Libizo la Mulimu mwa Bibele ya Pili ya Sijelemani
Libizo la Mulimu mwa Bibele ya Pili ya Sijelemani
LIBIZO la Mulimu, lona la Jehova, li fumaneha h’a likiti-kiti mwa Bibele ya New World Translation of the Holy Scriptures, ye ne hatisizwe mwa Sijelemani ka 1971. * Kono yeo hasi yona Bibele ya pili ya Sijelemani mo ne ku fumaneha libizo la Mulimu. Ku bonahala kuli Bibele ya pili ya Sijelemani mo ne ku fumaneha libizo la Jehova ne i hatisizwe lilimo ze bat’o ba 500 kwamulaho k’o ki Johann Eck, ya n’a li muluti wa bulapeli bwa Roma Katolika.
Johann Eck n’a pepilwe ka 1486 kwa mboela wa Germany. Ha t’o kwanisanga lilimo ze 24, n’a sa bile kale caziba wa za bulapeli fa yunivesiti ya Ingolstadt, ili musebezi wa n’a sweli ku fitela a timela ka 1543. Eck n’a pila mwa miteñi ya Martin Luther, mi mane ne ba bile balikani ka nakonyana. Kono Luther a ba mueteleli wa Maprotestanti, mi Eck yena a ba muyemeli wa Keleke ya Katolika.
Mubusi wa Bavaria a laela Eck kuli a toloke Bibele mwa Sijelemani, mi toloko ya hae ya t’o hatiswa ka 1537. Ka ku ya ka hatiso ye bizwa Kirchliches Handlexikon, toloko ya hae ne i kumalezi ka busepahali kwa litaba za kwa makalelo mi kacwalo “i tokwa ku kutekiwa hahulu ku fita mo i ngelwa kacenu.” Toloko ya Eck ya Exoda 6:3 i bala kuli: “Ki na Mulena, ya n’a iponahalize ku Abrame, Isaka, ni Jakobo ni li Mulena ya M’ata Ote: mi libizo la ka la Adonai, lona ha ni si ka ba patululela lona.” Eck n’a ekelize kwa timana yeo manzwi a hae a li: “Libizo leo ki Adonai Jehoua.” Licaziba ze ñata za Bibele li nga kuli l’o ki lwa pili libizo la Mulimu ku itusiswa mwa Bibele ya Sijelemani.
Kono libizo la Mulimu li zibilwe ni ku itusiswa ka lilimo ze likiti-kiti. Lwa pili ne li itusisizwe mwa Siheberu, ili m’o “Jehova” a bizwa Mulimu a nosi wa niti. (Deuteronoma 6:4) Lilimo ze bat’o ba 2,000 kwamulaho k’o, manzwi a Jesu a kuli n’a sinulezi batu libizo la Mulimu n’a ñozwi mwa Sigerike. (Joani 17:6) Mi ku zwelela honaf’o, libizo leo li sinuzwi mwa lipuo ze ñata, mi ona cwale-cwale fa, ka ku taleleza Samu 83:18, batu kaufela ba ka fita fa ku ziba kuli Mulimu ya bizwa Jehova ki Muambakani-ya-Pahami wa lifasi kaufela.
[Litaluso za kwatasi]
^ para. 2 Ye hatisizwe ki Lipaki za Jehova; ne i hatisizwe pili mwa Sikuwa ka 1961. Cwale toloko yeo ye kwanile kamba kalulo ya yona i fumaneha mwa lipuo ze fitelela 50.
[Siswaniso se si fa likepe 32]
Hatiso ya 1558 ya Bibele ya Eck, hamohocwalo ni manzwi a ku ama kwa libizo la Jehova kwa Exoda 6:3