Mo Lu Ngelwa Ki Ba Bañwi Kana Ku Butokwa?

IBATA iba mañi ni mañi u tabela ku lumbiwa. Lu ikutwanga hande ha lu lumbiwa; lu ikutwanga kuli ku na ni ze lu petile. Ku lumbiwa mane ku kona ku lu tusa ku fundumana kuli lu eze zwelopili. Kono lwa zwafanga muta lu lemuha kuli batu ba bañwi ha ba lu tabeli. Ha lu sa isiwi pilu kamba ha lu nyaza-nyaziwa, lwa kona ku zwafa. Mo ba lu ngela ba bañwi ku kona ku ama mo lu ikungela luna beñi.

Ha lu swaneli ku keshebisa mo lu ngelwa ki ba bañwi. Muta ba bañwi ba bulela za muzamao wa luna, seo si kona ku lu tusa ku itekula. Mihupulo ya ba bañwi haiba i tomile fa likuka ze nde za muzamao, ya kona ku lu tusa; ya kona ku lu susueza ku ba ba ba lukile. (1 Makorinte 10:31-33) Nihakulicwalo, mihupulo ya batu haki ye lukile kamita. Mu nahane ka m’o baprisita ba bahulu ni ba bañwi cwalo ne ba ngezi Jesu ka mafosisa ha ne ‘ba huwelelize, ba li, u mu kokotele!’ (Luka 23:13, 21-25) Ha lu swaneli ku isa pilu kwa mibonelo ya batu ye tomile fa litaba za buhata kamba ye tiswa ki muna kamba saluluti. Kacwalo, lu lukela ku ba ni temuho ni ku nga mihato ye swanela muta lu utwa ze ba bulezi ba bañwi.

Mihupulo ya Butokwa Ki Ya Mañi?

Lu bata ku tabelwa ki batu be lu inzi ni bona mwa bulapeli bwa niti. Batu bao ba kopanyeleza ba mwa lubasi lwa luna ba ba mwa tumelo ni mizwale ni likaizeli ba luna ba Sikreste. (Maroma 15:2; Makolose 3:18-21) Lilato ni likute la balumeli ka luna ni ku ‘kutazana’ mwahal’a luna ki za butokwa hahulu ku luna. (Maroma 1:11, 12) Ka ‘buikokobezo lu hupula kuli ba bañwi ba lu fita.’ (Mafilipi 2:2-4) Ku zwa f’o, lu bata ku tabelwa ki “bazamaisi” ba luna—bona maeluda mwa puteho mi lwa itebuha luli ha ba lu tabela.—Maheberu 13:17.

Hape lu tabela ku “pakwa hande ki ba ba kwande.” (1 Timotea 3:7) Lu ikutwanga hande muta lu kutekiwa ki bahabo luna, be lu beleka ni bona, ni be lu yahile ni bona be si balumeli! Mi lu likanga ku eza hande batu be lu kutaza ku bona kuli ba kone ku amuhela lushango lwa Mubuso. Muta lu zibwa mwa silalanda kuli lu batu ba ba ipulukile, ba ba lukile, ni ba ba sepahala, Mulimu wa lumbekwa. (1 Pitrosi 2:12) Kono ni kamuta ha lu koni ku loba milao ya mwa Bibele ka ku bata kuli lu tabelwe ki ba bañwi; mi hape ha lu swaneli ku ba baipi kuli lu tabise batu. Lu lukela ku lemuha kuli ha lu koni ku tabisa mañi ni mañi. Jesu n’a ize: “Kabe mu ba lifasi, kabe lifasi li lata s’e li sa lona; kono kakuli ha mu ba lifasi, ni kuli ni mi ketile mwa lifasi, kifo lifasi li mi toile.” (Joani 15:19) Kana ku na ni se lu kona ku eza kuli balwanisi ba lu kuteke?

