelela.—Sinulo 21:22-25.

Bakeñisa kuli ba amuhela limbuyoti ze ñata zeo ku zwelela ku Mulimu, balapeli ba Jehova ba kona ku kolwa kuli Jehova ki yena Mulisana wa bona ya ba sileleza ni Ndate ya lilato.