Mupuzo wa ku Tabela za Mulimu

MARIANNA, yo muñwi wa Lipaki za Jehova ya pila kwa mboela wa Italy, u na ni lilimo ze 18 mi u mwa sitopa sa mafelelezo kwa sekondari. Fa sikolo seo ku na ni banana ba bañwi ba Lipaki.

Marianna u ñola kuli: “Se ku fitile lilimo li sikai ku zwa f’o luna ba bañwi ne lu kalezi ku nyakisisanga liñolo la Bibele mwa buka ya Ku Tatuba Mañolo ka Zazi ni Zazi ka nako ya ku ishumusa. Ne ku si na sibaka kwa ku ina hande konji mwa likozwana le ne li bapani ni muzuzu wa baluti. N’e li sibaka se si lilata. Buñata bwa baluti ne ba lu bonanga ha ba fita, mi ba bañwi ne ba yemanga ku bona ze lu eza. Hañata yeo ne i banga kolo ya ku alaba lipuzo za bona. Ka ku ya ka avareji, zazi ni zazi ne ku na ni muluti ya n’a t’o yemanga ha lu nze lu bala. Ba sikai ne ba t’o yemanga ni ku teeleza kwa puhisano ya luna ya liñolo la mwa Bibele mi ba bulezi manzwi a ku itebuha moya wa Lipaki wa ku tabela za Mulimu. Nako ye ñwi, mutusi wa muzamaisi wa sikolo n’a lu bizize kuli lu yo buhisanela mwa muzuzu wa baluti.

“Bo muluti ba luna ha ne ba boni fo ne lu buhisanelanga, ba kupa muzamaisi wa sikolo kuli a lu lumeleze ku itusisanga muzuzu o muñwi wa ku itutela, mo ku si na hahulu lilata. Muzamaisi wa sikolo a lumela, mi bo muluti ba luna ba lu babaza fapil’a sitopa mutumbi bakeñisa mutala o munde o lu bonisa. Kaufel’a luna lu tabile hahulu bakeñisa tohonolo ye tuna y’a lu file Jehova.”