Lipuzo Ze Zwa kwa Babali

Kana ku bapala lipapali za fa kompyuta za mifilifili kwa kona ku sinya silikani sa mutu ni Jehova?

Mulena Davida wa Isilaele wa kwaikale n’a ñozi kuli: “[Muñ’a] Bupilo u lika ya na ni niti. Kono moya wa hae u toile ya maswe, ni ya lata situhu.” (Samu 11:5) Linzwi la Siheberu le li tolokilwe kuli ‘ku toya’ li kona ku talusa ku ba “mutu y’a li sila.” Kacwalo, mutu kaufela y’a lata mifilifili u ikeza sila sa Mulimu. Kacwalo ki ye puzo ye lu swanela ku nyakisisa: Kana ku bapala lipapali ze ñwi za fa kompyuta kwa kona ku hulisa takazo ya mifilifili?

Lipapali za fa kompyuta za mifilifili li tumisa ku itusisa lilwaniso. Lipapali zeo hañata li lutanga mubapali mwa ku lwanela. Magazini ye bizwa The Economist ne i bulezi kuli: “Busole bwa America bu itingile hahulu fa lipapali za fa kompyuta ze luta ndwa. Milwanelo ye miñwi ye ba itusisa masole ki yona ye mwa lipapali za fa kompyuta ze lekiswa.”

Ki niti kuli ba ba bapalanga lipapali za fa kompyuta za mifilifili ha ba holofazangi batu luli. Kono keto ya ku itabisa ko ku cwalo i bonisañi ka za mo li inezi lipilu za bona? (Mateu 5:21, 22; Luka 6:45) Ne mu ka liñi ka za mutu ya lata ku tabaka, ku kunupa, ku holofaza, ni ku bulaya batu mwa moya? Ku cwañi haiba mutu y’o u tandanga lihora ze ñata ka viki inge a eza mifilifili ya mwa moya yeo, kuli mane s’a hanelela ku hapiwa ki lipapali ze cwalo? Ku si na kuliñi, ne mu ka li u hulisa takazo ya mifilifili, sina fela mutu ya buha maswaniso a mapunu h’a hulisa takazo ya buhule.—Mateu 5:27-29.

Jehova u toile cwañi mutu ya lata mifilifili? Davida n’a bulezi kuli Jehova u mu “toile” hahulu luli. Mwa mazazi a Nuwe, Jehova n’a bonisize kuli n’a toile hahulu ba ba lata mifilifili. Jehova n’a ize ku Nuwe: “Nako ya ku fela kwa ze pila kaufela i tomilwe ki Na, kakuli lifasi li tezi ku bulayana kwa batu; mi, bona, ni ka ba sinya ni lifasi.” (Genese 6:13) Mulimu wa niti n’a sinyize lifasi kamukana la batu bakeñisa mifilifili ya bona. N’a silelelize Nuwe ni lubasi lwa hae fela—ili batu ba 8 ba ne ba s’a lati mifilifili.—2 Pitrosi 2:5.

Batu ba ba bata ku ba balikani ba Jehova, ‘ka mikwale ya bona ba tula mihuma, ka malumo a bona ba tula licekesi.’ Ku fita ku ituta ku lata mifilifili, ha ba “sa na ku ituta ndwa.” (Isaya 2:4) Kuli lu zwelepili ku ba balikani ba Mulimu, isi lila za hae, lu lukela ku ‘kauhana ni bumaswe ni ku eza bunde.’ Lu tokwa ku ‘bata kozo, ni ku i tundamena.’—1 Pitrosi 3:11.

Ku cwañi haiba ne se lu kalile ku bapalanga lipapali za fa kompyuta za mifilifili? U zibe lu na ni ku eza katulo ye tiile ya ku tabisa Jehova ka ku tuhela ku eza z’a toile. Kaniti lu swanela ku kupa moya wa Mulimu ka tapelo kuli u lu tuse ku tuhela mukwa o sinya kwa moya wo. Lwa kona ku tuhela mukwa wo haiba lu susuezwa ki tulemeno to tu cwale ka kozo, bunde, ni buiswalo kuli lu pile ka ku lumelelane ni linzila za Mulimu.—Luka 11:13; Magalata 5:22, 23.