“Le Liñwi la Mazazi A N’a ni Tabisize Hahulu mwa Bupilo”

KOPANO ye lifelwa ki muso kwa Australia ye bizwa Beyondblue ne i bulezi kuli: “Batu ba bañata ba katazwa hahulu ki ku lobeha lipilu, mi ku bonahala kuli b’o ki bona butata bo bu ziyelize hahulu minahano ya ba banca.” Lipatisiso li bonisa kuli ibat’o ba mikulwani ba 100,000 ba lobehanga lipilu ka silimo mwa Australia.

Mikulwani ba Sikreste ni bona ba lobehanga lipilu. Kono tumelo ye ba na ni ku Jehova i tusize ba bañata ba ku bona ku tiyela maikuto a zwafisa ni ku kondisa mwa bunca bwa bona. Mi ba fa ba bañwi mutala ka ku eza cwalo. Ka mukwa ufi?

Mu nge mutala wa Claire ya na ni lilimo ze 18. Yena ni bom’ahe ba kopana mwa puteho ye ñwi ya Lipaki za Jehova mwa Melbourne. Bondat’ahe Claire ha ne ba yubekile lubasi lwa bona, Claire n’a lobehile pilu. Kono tumelo ya hae ku Ndat’ahe wa kwa lihalimu, Jehova, ne i sa tiile. Zazi le liñwi dokota ya n’a alafanga lubasi lo wa libizo la Lydia n’a ile kwa ndu ku yo lekula bom’ahe Claire ba ne ba kula. Hasamulaho a ikupela ku isa Claire kwa masintolo ka mota. Mwa nzila, a buza Claire nji n’a na ni mulikani wa mucaha. Claire a mu alaba kuli ka ku ba yo muñwi wa Lipaki za Jehova, n’a sa tambalangi ni micaha kuli a ishumuse. Taba yeo ya komokisa dokota yo. Claire cwale a talusa mo ne i mu tuselize Bibele ku eza likatulo ze nde mwa bupilo. Kwa mafelelezo, Claire a bulelela dokota yo kuli n’a ka mu tiseza buka ya litaba za Bibele ye ne mu tusize hahulu. Buka yeo ki Questions Young People Ask—Answers That Work.

Hamulaho wa mazazi a malalu ku zwa fa n’a fezwi buka yeo, Lydia a lumela bom’ahe Claire luwaile mi a ba taluseza kuli n’a ikozi hahulu ku i bala. Kiha s’a kupela balikani ba hae likopi ze silezi za buka yeo. Claire ha n’a mu iselize libuka zeo, dokota yo a talusa kuli tumelo ya Claire ne i mu susuelize luli. Claire a mu kupa ku ituta Bibele ni yena mi dokota yo a lumela.

Ka likweli li sikai Claire n’a nze a zamaisanga tuto yeo ka nako ya musihali ya n’a pumulanga dokota. Mi cwale Lydia a kupa Claire ku yo bulela za ku lobeha pilu kwa ba banca fa mukopano wa lituto o n’o ka ezwa. Nihaike n’a ikutwa ku ba ni boi, Claire a lumela. Ne ku fumanehile batu ba ba fitelela 60 kwa mukopano wo. Bocaziba ba bane ba za munahano—ba ba hulile—ba bulela kwa sicaba seo. Mi cwale ya fita nako ya kuli Claire a bulele. Claire a koñomeka libaka ha ku li kwa butokwa kuli ba banca ba itame silikani ni Mulimu. A talusa kuli Jehova Mulimu wa iyakatwa ba banca luli mi u tusanga ni ku omba-omba ba ba kupa tuso ya hae. Hape a talusa kuli u na ni buikolwiso bwa kuli Jehova ona cwale-cwale fa u tuha a felisa matuku kaufela ku kopanyeleza cwalo ni matuku a mwa munahano. (Isaya 33:24) Ki lifi ze nde ze ne zwile mwa bupaki b’o bwa n’a file?

Claire u li: “Hasamulaho batu ba bañata ne ba tile ku to ni bulelela kuli ne ba tabezi hahulu ku utwa mukulwani ya fita ku na ha bulela za Mulimu. Ne ni abezi likopi ze 23 za buka ya Young People Ask. Basizana ba balalu ba ne ba li teñi ba ni fa linombolo za mawaile a bona. Yo muñwi wa bona basizana bao u sweli wa ituta Bibele cwale. Lizazi leo n’e li le liñwi la mazazi a n’a ni tabisize hahulu mwa bupilo.”