Ku Lemuha Lisupo Ki kwa Butokwa Hahulu!

“Kwa makalelo ne ni nahana kuli mwan’a luna Andreas n’a opa fela mwa toho. Kono a lisela ku ca mi a kala ku cisa hahulu mubili. Toho ya hae ya opa hahulu, mi na kala ku bilaela. Bo munn’a ka ha ba kuta kwa ndu, lwa isa Andreas ku dokota. Dokota a yo tatuba Andreas mi a mu lumela kwa sipatela kapili-pili. Kanti ne si ku opa fela mwa toho. Andreas n’a kula butuku bwa menenjaitisi. N’a alafilwe mi kapili-pili a fola.”—Bo Gertrud, me ya pila kwa Germany.

ZE N’E ezahezi ku bo Gertrud mwendi li kile za ezahala kwa bashemi ba bañata. Ku na ni lisupo z’e ba lemusanga kuli mwan’a bona mwendi wa kula. Nihaike matuku a mañwi ha sabisi hahulu, bashemi ha ba nyazisezangi lisupo ze bonisa kuli bana ba bona ba kula. Ku lemuha lisupo ni ku nga muhato o swanela kwa kona ku tusa luli. Ki kwa butokwa hahulu.

Ku cwalo ni kwa litaba li sili ze sa weli kwa matuku. Mutala ki wa kozi ya tsunami ye n’e ezahezi ñohola ka December mwa libaka ze kwa liwate la Indian Ocean. Likopano za muuso mwa libaka ze cwale ka Australia ni Hawaii ne li lemuhile kuli ne ku ka ba ni zikinyeho kwa mutulo wa Sumatra mi ne ba lemuhile butuna bwa kozi ye n’e ka latelela. Kono ne ku si na nzila ya ku fitisa ka yona temuso kwa batu ba ne ba pila mwa libaka ze n’e li mwa lubeta zeo kamba nzila ya kuli ba nge muhato. Kabakaleo ne ku shwile batu ba ba fitelela 220,000.

Lisupo za Butokwa ka ku Fitisisa

Jesu Kreste ha n’a li fa lifasi n’a lutile bateelezi ba hae tuto ya ku lemuha lisupo ni ku nga muhato o swanela. N’a bulezi taba ya butokwa hahulu-hulu. Bibele i biha kuli: “Bafalisi ni basaduki ba sutelela, mi ba lika Jesu ka ku kupa kuli a ba bonise makazo ye zwa kwa lihalimu. A ba alaba, a li: Swalala ha i tile, mu li: Bu ka sa hande, kakuli lihalimu ki le lifubelu. Mi ka nako ya kakusasana mu li: Kacenu pula i ka luma, kakuli lihalimu li bonahala bufubelu bo bunsu. Mu ziba ku lemuha sisupo sa lihalimu, mi ha mu koni ku lemuha sisupo sa linako.”—Mateu 16:1-3.

 Ka ku bulela kuli “sisupo sa linako,” Jesu n’a bonisize kuli Majuda ba ne ba mu teeleza mwa miteñi ye ne bu kala Bukreste ne ba swanela ku lemuha butokwa bwa linako ze ne ba pila ku zona. Muinelo wa linto wa Sijuda ne u tuha u kena mwa kozi ye tuna ye n’e ka ama bote. Mazazi a sikai pili a si ka shwa kale, Jesu n’a bulelezi balutiwa ba hae sisupo se siñwi—ili sisupo sa ku taha kwa hae. Za n’a bulezi ka nako yeo ki za butokwa hahulu kwa batu kaufela kacenu.