Lipuzo Ze Zwa kwa Babali

Ki mabaka mañi a’ bonisa kuli lipulelo ze cwale ka “Yena a nosi ya na ni ku sa shwa” ni yena y’o “ku si na mutu ya mu boni, kamba ya kona ku mu bona” li ama ku Jesu isi ku Jehova Mulimu?

Muapositola Paulusi n’a ñozi kuli: “Ya ka bonahaliswa ka nako ya hae ki Yena ya lumbekwa, Ya-Mata a nosi, Mubusisi wa babusisi, Mulena wa malena; ili Yena a nosi ya na ni ku sa shwa, ya yahile mwa liseli le li sa sutelelwi, ku si na mutu ya mu boni, kamba ya kona ku mu bona.”—1 Timotea 6:15, 16.

Batalusi ba Bibele ba bañata ba fa mabaka a bona ka ku buza kuli: ‘Lipulelo ze cwale ka “Yena a nosi ya na ni ku sa shwa,” “Ya-Mata a nosi,” ni yena y’o “ku si na mutu ya mu boni, kamba ya kona ku mu bona” li kona ku ama cwañi ku mutu u sili kwand’a ku Ya M’ata Ote?’ Ki niti kuli lipulelo zeo za kona ku itusiswa ka ku ama ku Jehova. Kono taba kaufela mo ku fumaneha lipulelo zeo i bonisa kuli kwa 1 Timotea 6:15, 16, Paulusi n’a ama ku Jesu luli.

Kwa mafelelezo a timana 14, Paulusi u bulela kuli “Mulen’a luna Jesu Kreste mane a fite.” (1 Timotea 6:14) Kacwalo, mwa timana 15 Paulusi h’a ñola kuli “ya ka bonahaliswa ka nako ya hae ki Yena ya lumbekwa, Ya-Mata a nosi,” u ama kwa ku bonahaliswa kwa Jesu, isi ku bonahaliswa kwa Jehova Mulimu. Kacwalo ki mañi he “Ya-Mata a nosi”? Kwa utwahala ku bulela kuli Jesu ki yena Ya M’ata ya bulezwi ki Paulusi. Kabakalañi? Bakeñisa kuli taba kaufela mo ku fumaneha pulelo yeo i bonisa fo ku sweu kuli Paulusi u bapisa Jesu kwa babusi ba batu. Jesu kaniti ki yena “Mubusisi wa babusisi [ba batu], Mulena wa malena [ba batu],” sina mwa n’a ñolezi Paulusi. * Ee, h’a bapiswa ku bona, Jesu ki yena ‘Ya-Mata a nosi.’ Jesu u filwe “bulena, kanya, ni mubuso, kuli ba mishobo kaufela, ni ba macaba, ni ba lipuo kaufela ba t’o mu sebeleza.” (Daniele 7:14) Ha ku na mubusi wa butu ya kona ku ipapata kuli u filwe zeo!

Ku cwañi ka za pulelo ye li “Yena a nosi ya na ni ku sa shwa”? Ni fona f’o, Jesu u bapiswa kwa malena ba batu. Ha ku na babusi ba fa lifasi ba ba kona ku ipapata kuli ba filwe bupilo bwa ku sa shwa, kono Jesu yena u filwe bupilo bwa ku sa shwa. Paulusi n’a ñozi kuli: “Lwa ziba kuli Kreste h’a zuhile kwa bafu, h’a sa shwa; lifu ha li sa na mata ku yena.” (Maroma 6:9) Kacwalo, Jesu ki yena wa pili ya talusizwe mwa Bibele kuli u filwe mpo ya bupilo bwa ku sa shwa. Kaniti, ka nako ya n’a ñola manzwi ao Paulusi, Jesu ne li yena a nosi ya n’a filwe bupilo bwa ku sa shwa.

Hape lu swanela ku hupula kuli neikaba mafosisa Paulusi ha n’a ka bulela kuli Jehova Mulimu ki yena a nosi ya n’a na ni ku sa shwa, kakuli Jesu ni yena n’a li ya sa shwi ka nako yeo Paulusi n’a ñola manzwi ao. Kacwalo Paulusi n’a kona ku bulela kuli Jesu ne li yena a nosi ya na ni ku sa shwa h’a n’a mu bapisa kwa babusi ba fa lifasi.

Mi hape ki niti luli kuli hamulaho wa zuho ya Jesu ni ku nyuluhela kwa lihalimu, kwa kona ku bulelwa kuli ‘ha ku na mutu ya mu boni, kamba ya kona ku mu bona.’ Ki niti kuli balateleli ba Jesu ba ba tozizwe ne ba ka mu bona ha se ba shwile ni ku zusezwa kwa lihalimu sina libupiwa za kwa moya. (Joani 17:24) Kono ha ku na mutu wa fa lifasi ya n’a ka bona Jesu mwa muinelo wa hae o kanya. Kacwalo, kwa kona ku bulelwa ka buniti kuli ku zwa fa n’a zuhezi Jesu ni ku nyuluhela kwa lihalimu, ‘ha ku na mutu’ ya mu boni luli.

Kaniti, mutu ha sa nahanisisi hande, ku kana kwa utwahala inge kuli lipulelo ze fumaneha kwa 1 Timotea 6:15, 16 ne li kona ku ama ku Mulimu. Kono taba kaufela mo ku fumaneha manzwi a Paulusi ao—hamoho cwalo ni bupaki bwa mañolo a mañwi—bu bonisa kuli Paulusi n’a ama ku Jesu.

[Litaluso za kwatasi]