Lipuzo Ze Zwa kwa Babali

Kana Mukreste wa kona ku ba ni lizwalo le linde haiba a kena musebezi o tokwa ku swala lilwaniso?

Lipaki za Jehova mwa lifasi kaufela b’a nga ka butuna buikalabelo bo ba filwe ki Mulimu bwa ku babalela mabasi a bona kwa mubili. (1 Timotea 5:8) Kono, misebezi ye miñwi i lwanisa luli likuka za Bibele mi i swanela ku tokolomohiwa. Yona misebezi yeo i kopanyeleza misebezi kaufela ye swalisani ni ku coba njuka, ye ama ku itusisa maswe mali, ni ye susueza ku zuba kwai. (Isaya 65:11; Likezo 15:29; 2 Makorinte 7:1; Makolose 3:5) Mifuta ye miñwi ya misebezi, niha i si ka nyaziwa patalaza mwa Bibele, ya kona ku holofaza lizwalo la mutu kamba mazwalo a ba bañwi.

Ku kena musebezi o tokwa ku lwala tobolo kamba silwaniso se siñwi ki keto ya ka butu. Kono musebezi wa ku swala silwaniso u beya mutu mwa kozi ya ku ba ni mulatu wa mali haiba muta o muñwi a laelwa ku itusisa silwaniso sa hae. Kacwalo Mukreste u tokwa ku nyakisisa ka tapelo za haiba wa itatela ku amuhela buikalabelo bwa ku eza keto ya ka bubebe-bebe muta a kupiwa ku eza nto ye ka ama bupilo bwa mutu. Ku lwala silwaniso hape ku beya mutu mwa kozi ya ku holofazwa kamba ku bulaiwa ka ku lwaniswa kamba ku kutisezwa misuha.

Ba bañwi ni bona ba kana ba amiwa ki keto ya eza mutu. Ka mutala, buikalabelo bo butuna bwa Mukreste ki ku kutaza taba ye nde ya Mubuso wa Mulimu. (Mateu 24:14) Kana ku ka konahala ku lutanga ba bañwi kuli ba “pilisane mwa kozo ni batu kaufela,” hailif’o mutu yena u ipilisa ka ku lwala silwaniso? (Maroma 12:18) Ku cwañi za banana kamba ba bañwi mwa lubasi? Kana ku ba ni tobolo mwa ndu kwa kona ku tahisa kozi kwa bupilo bwa bona? Fahalimwa zeo kana ba bañwi ba ka sitataliswa ki keto ya ezize mutu mwa taba ye?—Mafilipi 1:10.

Mwa “mazazi a maungulelo” a, batu ba bañata ba na ni ‘buhali, mi ba toya batu ba bande.’ (2 Timotea 3:1, 3) Ka ku ziba taba yeo, kana mutu n’a ka zwelapili ku ba ya sa “nyazahali” ha n’a ka iketela musebezi wa ku lwala silwaniso se si kona ku mu kenya mwa mifilifili ni batu ba ba cwalo? (1 Timotea 3:10) Kutokwa. Kacwalo puteho ha i na ku nga mutu ya cwalo ku ba ya sa ‘nyazahali’ haiba a zwelapili ku lwala silwaniso ha s’a filwe kelezo ya Bibele ka sishemo. (1 Timotea 3:2; Tite 1:5, 6) Kacwalo munna kamba musali ya cwalo ha na ku kwanisa ze tokwahala kuli a fiwe matohonolo mwa puteho.

Jesu n’a kolwisize balutiwa ba hae kuli haiba ba beya Mubuso mwa sibaka sa pili mwa bupilo bwa bona, ha ba lukeli ku bilaela hahulu ka ze tokwahala mwa bupilo. (Mateu 6:25, 33) Kaniti haiba lu sepa Jehova ka ku tala, “u ka [lu] tiisa. H’a na ku lumela kuli ya na ni niti a nyanganyiswe.”—Samu 55:22.