Ba Kutaza Taba Ye Nde ku Bosusu

“BA TISA kuli mu late za Mulimu!” Kona mwa n’a bulelezi cwanoñu fa muzamaisi wa lihae le li babalela basupali mwa Navalcarnero, mwa Madrid kwa Spain, ha n’a bulela za Lipaki za Jehova ba ba potelanga lihae leo. Kiñi se ne si mu susuelize ku bulela cwalo?

Batu bañwi ba ba pila fa lihae leo la Rosas del Camino ki bosusu. Kono bakeñisa kuli Lipaki ba itutile puo ya bosusu ya kwa Spain, b’a kona ku ambolisana ni batu bao. Muzamaisi yo a lumba Lipaki ka ku luta lituto za Bibele ku si na tifo ku ba ba li tokwa. N’a lemuhile kuli lituto za taba ye nde ya Mubuso li cincize hahulu bupilo bwa batu ba lihae leo. Mi bayahi bao—sihulu-hulu ba ba sa boni hande ni ba ba sa utweli fakaufi—ni bona ba tabela hahulu ku potelwa ki Lipaki.

Bo Eulogio, ni bona ba pila fa lihae leo. Ki libofu hape ki bosusu, mi cwale se ba ituta Bibele ni Lipaki za Jehova. Zazi le liñwi ha ne ba sweli ku ituta, munna cwana wa musupali a taha mi a tambeka Paki y’o toko ye ne ba lukisize bayahi ba sibaka seo ka ku bonisa buitumelo bwa bona. Toho ya taba ya toko yeo ne i bulela kuli: “Ku Ba Paki.” Kalulo ye ñwi ya toko yeo ne i bala kuli: “Ba pila bupilo bo bunde bwa ku latelela likuka, mi Jehova u ba fa butali ni tabo. Ba potela mandu ka ku kuta-kutela kabakala kuli ba sepile Jehova.”

Kabakala sepo yeo ya ku sepa Jehova, Lipaki ba bañata mwa lifasi lote ba itutile puo ya bosusu ba mwa naha ya bona. Ka ku eza cwalo ba abana ni bosusu lushango lwa Bibele lo lu tiisa ni ku fa sepo.