Muzamao O Munde U Beya Muselo

MWA kaoli ka ka li bukaufi ni likamba le li kwa mboela wa Japan, me yo muñwi ni bana ba hae ba balalu ba kala ku ituta Bibele ni Lipaki za Jehova. Ba man’o bona cwalo, batu ba ne ba yahile ni bona mwa sibaka se si kwahule seo ili se si latelela hahulu sizo ba kalisa ku siloka me yo ba sa mu bona fela. Me yo u li: “Se ne si ni utwisa hahulu butuku ni ku fita kikuli ne ba sa siloki fela na kono ne ba fetuhezi bo munn’a ka ni banake.” Nihakulicwalo, n’a bulelezi bana ba hae kuli: “Lu swanela ku zwelapili ku ba lumelisanga bakeñisa kuli Jehova u bata kuli lu eze cwalo.”—Mateu 5:47, 48.

Kwa ndu n’a luta bana ba hae ku ba ni likute niha ba silokiwa. Lubasi l’o ne lu yanga kamita kwa liwelu-welu la mezi a cisa mwa silalanda seo. Mi mota ha inze i zamaya banana ne ba petanga mwa ku lumeliseza. Ba sa kena fela mwa muyaho, banana kamita ne ba lumelisanga batu ka tabo ka ku bulela kuli “Konnichiwa!”—ili ku talusa kuli “Mu lumele sha!” Lubasi lo ne lu zwezipili ku lumelisanga bo ne lu kopana ni bona kaufela, ku si na taba kuli batu bao ba ne ba yahile ni bona ne ba sa alabangi ka tabo. Nihakulicwalo, batu ne ba nze ba iponela moya o munde o ne ba bonisa banana bao.

Kwa nalule-lule, batu ba sikai ni bona ba kalisa ku alabanga kuli “Konnichiwa.” Hamulaho wa lilimo ze peli, ibato ba mañi ni mañi mwa tolopo n’a alabanga ha lumeliswa ki lubasi lo. Mi batu kaufela ba kalisa ku itumelisanga ni bona ni ku bonisa hahulu silikani mwahal’a bona. Mubakweli wa muzamaisi wa sooli seo a bata ku yana banana bao mupuzo bakeñisa moya o ne ba bonisize o n’o tisize kuli ku be ni cinceho yeo. Kono boma bona banana bao ba mu taluseza kuli ne ba latelela fela nzila ye ba swanela ku pila ka yona Bakreste. Nako ye ñwi ha ne ku bile ni kangisano ya ku ambola mwa sooli seo, yo muñwi wa bashimani bao a talusa mo ne ba lutezwi ki bom’a bona ku lumelisanga ba bañwi ka likute ku si na taba ni ze ba ka eza. Ki yena ya n’a filwe mupuzo wa pili mi za n’a bulezi ne li hatisizwe mwa mutende wa tolopo yeo. Kacenu le lubasi lo lu tabile luli bakeñisa kuli ku latelela likuka za Sikreste ne ku beile mupuzo o munde cwalo. Ku bulelela ba bañwi taba ye nde ku bunolo haiba batu ki balikani.