Kana Mu ‘Fumela ku Mulimu’?

KWA LINGULI za Jesu Kreste ze nyangumuna ku na ni nguli ya munna wa mufumi. Ka mulelo wa ku yo pila hande kwapili, mufumi yo a hupula ku yaha matuli a matuna. Kono mwa nguli ya Jesu, munna yo u bizwa kuli ki “litanya.” (Luka 12:16-21) Litoloko li sikai za Bibele mane li itusisa linzwi la “sitoto.” Ki kabakalañi ha bulelwa maswe cwalo?

Ku bonahala kuli mufumi yo n’a libezi Mulimu ha n’a eza milelo ya hae; mi mane n’a si ka fa tumbo ku Mulimu ya n’a tahisize kuli ku be ni kutulo ye tuna. (Mateu 5:45) Kono yena a itundumuna ka ku bulela kuli: “Moya wa ka, u na ni ze nde ze ñata, ze kubukanyelizwe myaha ye miñata. U pumule, u ce, u nwe, u itabise.” N’a hupula kuli lika za n’a kutuzi ka ku sebeza ka t’ata ne li ka ba sina “lukwakwa lo lutelele.”—Liproverbia 18:11.

Mulutiwa Jakobo ha n’a lemusa za moya o cwalo wa buikankabeki, n’a ñozi kuli: “Cwale, mu itemuhele mina ba ba li: Kacenu, kamba kamuso, lu ka ya kwa munzi wani, lu y’o nga mwateñi mwaha, lu lekise, lu fume; kanti ha mu zibi za kamuso. Kakuli bupilo bwa mina kiñi? Bu swana sina mbundu bo bu bonahala nakonyana, mi bu se bu fela.”—Jakobo 4:13, 14.

Ne ku bile cwalo ku munna wa mufumi wa mwa nguli ya Jesu, n’a bulelezwi kuli: “Litanya tuwe! ka bona busihu bo, moya wa hao u ka ngiwa ku wena! cwale z’o lukisize li ka ba za mañi?” Sina mbundu ye felanga ka bubebe, mufumi yo n’a ka shwa pili milelo ya hae i si ka petahala kale. Kana lwa utwisisa tuto ye iputezi mwa taba ye? Jesu n’a ize: “Ya ikubukanyeza bufumu, a sa bu fumeli ku Mulimu, ki mw’a inezi.” Puzo ki ya kuli, kana mu ‘fumela ku Mulimu’?