‘Tuso ya Ka I Zwa ku Jehova’

Buñata Bwa Amuhela Bulapeli bwa Jehova

BUPOLOFITA bwa Bibele bo bu ama kwa nako ya luna ne bu bulezi cimo kuli batu ba ba zwa mwa macaba kaufela ne ba ka selahanela kwa bulapeli bwa Jehova bo bu pahami. Ka mutala, Jehova Mulimu ka mupolofita Hagai n’a zibahalize kuli: “Ni ka nyanganyisa macaba kaufela; mi bufumu bwa macaba kamukana bu ka ta kwanu, kuli Ndu yeo i tale kanya ya ka.” (Hagai 2:7) Isaya ni Mika ne ba polofitile kuli mwa “mazazi a kwapili”—ili ku talusa mwa mazazi a luna—macaba ni batu ne ba ka lapela Jehova ka nzila ye swanela.—Isaya 2:2-4; Mika 4:1-4.

Kana bupolofita bo bu cwalo bwa talelezwa luli kacenu? Ha lu nyakisiseñi buniti bwa taba yeo. Mwa lilimo ze 10 fela ze felile, batu ba ba fitelela 3,110,000 ba ineezi ku Jehova mwa linaha ze fitelela 230. Kaniti, buñata bwa ba ba li Lipaki za Jehova cwale ne ba kolobelizwe mwa lilimo ze 10 ze felile. Mwa silimo sa 2004, ka avareji ibat’o ba mwa mizuzu ye mibeli ni ye mibeli ne ku banga ni mutang’a Mulimu ya sa z’o ineela ya na taha mwa puteho ya Sikreste. *

Sina mo ne ku bezi mwa lilimo za mwanda wa pili, kacenu ‘batu ba bañata ba lumezi, mi ba sikuluhezi ku Mulena.’ Nihaike kuli kekezeho ya lipalo haki yona luli ye bonisa ku fuyaulwa ki Mulimu, kekezeho yeo i bonisa kuli “lizoho la Mulena” li inzi ni batu ba hae. (Likezo 11:21) Ki nto mañi ye hohela bolule-lule kwa bulapeli bwa Jehova? Mi mu amiwa cwañi ki yona zwelopili yeo?

Batu ba Lipilu Ze Nde B’a Hohiwa

Jesu n’a bulezi ka ku nonga kuli: “Ha ku na mutu ya ka ta ku na, konji h’a ka hohiwa ki Ndate ya ni lumile.” (Joani 6:44) Kacwalo ki Jehova ya hoha batu ba ba “ketezwi bupilo bo bu sa feli.” (Likezo 13:48) Moya wa Mulimu w’a kona ku bisa batu ku ba ni linyolwa la kwa moya. (Mateu 5:3) Ku filikana, kutokwa sepo, kamba ku ba ni butata bo butuna ku kona ku susueza ba bañwi kuli ba bate Mulimu ni ku ituta ka za mulelo wa hae kwa batu.—Mareka 7:26-30; Luka 19:2-10.

Batu ba bañata ba hohelwa kwa bulapeli bwa Jehova bakeñisa kuli tukiso ya puteho ya Sikreste ya ku luta Bibele i ba tusa ku fumana likalabo kwa lipuzo ze ba zinga.

“Haiba Mulimu u teñi, ki kabakalañi batu ha ba zwelapili ku ezwa maswe?” Yeo ne li puzo ye n’e zingile Davide, ya n’a li mulekisi wa milyani ye kola wa kwa Italy. N’a si na cisehelo luli mwa litaba za bulapeli, kacwalo n’a buzize puzo ye zinga yeo ka ku bata fela likañi. U li: “Ne ni si ka libelela kuli ne ni ka fumana kalabo ye utwahala ni ye kolwisa. Kono Paki ya n’a ambolisani ni na n’a na ni pilu-telele mi n’a paka z’a n’a bulela ka litimana za mwa Bibele. Puhisano yeo ne i tahisize cinceho ye tuna ku na.” Kacenu le, Davide u ezize licinceho mwa bupilo bwa hae mi u sebeleza Jehova.

