Ba Tabisize Lipilu za Bashemi ba Bona
Ba Tabisize Lipilu za Bashemi ba Bona
“MWAN’AKA, pilu ya hao ha i ka talifa, pilu ya ka ni yona i ka taba.” (Liproverbia 23:15) Kaniti, bashemi ba Sikreste ba tabanga muta bana ba bona ba ipumanela butali bo bu zwa ku Mulimu. La Mukibelo, September 10, 2005, likwanamunu la batu b’a 6,859 ba ne ba zwelela kwa linaha ze fitana-fitana ne ba fumanehile kwa mukiti wa ku feza Sikolo sa Bibele sa Giliadi sa bu-119. Kaufel’a bona ne ba tabile hahulu, kono ba ne ba tabile hahulu ni ku fita ki bashemi ba bona b’a 56.
David Walker, ya sebelize ka nako ye telele fa Betele ya United States, n’a kwaluzi tukiso ka tapelo ye zwelela kwa pilu. Mi muina-situlo, David Splane wa mwa Sitopa Se Si Etelela sa Lipaki za Jehova, n’a kalisize tukiso ka ku taluseza bashemi bao kuli: “Lwa mi babaza hahulu-hulu. Mikwa ye mu suñile mwa bana ba mina ba bashimani ni basizana i ba susuelize ku kena mwa sebelezo ya bulumiwa.” Bashemi bao ba kana ba bilaela, bakeñisa kuli bana ba bona bao ba ka tuha ba lumiwa ku yo sebeleza kwa linaha za kwahule. Nihakulicwalo, Muzwale Splane n’a ba omba-ombile kuli: “Mu si ke mwa bilaela ka za bana ba mina. Jehova wa kona ku ba babalela hande ku fita mina.” Mi cwale a li: “Mu nahane fela lika ze nde ze ba ka yo peta bana ba mina. Batu ba ba nyanda ba ka tiiswa lipilu lwa pili mwa bupilo bwa bona.”
Mwa ku Zwelelapili ku Tabisa Ba Bañwi
Muina-situlo a tahisa babuleli ba bane. Pili, Ralph Walls wa mwa Katengo ka Mutai wa United States n’a file ngambolo ye li “Mu Tone.” N’a bonisize kuli bubofu bwa kwa moya bu fita bubofu luli. Puteho ya mwa linako za baapositola ya Laodisea ne i kenezwi ki bobofu bwa kwa moya. Bakreste ba mwa puteho yeo ba ne ba bile libofu kwa moya ne ba tusizwe, kono ku hande ku tibela bubofu bwa kwa moya bo bu cwalo ka ku zwelapili ku tona. (Sinulo 3:14-18) Mubuleli yo a li: “Mu be ba ba tona, mi mu nge banna ba ba okamela sina mwa ba ngela Jehova.” Balumiwa ha ba swaneli ku bilaela hahulu ha ba bona butata mwa puteho. Mulena Jesu Kreste wa ziba hande ze ezahala. U ka eza se siñwi kuli a tatulule butata ka nako ye swanela.
Ku zwaf’o, Samuel Herd wa mwa Sitopa Se Si Etelela n’a alabile puzo ye li “Kana Mu Itukisize?” Sina muzamai ha lwalanga liapalo za tokwa mwa musipili, balumiwa bao ni bona ba lukela ku apala kamita butu bo bunca. Ba lukela ku utwela batu butuku sina Jesu. Mutu ya n’a kula mbingwa ha n’a ize ku yena: “Ha u lata, u na ni mata a ku ni kenisa,” Jesu n’a ize: “Na lata, u kene.” (Mareka 1:40-42) Muzwale Herd cwale a li: “Haiba luli mu bata ku tusa batu, mu ka bata mwa ku ezeza cwalo.” Liñolo la Mafilipi 2:3 li taluseza Bakreste ku hupula kuli ‘ba bañwi ba ba fita.’ Muzwale Herd n’a ize: “Ku ikokobeza ku butokwa hahulu ku fita ku ba ni zibo. Be mu kutaza ku bona mwa bukombwa ni mizwale ni likaizeli ba mina mwa puteho ba ka tusiwa fela ki zibo ya mina haiba mu ikokobeza.” N’a unguzi ngambolo ya hae ka ku bulela kuli haiba balumiwa ba zwelapili ku apala lilato la Sikreste, fohe ba itukisize ku ya kwa linaha ko ba lumiwa, mi ba ka yo peta ze nde kwateñi.—Makolose 3:14.
