Ki Tuto Mañi Ye Kona ku Kondolokisa Bupilo bwa Mina?

KANA mu kile mwa eshulwa hahulu ki matata kuli mane mwa ikutwa sina ba ba li mwa kazuma ka ka si na mwaalo? Mu nahane fela manyando a n’a ka tiswa ki ku palelwa ku tatulula butata kamba matata ao! Ha ku na mutu ya pepilwe inz’a na ni buikoneli bwa ku tatulula matata kaufela ni ku eza likatulo ze nde kamita. Kona libaka tuto ha i li ya butokwa. Mu kona ku fumana kai tuto ye ka mi tusa ku tiyela matata a bupilo?

Buñata bwa banana ni ba bahulu ba bulela kuli tuto ya kwa sikolo ki ya butokwa hahulu. Bocaziba ba bañwi mane ba li ba “lumela ka ku tala kuli ha mu na ku fumana musebezi [o munde] mu sa bi ni tuto ye pahami ya kwa koleji.” Niteñi, ku na ni lika ze ñwi ze ba tokwa batu ze sa koni fela ku fumanwa ka tuto ya kwa sikolo. Ka mutala, kana tuto ye pahami ya kona ku mi bisa mushemi yo munde, ku mi bisa sinyalana yo munde, kamba ku mi bisa mulikani yo munde? Mane batu ba ba latiwa bakeñisa ze ba petile ka lituto za bona ze pahami ba kana ba ba ni mikwa ye sa lakazehi; ba kana ba sa kondisi bupilo bwa bona bwa lubasi, kamba mane ba kana ba fita fa ku ipulaya.

Ba bañwi bona ba itinga fa bulapeli kuli bwa kona ku ba etelela sina simbule sa tuto. Kono b’a zwafa kakuli bulapeli ha bu ba tusi ku talimana ni matata a bupilo. Ka mutala, Emilia * wa kwa Mexico u li: “Se ku fitile lilimo ze 15 ku zwa fo ne ni bonezi kuli ne ni sa koni ku zwelapili mwa linyalo ni bo munn’a ka. Ne lu kanananga bobusile. Ne ni sa koni ku ba tuhelisa ku nwa bucwala. Hañata konji ko ne ni siyanga bana ba luna ba banyinyani ba nosi kuli ni y’o bata ko ba inzi bo munn’a ka. Ne ni zwafile hahulu. Hañata ne ni yanga kwa keleke kuli mwendi ne ni ka yo fumana tuso. Nihaike kuli Bibele ne i baliwanga fokuñwi, na li ku ba ni utwe kelezo ye ne i nongile luli fa butata bwa ka; mi ne ku si na ni yo mukana ya n’a ni atumezi kuli a ni taluseze za ku eza. Ku ina mwa keleke ka nakonyana ni ku kuta-kutela litapelo ne ku si ka ni tusa.” Ba bañwi ba kana ba zwafiswa ki ku bona kuli ba bahulu ba keleke ha ba tomi mutala ka mupilelo wa bona. Kacwalo ba bañata ba felelwa ki sepo ya kuli bulapeli bwa kona ku ba fa tuto ye ba tokwa kuli ba kondise lika mwa bupilo bwa bona.

Kacwalo mu kana mwa ipuza kuli, ‘Ki tuto mañi ye ni swanela ku ituta kuli ni kondolokise bupilo bwa ka?’ Kana Bukreste bwa niti bwa kona ku mi tusa ku alaba puzo ya butokwa yeo? Puzo yeo i ka alabiwa mwa taba ye tatama.

[Litaluso za kwatasi]