Ba bañwi ba hohelwa mwa kopano ya Jehova ya fa lifasi-mubu bakeñisa kuli ba bata tabo.  Mualafi yo muñwi wa bakuli ba mwa booko wa kwa Zagreb, ili mwa Croatia, n’a iz’o potela mulikan’a hae y’a zibahala ilikuli a y’o bata kalafo ya lipilaelo za hae. N’a komokile hahulu kuli mulikan’a hae wa mualafi y’o n’a mu file nombolo ya luwaile ya ofisi ya mutai wa Lipaki za Jehova mwa Zagreb, ni ku mu fa libizo la Paki yo muñwi y’a n’a ziba. N’a ize: “Ni sepa kuli batu ba b’a kona ku ku tusa. Ha ni ka ku taluseza kuli u ye kwa keleke, u ka yo fumana fela maswaniso a’ sa pili, a’ sa buleli ili a’ sa koni ku ku tusa. Ha ni sepi kuli keleke y’a kona ku ku tusa. Se ni lumile bakuli ba bañwi kwa Lipaki za Jehova, mi ni nahana kuli ni wena ne u ka tusiwa ha ne u ka ya kwateñi.” Ka ku itatela, Lipaki ba mu potela mi ku si ka fita nako ba kalisa ku ituta Bibele ni yena. Hamulaho wa livikinyana, mualafi wa bakuli ba mwa booko y’o a bulela ka tabo kuli zibo ka za mulelo wa Mulimu ne i mu fumanisize tabo mwa bupilo bwa hae.—Muekelesia 12:13.

Muta ba tahelwa ki butata, ba bañata ba lemuhile kuli ki niti ya Bibele fela ye kona ku ba omba-omba luli. Kwa Greece, mushimani wa lilimo za buhulu ze 7 n’a wile ku zwa fa situwa sa sikolo sa habo, mi a timela. Hamulaho wa likwelinyana, Lipaki ba babeli ba katana bomahe mi ba lika ku ba omba-omba ka ku ambolisana ni bona ka za sepo ya zuho. (Joani 5:28, 29) Basali bao ba cipita miyoko. Likaizeli ba ba buza ba li: “Lu t’o mi potela lili haiba mu bata ku ziba ze ñata ka za Bibele?” Ba alaba ba li: “Honafa.” Basali bao ba ba isa kwa ndu ya bona, mi tuto ya Bibele ya kaliswa. Kacenu le, lubasi lwa bona kaufela lu sebeleza Jehova.

Kana Mwa Abana mwa Musebezi Wo?

Ze bonwi ze cwalo li bonisa ze sweli ku ezahala luli mwa lifasi kaufela. Jehova u sweli wa kubukanya ni ku luta buñata bo butuna bwa balapeli ba niti ba ba zwa mwa macaba kaufela. Sikwata seo se si zwa mwa macaba kaufela si na ni tibelelo ye tabisa ya ku punyuha mafelelezo a muinelo wa linto o maswe wo ni ku zwelapili ku pila mwa lifasi le linca la ku luka.—2 Pitrosi 3:13.

Bakeñisa ku fuyaulwa ki Jehova, musebezi o ipitezi wo wa ku kubukanya batu u sweli wa atumela kwa mafelelezo a ona ku si na ku paleliswa. (Isaya 55:10, 11; Mateu 24:3, 14) Kana mwa abana ka tukufalelo mwa musebezi wo wa ku kutaza za Mubuso? Haiba mwa abana teñi, mwa kona ku kolwa kuli Mulimu u ka mi tusa mi mu ka bulela sina walisamu ya n’a ize: ‘Tuso ya ka i zwa ku Jehova.’—Samu 121:2.

[Litaluso za kwatasi]

[Manzwi a fa likepe 9]

“Ha ku na mutu ya ka ta ku na, konji h’a ka hohiwa ki Ndate ya ni lumile.”—JOANI 6:44

[Mbokisi fa likepe 8]

KI MAÑI YA TAHISA KEKEZEHO YEO?

“Kabesi [Muñ’a] Bupilo ku yaha ndu, ba ba i yaha kabe ba sebeza mbango.” —Samu 127:1.

“Ya melisize, ki Mulimu. Hakulicwalo, ya na ni taba, hasi yena ya cala, kamba ya selaela; kono ki Mulimu ya melisa.” —1 Makorinte 3:6, 7.