Mark Noumair, yo muñwi wa baluti ba kwa Giliadi, n’a komokisize baputehi ka toho ya taba ya ngambolo ya hae ye li, “Kana Mu Ka Zwelapili ku Ba ni Bona?” F’o n’a talusa ku zwelapili ku ba ni buitebuho kwa bunde bwa Jehova. Samu 103:2 i li: ‘Lumbeka Muñ’a Bupilo, wena moya wa ka; mi u si ke wa libala lituso za hae kaufela.’ Maisilaele ne ba si ka bonisa buitebuho kwa manna ye ne ba fepiwa ka yona, ha ne ba i bizize ‘buhobe bo bu sa zibahali.’ (Numere 21:5) Ha ne ku fitile nako, manna ne i sa li ye swana, kono bona ne ba tuhezi ku itebuha yona. Muzwale y’o a li: “Haiba mu libala misebezi ya Jehova ni ku keshebisa bulumiwa bwa mina, nto yeo i ka ama mo mu ngela musebezi wa mi file Jehova.” Samu 103:4 i bonisa kuli Jehova u mi “apesa kwa toho mushukwe wa sishemo.” Balumiwa bao ba ka iponela sishemo sa Mulimu mwa liputeho za bona ze nca.
Muluti yo muñwi hape wa kwa Giliadi, Muzwale Lawrence Bowen, n’a file ngambolo ye li “Kana Limbuyoti Li Ka Ba Fahalimw’a Mina?” N’a bulezi kuli mizwale ni likaizeli ba mwa sitopa sa bu-119 ba itutile ka t’ata kuli ba fite fa ku ba balumiwa ba bande. Kono cwale ba tokwa ku kumalela ku Jehova ni kwa musebezi wa ba file. Kwa Sinulo 14:1-4, ku bulezwi kuli ba 144,000 ki bona “ba ba latelelanga Ngunyana kai ni kai mw’a ya.” Kaufel’a bona mwa sikwata seo ba kumalezi Jehova ni Mwan’a hae ku si na taba ni litiko z’e ba tahelanga, mi ba sweli ku peta likonkwani za bona. Mubuleli y’o a li: “Ku be cwañi kamba cwañi, ni luna lu ka kumalela ku Jehova ni musebezi wa lu file ku eza.” Ka ku eza cwalo, balumiwa ba banca ba ka fumana kuli limbuyoti za Jehova ‘li ka ba fahalimw’a bona.’—Deuteronoma 28:2.
Ku Beya Miselo mwa Bukombwa bwa Bona
La Sunda ni la Mukibelo ha ne ba li kwa Giliadi, baituti ne ba yanga mwa bukombwa bwa mwa simu. Wallace Liverance, muñoli wa sikolo sa Giliadi, ha n’a buhisani ni bona, ne ku bonahezi hande-ndende kuli ne ba petile hande bukombwa bwa bona. Ne ba kutalize taba ye nde mwa lipuo ze bat’o ba 10 mi ne ba kalisize lituto ze ñwi za Bibele. Bosinyalana ba bañwi ne ba kalile ku ituta ni munna yo muñwi wa Muchaina. Ha se ba itutile ni yena habeli, ba mu buza mwa n’a ikutwela ka za ku ziba Jehova. A apula Bibele ya hae ni ku ba kupa ku bala Joani 17:3. A talusa kuli n’a ikutwa kuli u mwa nzila ye liba kwa bupilo.
