Ku Tusa Machaina mwa Mexico

“BANNA ba ba lishumi, ba malimi kaufela a macaba, ba ka swalelela mungundo wa kubo ya munna wa Mujuda, ba li: Lu ka ya ni mina; kakuli lu utwile kuli [Muñ’a] Bupilo u inzi ni mina.” (Zakaria 8:23) Bupolofita bo bunde b’o bu sweli bwa talelezwa kacenu mwa lifasi kaufela. Batu “ba malimi kaufela a macaba” ba kumalezi Maisilaele ba kwa moya kuli ba lapele Jehova Mulimu. Lipaki za Jehova ba tabela hahulu ku bona bupolofita bo ha bu talelezwa. Lipaki ba bañata ba ituta puo ye ñwi kuli ba kone ku eza musebezi wa ku kutaza mwa lifasi kaufela.

Lipaki za Jehova mwa Mexico ni bona ba eza cwalo. Mwa Mexico ku pila batu ba ba bulela Sichaina ba ba kulubelwa ku ba ba 30,000. Mwa 2003, ba 15 ku bona bao ne ba fumanehile kwa Kupuzo ya lifu la Kreste ye ne ezelizwe mwa Mexico City. Kacwalo Lipaki ba mwa Mexico ba fita fa ku lemuha kuli kwa kona ku ba ni kulo ya kwa moya mwahal’a batu ba ba bulela Sichaina mwa Mexico. Kuli ku fumanehe bakutazi ba bañata ba ba kona ku kutaza kwa batu bao ba ba bulela Sichaina, ne ku lukisizwe kosi ya likweli ze talu ya ku luta Lipaki ba mwa Mexico mitahisezo ye bunolo ya mwa mufuta o muñwi wa puo ya Sichaina. Palo hamoho ya Lipaki ba 25 ne ba ezize kosi yeo. Kosi yeo ha se i felile, likwambuyu ya na zwa kwa silalanda ko ku bulelwa puo yeo mwa Mexico City na fumanehile kwa mukiti wa ku feza sikolo seo, ili mutala o bonisa mo si itebuhelwa sitopa seo ki batu ba ba bulela Sichaina. Sikolo se siñwi sa Sichaina mwa Mexico ne si lumezi baituti ba balalu ku ya kwa naha i sili ku yo bolosola hande Sichaina sa bona.

Ku ituta puo yeo ne ku tokwa ku itusisa yona. Ha ne ba itutile fela manzwinyana, baituti kapili-pili ba kala ku kutaza mwa puo ya Sichaina mwa sibaka sa lipisinisi mwa sikiliti sa Mexico City. Baituti bao ba ba cisehezi ba kalisa ku zamaisa lituto za Bibele ze 21. Broshuwa ya Ki Sifi Seo Mulimu A Tokwa ku Luna? ya mwa Sichaina se si ñozwi ka sipeleta sa Siroma, ne i tusize hahulu.

Lipaki ba ne ba sa zo kalisa ku eza kosi ya Sichaina ne ba zamaisanga cwañi lituto za Bibele? Kwa makalelo ne ba bulelanga fela kuli, “Qing Du [Shangwe mu bale]” ni ku supa paragilafu mi kihona ba supa puzo hasamulaho. Mutu ha sa balile ni ku alaba mwa Sichaina, ne ba bulela kuli, “Shei shei [Ni itumezi]” ni, “Hen Hao [Mu nepile luli].”

Ne ku kalisizwe tuto ya Bibele ye cwalo ku musali yo muñwi ya n’a li Mukreste wa libizo fela. Ha ba feza ku ituta lwa bulalu, Paki na sa kolwi kuli musali yo na utwisisize. Kacwalo Paki yo a ya kwateñi ni muzwale yo muñwi wa  Muchaina. Ha na buzize musali yo kuli mwendi na na ni lipuzo, musali a buza kuli: “Kana ni tokwa ku ziba ku tapa kuli ni kolobezwe?”

Ku si ka fita nako, kwa tomiwa Tuto ya Buka ya Puteho ko ne ku fumanehanga ibata iba batu ba 9 ba ba bulela Sichaina ni Lipaki ba 23 ba mwa Mexico. Ku ba ne ba kopana ne ku na ni dokota wa Muchaina, ya na kile a fiwa limagazini za Tora ya ku Libelela ni Awake! ki yo muñwi wa bakuli ba na alafa, za mwa puo ya si-Spanish. Bakeñisa kuli na sa zibi ku bala si-Spanish, na kupile mutu yo muñwi ku mu tolokela mibamba i sikai. Ha utwa kuli limagazini zeo li bulela za Bibele, a kupa mukuli yo kuli a mu fumanele limagazini zeo mwa puo ya Sichaina. Mukuli yo na ezize cwalo, mi ka tuso ya ofisi ya mutai wa Lipaki za Jehova mwa Mexico, ne ku ezizwe litukiso za kuli dokota yo a potelwe ki Paki ya ziba Sichaina. Bom’ahe dokota yo ba ba pila kwa Chaina ne ba na ni Bibele, mi na ikolanga ku i bala. Ha na funduka ku ya kwa Mexico, bom’ahe ne ba mu bulelezi kuli a si ke a yo tuhela ku bala Bibele. Kacwalo na lapelanga kuli a fumane mutu ya na ka mu tusa ku ituta ze ñata ka za Mulimu ya bulelwa mwa Bibele. Na makalile ka ku bulela ka ku tiisa a li: “Mulimu u utwile tapelo ya ka!”

Ba bañwi hape ba ne ba tahanga kwa tuto ya buka ya puteho yeo ne li lubasi lo luñwi lwa Sichaina lo ne lu pila mwa mizuzu ya ku telela ku musali wa mwa Mexico ya na ituta Bibele ni Lipaki za Jehova. Nihaike lubasi lwa Sichaina lo ne lu utwa fela hanyinyani puo ya si-Spanish, ne lu fumanehanga teñi ka nako ya tuto ya Bibele. Nako ha i nze i ya, lubasi lo lwa buza Paki ya na zamaisa tuto haiba na na ni lihatiso za mwa puo ya Sichaina. Kapili-pili tuto ya Bibele mwa puo ya Sichaina ya kalisa ku zamaiswa ku bona. Ku si ka fita nako ye telele, lubasi lo lwa itakaleza ku kutaza kwa bayahi ba bañwi ba ne ba zwelela kwa naha ya habo mi lwa neela bupilo bwa lona ku Jehova.

Ki niti Sichaina ki puo ye li t’ata ku ituta yona. Kono sina mo lu bonezi mwa mitala ye lu nyakisisize, ka tuso ya Jehova batu ba lipuo ze ñata, ku kopanyeleza cwalo ni puo ya Sichaina, ba ituta tato ya Mulimu mwa Mexico, hamohocwalo ni mwa likalulo ze ñwi za lifasi-mubu.

[Siswaniso se si fa likepe 17]

Sitopa se si ituta puo ya Sichaina mwa Mexico City

[Siswaniso se si fa likepe 18]

Paki mwa Mexico u zamaisa tuto ya Bibele mwa Sichaina

[Siswaniso se si fa likepe 18]

Bupaki bwa fa ndu ni ndu mwa puo ya Sichaina, mwa Mexico City