Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Ki kabakalañi sibi sa pili—ku sa utwa kwa Adama—ha ku swanisezwa kwa butuku bwa ku hoza?

Si swana sina butuku kakuli Adama u hozisize bana ba hae sibi. Kacwalo lu hozize muinelo wa sibi, sina banana ba bañwi mo ba hozezanga butuku kwa bashemi ba bona.—8/15, likepe 5.

• Ki lika mañi ze tahisa mifilifili ye ekezehile hahulu kacenu?

Satani u lika ku zwisa batu ku Jehova ka ku suña moya wa mifilifili mwa lipilu za bona, ka lika ze cwale ka maswaniso a zamaya, lipina, ni lipapali za fa kompyuta ze susumeza babapali ku likanyisa situhu ni bubulai. Mifilifili ye boniswa ki mitai ya makande i ekelize kwa likezo ze ñata za mifilifili.—9/1, likepe 29.

• Ponse Pilato ne li mañi?

Ne li Muroma wa mayemo a kwatasi ili yo ku bonahala kuli n’a li mwa busole. Tibere Mulena wa Roma n’a ketile Pilato kuli a be mubusisi wa Judea ka 26 C.E. Jesu ha n’a zekiswa, Pilato n’a utwile litamelezo ze ne bulezwi ki baeteleli ba Majuda. Kuli a tabise sicaba, a lumeleza kuli Jesu a bulaiwe.—9/15, makepe 10-12.

• Ki ‘sisupo’ mañi se si bulezwi kwa Mateu 24:3?

Sisupo seo si ezizwe ka likalulo ze ñata ze eza sisupo se situna. Sisupo seo si kopanyeleza ndwa, lukupwe, mafu, ni lizikinyeho, mi si ka konisa balateleli ba Jesu ku lemuha “ku ba teñi” kwa hae hamohocwalo “ni ku fela kwa lifasi.”—10/1, makepe 4-5.

• Mwa linako za baapositola, Majuda ne ba pila kai kwand’a Palestine?

Mwa linako za baapossitola, libaka ze tuna za Majuda ne li li mwa Siria, Asia Minor, Babilona, ni Egepita, mi ne ku na ni tulalonyana mwa kalulo ya Yurope ya Mubuso wa Roma.—10/15, likepe 12.

• Kana Mukreste wa kona ku ba ni lizwalo le linde haiba a amuhela musebezi wa ku lwala tobolo?

Ku kena musebezi o tokwa kuli mutu a lwale tobolo kamba silwaniso se siñwi ki keto ya ka butu. Kono musebezi wa ku lwala tobolo u kona ku fumanisa mutu mulatu wa mali haiba a itusisa silwaniso seo mi hape ku kona ku mu beya mwa kozi ya ku holofala kamba ku shwa ka ku lwaniswa kamba ku kutisezwa misuha. Mukreste ya lwala silwaniso se si cwalo ha koni ku fita ku ze konisa za ku fiwa buikalabelo mwa puteho. (1 Timotea 3:3, 10)—11/1, likepe 31.

• Bakeñisa kuli linzwi la “Armagedoni” li zwa fa pulelo ya “Lilundu la Megido,” kana ndwa ya Armagedoni i ka lwanelwa kwa lilundu le li kwa Middle East?

Batili. Ha ku na lilundu le li bizwa Megido, kwand’a lizulu fela, kamba mulunda, o li mabapa ni musindi o mwa Isilaele. Sona sibaka seo ha si kwani “malen’a lifasi, ni limpi za bona.” Ndwa ye tuna ya Mulimu i ka lwanwa mwa lifasi kaufela, mi i ka feza lindwa kaufela. (Sinulo 16:14, 16; 19:19; Samu 46:8, 9)—12/1, makepe 4-7.