Ku Ipumanela Likute kwa Balwanisi

Jesu n’a bulezi kuli: “Mu ka toiwa ki batu kamukana kabakala Libizo la ka; kono ya tundamena ku isa kwa mafelelezo ki yena ya ka piliswa.” (Mateu 10:22) Bakeñisa sitoyo seo,  hañata lu tamelezwanga lika ze maswe. Babusi ba ba sa lu tabeli ba kana ba lu biza kuli lu “bakwenuheli” kamba “balwanisi ba mulonga.” Balwanisi ba ba ipulelela ba kana ba bulela kuli lu ba tuto ye keluhile ye kataza ye swanela ku timezwa. (Likezo 28:22) Fokuñwi lwa kona ku alaba litamilikezo ze cwalo. Kamukwaufi? Ka ku latelela kelezo ya muapositola Pitrosi ye li: “Mwa lipilu za mina mu kenise Kreste, Mulena; mu itukiseze kamita ku ikalabela ku ya ka mi buza sepo ye li teñi ku mina, inze mu eza ka musa ni likute.” (1 Pitrosi 3:15) Hape lu swanela ku itusisa ‘manzwi a’ pilisa, a’ si na se si nyazahala; kuli ya lu lwanisa a sabe, a tokwe bumaswe bwa ka lu bulela ka bona.’—Tite 2:8.

Kono ha lu nze lu lika ku hana litamilikezo ze cwalo, ha lu swaneli ku zwafa kamba ku eshulwa ha lu sinyiwa libizo. Jesu Mwan’a Mulimu ya petehile n’a tamelelizwe kuli ki munyefuli, ki mukwenuheli, mi ni kuli ki wa mioya. (Mateu 9:3; Mareka 3:22; Joani 19:12) Muapositola Paulusi n’a nyefuzwi. (1 Makorinte 4:13) Jesu ni Paulusi ne ba si ka isa pilu kwa litamilikezo zeo; ne ba zwezipili ku pateha mwa musebezi wa bona. (Mateu 15:14) Ne ba ziba kuli ha ba koni ku tabelwa ki lila za bona, kakuli “lifasi kamukana li lapalezi mwatas’a ya maswe.” (1 Joani 5:19) Kacenu ni luna lwa sheununwa. Ha lu swaneli ku saba muta balwanisi ba hasanya buhata kuli ba lu sinye libizo.—Mateu 5:11.

Mihupulo Ya Butokwa Luli

Mo ba lu ngela ba bañwi kwa shutana-shutana, ka ku ya ka milelo ya bona ni ze ba utwile ka za luna. Ba bañwi ba lu lumba ni ku lu kuteka; ba bañwi bona ba lu shwaula ni ku lu toya. Kono ibile fela kuli lu zamaiswa ki likuka za Bibele, lu lukela ku ba ba ba tabile ni ku ipilela ka kozo.

Muapositola Paulusi n’a ñozi kuli: “Liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza, ni ku hulisa ka ku luka; kuli mutu wa Mulimu a petahale mi a talifele luli misebezi kaufela ye minde.” (2 Timotea 3:16, 17) Lu ka fita fa ku tabelwa ki Jehova Mulimu ni Mwan’a hae Jesu Kreste haiba lu amuhela ka buitebuho Linzwi la Mulimu sina lumonyi lwa luna mwa lika kaufela. Mihupulo ya butokwa luli ki ya Jehova ni Mwan’a hae. Mo ba lu ngela kona luli nto ya butokwa. Mi kwa mafelelezo, bupilo bwa luna bu ka itinga fa ku tabelwa ki bona.—Joani 5:27; Jakobo 1:12.

[Manzwi a fa likepe 30]

“Pabazo i ni tisezanga maswabi, kakuli na i kupanga luli mwa pilu”—RABINDRANATH TAGORE MULOKI WA KWA INDIA

[Siswaniso se si fa likepe 31]

Mihupulo ya balumeli ka luna ki ya butokwa

[Manzwi a bañi ba siswaniso fa likepe 30]

Culver Pictures