“Good News for People of All Nations”

YEO kona bukanyana ye ne zusizwe fa Mikopano ya Likiliti ya Lipaki za Jehova ya 2004 ku isa 2005 ya “Mu Zamaye ni Mulimu.” Ki bukanyana ya makepe a 96 ye na ni lushangonyana mwa lipuo ze 92, ku kala ka puo ya si-Acholi ku isa ku ya si-Zulu, mi i lukiselizwe ku fitisa taba ye nde ya Mubuso kwa batu kaufela mo ku konahalela kaufela. (Mateu 24:14) Ze bonwi ze latelela li bonisa ze zwanga mwa ku itusisa buka yeo.

• Hamulaho wa ku amuhela bukanyana yeo fa mukopano, lubasi lo luñwi lwa Sikreste ne lu ile ku yo tambala-tambala mwa liparki ze talu. Teñi k’o lwa yo kopana ni batu ba ne ba zwa kwa India, Netherlands, Pakistan, ni Philippines. Ndate wa lubasi lo n’a bulezi kuli: “Nihaike kuli batu ba kaufela ne ba bulela Sikuwa, ne ba tabezi hahulu ha ne lu ba bonisize lushango mwa puo ya bona, bakeñisa kuli ne ba zwa kwahule hahulu. Ne ba utwisisize hande za musebezi wa luna wa ku kutaza mwa lifasi kaufela ni swalisano ya luna.”

• Paki yo muñwi n’a bonisize bukanyana yeo ku mubeleki sina yena ya n’a zwa kwa India. N’a makalile hahulu ha n’a boni kuli bukanyana yeo ne i na ni lipuo kaufela mi s’a bala lushango mwa puo ya habo yena. Seo ne si tisize kuli ba ambolisane litaba ze ñata ka za Bibele. Mubeleki sina yena ya n’a zwa kwa Philippines n’a tabezi hahulu ha n’a fumani puo ya habo mwa bukanyana yeo mi n’a tabezi hahulu kuli a itute ze ñata ka za Lipaki za Jehova.

• Mwa Canada, musali yo muñwi wa kwa Nepal n’a lumezi ku ituta Bibele ni Paki ka luwaile, kono n’a zina-zinile ku mema kaizeli kwa ndu ya hae. Kono Paki yo ha n’a bulelezi musali yo kuli bukanyana ye i na ni lushango mwa puo ya Nepali, musali yo n’a tabile hahulu mi s’a mema kaizel’a luna kwa ndu ya hae. N’a bata ku ipalela lushango mwa puo ya habo yena! Mi ku zwa honaf’o, musali yo u sweli wa ituta Bibele fa ndu ya hae.