Kana ku Sepahala Kwa Tusa?
Kana ku Sepahala Kwa Tusa?
KARL, muyemeli wa kampani ko ku lifiwa mali a silelezo n’a bulelezi Jens kuli: * “Mu lifa hahulu mali a mañata a silelezo ya kalafo. Ha mu iñolisa kwa kampani ya luna, mu ka bulukanga mali a’ eza madola a 20 ka kweli, mi ao ki mali a mañata hahulu.”
Jens s’a alaba kuli: “Mwendi kwa kona ku ba cwalo. Kono se ni lifile mali a silelezo ya kalafo kwa kampani ye ka lilimo ze ñata. Ba kampani ye ba ni tusize hahulu kwamulaho, mi ni bata ku sepahala ku bona.”
Karl s’a alaba kuli: “Ku sepahala ki ko kunde. Kono ku mi cela mali a mañata!”
Karl n’a nepile. Hañata ku sepahala ku kona ku cela mutu mali a mañata. Hape ku tokwa nako, m’ata, ni tamo. Kana busepahali bwa tusa?
Bwa Koñomekwa Kono Ha Bu Boniswi
Ka ku ya ka patisiso ye ne ezizwe mwa Germany ki ba sikolo sa Allensbach Opinion Research Institute, 96 pesenti ya be ne ba talusize maikuto a bona ne ba bulezi kuli ku sepahala ki ko kunde. Patisiso ya bubeli ye ne ezizwe ki sikolo seo mwahal’a batu ba lilimo ze 18 ku ya 24, ne i bonisize kuli batu ba babeli ku ba balalu ne b’a nga kuli ku sepahala ki ko kunde.
Kono nihaike kuli busepahali bwa koñomekwa hahulu, ze ezahala li bonisa kuli batu ha ba sepahali. Sina ka mutala, mwa linaha ze ñata za kwa Yurope, hañata bosinyalana kamba ba bañwi mwa mabasi ha ba sepahalangi hahulu ku ba bañwi. Hañata balikani ha ba sepahalangi ku ba bañwi. Nihaiba busepahali bo ne bu li mwahal’a babelekisi ni babeleki kamba mwahal’a balekisi ni baleki ha bu sa li yo. Libaka?
Fokuñwi mipateho ya bupilo i ca nako kamba m’ata a ku eza litamo ze tokwa busepahali. Batu ba ba swabisizwe ki balikani ba bona ba kana cwale ba zina-zina ku sepahala kwa batu kaufela. Ba bañwi ba kona ku tabela ku ipilela fela ba sa sepahali.
Ku sina kuliñi, hañata busepahali ki kalemeno ka ka koñomekwa kono ili ka ka sa boniswi. Kabakaleo, ha lu nyakisiseñi lipuze ze li: Kana ku sepahala kwa tusa? Haiba kwa tusa, lu swanela ku sepahala ku bomañi, mi lu ka eza cwañi cwalo? Ki mipuzo ifi ye tiswa ki busepahali?
[Litaluso za kwatasi]
^ para. 2 Mabizo a mañwi a cincizwe mwa taba mo ni ye tatama.
[Manzwi a fa likepe 3]
Hañata busepahali ki kalemeno ka ka koñomekwa kono ili ka ka sa boniswi