Anthony Morris wa mwa Sitopa Se Si Etelela kihona a buhisana ni mizwale ba balalu ba ba mwa Katengo ka Mutai wa Côte d’Ivoire, Dominican Republic, ni Ecuador. Mizwale bao ne ba sepisize balumiwa ba banca kuli Tutengo twa Mitai tu sweli twa ba libelela mi tu ka ba tusa ku twaela musebezi wa bona.
Hamulaho, Leonard Pearson ya sebeleza kwa Betele ya United States a buhisana ni mizwale ba balalu ba mwa Katengo ka Mutai wa Democratic Republic of the Congo, Papua New Guinea, ni Uganda. Mizwale bao ne ba tiisize balumiwa kuli ba abane ka ku tala mwa bukombwa. Bosinyalana ba bañwi ba ba li balumiwa ili ba ba sebelize lilimo ze fitelela 21 mwa Congo ba tusize batu ba 60 ku fita fa buineelo ni kolobezo. Bosinyalana bao cwale ba zamaisa lituto za Bibele ze 30, mi ba 22 kwa baituti ba bona ba fumanehanga kwa mikopano ya puteho. Bakeñisa kutulo ya kwa moya ye tuna cwalo, ye ki nako ye nde luli ya ku ba mulumiwa.
Ku Paka ka Moya wa Tukufalelo
Gerrit Lösch wa mwa Sitopa Se Si Etelela n’a file ngambolo ya mafelelezo ye li, “Ku Bulela ka za Mulimu ni ku Paka Jesu mwa Lizazi la Mulena.” N’a bulezi kuli manzwi a kuli “paki,” “lipaki,” ni “bupaki” a fumaheha h’a 19 mwa buka ya Sinulo. Kacwalo, Jehova u bonisize musebezi o ba lukela ku eza batu ba hae. Lu swanela ku kala lili ku fa bupaki b’o? Lu swanela Sinulo 1:9, 10) Lizazi leo ne li kalile ka 1914, li sa zwelapili ni kacenu le, mi li sa ya ni kwapili. Ka ku ya ka Sinulo 14:6, 7, musebezi wa ku bulela ka za Mulimu u petwa ka tuso ya mangeloi. Sinulo 22:17 i bonisa kuli buikalabelo bwa ku okamela musebezi wa ku paka Jesu bu filwe ku ba ba sa siyezi kwa Bakreste ba ba tozizwe. Kono kaufel’a luna lu lukela ku ikungela tohonolo yeo cwale. Mwa timana 20, ku bulezwi kuli Jesu n’a ize: “Ni ta kapili!” Muzwale Lösch n’a susuelize bote ba ne ba li teñi, a li: “Mu meme batu, mu li, ‘Ha mu tahe, mu to nga fela kwa mezi a bupilo.’ Jesu u taha kapili. Kana lu itukisize?”
ku kala mwa “lizazi la Mulena.” (Fred Rusk, ya n’a kile a ba muluti wa kwa sikolo sa Giliadi ka lilimo ze 11, a kwala tukiso ka tapelo ya buitumelo ku Jehova ili ye ne nyangumuzi baputehi kaufela. Ao ne li ona mafelelezo a swanela a lizazi le ne li tabisize hahulu leo.
[Mbokisi fa likepe 13]
LITABA KA ZA SITOPA
Palo ya linaha ko ba zwa baituti: 10
Palo ya linaha ko ba lumezwi: 25
Palo ya baituti: 56
Avareji ya lilimo za ku pepwa: 32.5
Avareji ya lilimo za ku ba mwa niti: 16.4
Avareji ya lilimo za ku ba mwa bukombwa bwa ka nako kaufela: 12.1
[Siswaniso se si fa likepe 15]
Sitopa Sa bu-119 Se Si Feza kwa Sikolo sa Giliadi sa Bibele
Fa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa silyo mwa mulaini o muñwi ni o muñwi.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.