Tuso ya Mwa Ku Pimela ku Zwafa

KANA mwa zwafanga fokuñwi? Kana mu ba kacimacima? Kana lipilaelo za mwa bupilo za mi zwafisanga? Ki nto mañi ye kona ku mi tusa?

Mutu kaufela ka linako ze ñwi u banga ya tabile mi fokuñwi hape wa zwafanga. Kono Bibele i bulela kuli “ya talifile h’a nyandiswa, u fetuha litanya.” (Muekelesia 7:7, NW) Mwa lifasi le mo ku tezi mifilifili ni likozi, ki mañi ya sa zwafiswi ki ze ezahala? Niteñi, Mañolo hape a li: “Ha ku na bunde bo bu fita bwa kuli mutu a tabele misebezi ya hae.” (Muekelesia 3:22) Kacwalo, kuli lu kone ku ikola bupilo, lu lukela ku ituta ku ba ni tabo ka ku nahananga lika ze nde. Lu kona ku eza cwañi kuli lu be ni tabo ku fita ku zwafa?

Ku nga mihato ye miñwi ye tusa kwa kona ku lu tibela kuli lu si ke lwa zwafa. Ka mutala, ha lu bilaezwa ki lika ze lu sa koni ku tatulula, ki hande ku cinca ze lu eza kamba ku tutela kwa sibaka se siñwi ku fita ku kenelwa ki lipilaelo ze sa feli. Ku zamaya-zamaya, ku teeleza kwa lipina ze nde, ku eza lipapali ze tiisa mubili, kamba ku tusa mutu ya tokwile kwa kona ku lu imulula ni ku lu tahiseza tabo.—Likezo 20:35.

Kono nzila ye nde ka ku fitisisa ya ku tibela ka yona ku zwafa ki ku beya sepo ya luna ku Mubupi. Ku zwafa ha ku zwelapili, lu tokwa ku ‘nepela lipilaelo za luna kaufela ku Mulimu’ ka tapelo. (1 Pitrosi 5:6, 7) Bibele i lu sepisa kuli: “[Muñ’a] Bupilo u fakaufi ni ba ba na ni pilu ye lobehile . . . Manyando a ya lukile ki a mañata: Kono [Muñ’a] Bupilo u mu lamulela ku ona kaufela.” (Samu 34:18, 19) Lu kona ku fita cwañi fa ku kolwa kuli Mulimu wa lu ‘tusa ni ku lu lamulela’? (Samu 40:17) Lu kona ku eza cwalo ka ku ituta Bibele ni ka ku nahanisisa mitala luli ye bonisa kuli Mulimu u isezanga pilu batanga ba hae.