Mangeloi Mwa Amela Bupilo bwa Luna

HA N’A talusa pono ya n’a boni ya lubasi lwa Mulimu lwa mangeloi, mupolofita Daniele n’a ñozi kuli: ‘Ba ba eza bolule ba bolule kwa buñata [mangeloi], ne ba sebeleza Mulimu, mi ba ba eza limilyoni za limilyoni, ne ba yemi fapil’a hae.’ (Daniele 7:10) Timana ye i patulula mulelo wa Mulimu ha n’a bupile mangeloi. Ne li kuli a mu sebeleze ni ku peta litaelo za hae.

Mulimu fokuñwi u itusisanga mangeloi kwa ku peta misebezi ye miñwi ye ama batu. Lu ka nyakisisa mwa itusiseza ona kwa ku tiisa lipilu ni kwa ku sileleza batu ba hae, kwa ku fitisa mashango kwa batu, ni kwa ku fitisa katulo ya hae ku ba ba maswe.

Mangeloi A Tiisanga Lipilu ni ku Sileleza

Ku zwa fela kwa makalelo libupiwa za moya ha ne li boni lifasi ha li bupiwa ni batu ba pili, ne li tabezi hahulu batu. Pili a si ka ba kale mutu wa fa lifasi, Jesu Kreste ya bulezwi sina butali, n’a bulezi kuli: “Ne ni wabelelwa ni bana ba batu.” (Liproverbia 8:31) Hape Bibele i lu taluseza kuli “mangeloi a shukelwa ku . . . ukumela” niti ka za Kreste ni za nako ya kwapili ye patululezwi bapolofita ba Mulimu.—1 Pitrosi 1:11, 12.

Hamulaho wa nako, mangeloi n’a lemuhile kuli batu ba bañata ne ba sa sebelezi Mubupi wa bona ya lilato. Seo luli ne si swabisize mangeloi a sepahala ao! Kono muezalibi a li muñwi h’a baka ni ku kutela ku Jehova, “ku na ni tabo fapil’a mangeloi.” (Luka 15:10) Mangeloi a iyakatitwe hahulu ba ba sebeleza Mulimu, mi Jehova u zwelapili ku itusisa ona kwa ku tiisa lipilu ni ku sileleza batanga ba hae ba ba sepahala ba fa lifasi. (Maheberu 1:14) Ha mu nyakisise mitala ye miñwi.

Mangeloi a mabeli n’a tusize Lota ni bana ba hae ba basizana kuli ba punyuhe sinyeho ya mileneñi ye maswe ya Sodoma ni Gomora ka ku ba zwiseza kwand’a minzi yeo. * (Genese 19:1, 15-26) Hamulaho wa lilimo-limo, mupolofita Daniele niha n’a nepezwi mwa musima wa litau, n’a si ka holofazwa. Libaka? Daniele n’a bulezi kuli: “Mulimu wa ka u lumile lingeloi la hae, mi li tibile milomo ya litau kuli li si ke za ni eza kozi.” (Daniele 6:22)  Mangeloi n’a tusize Jesu kwa makalelo a bukombwa bwa hae bwa fa lifasi-mubu. (Mareka 1:13) Mi pili Jesu a si ka shwa kale, lingeloi ne li tile ku yena mi la “mu tiisa pilu.” (Luka 22:43) Tuso ya lingeloi yeo ku sina kakanyo ne i susuelize hahulu Jesu ka nako ye t’ata yeo ya bupilo bwa hae! Hape lingeloi ne li lukuluzi muapositola Pitrosi mwa tolongo.—Likezo 12:6-11.

Kana mangeloi a lu sileleza kacenu? Haiba lu lapela Jehova ka ku mamela ze mwa Linzwi la hae, lu sepiswa kuli mangeloi a hae a m’ata ili a sa bonahali a ka lu sileleza. Bibele i sepisa kuli: “Lingeloi la [Muñ’a] Bupilo li tibelezi, li beile ba ba mu saba mwahali; mi la ba lamulela.”—Samu 34:7.

Niteñi, lu swanela ku lemuha kuli mangeloi sihulu a sebeleza Mulimu isiñi batu. (Samu 103:20, 21) Mangeloi a peta litaelo za Mulimu isiñi litaelo kamba likupo za batu. Kacwalo ye lu swanela ku kupa tuso ki Jehova Mulimu, isiñi mangeloi. (Mateu 26:53) Bakeñisa kuli ha lu koni ku bona mangeloi, ha lu koni ku ziba mwa itusiseza ona Mulimu kwa ku tusa batu mwa linzila ze ñata. Kono lwa ziba kuli Jehova ‘u tahisa m’ata a hae ku tusa ba ba mu file lipilu za bona, kaufela zona.’ (2 Makolonika 16:9; Samu 91:11) Mi lu na ni sepo ya kuli “ha lu kupa nto ka ku lata kwa hae, [Mulimu] wa lu utwa.”—1 Joani 5:14.

Hape Mañolo a lu taluseza kuli litapelo za luna ni bulapeli bwa luna li swanela ku libiswa fela ku Mulimu. (Exoda 20:3-5; Samu 5:1, 2; Mateu 6:9) Mangeloi a sepahala a lu susueza ku eza cwalo. Sina ka mutala, muapositola Joani ha n’a batile ku kubamela lingeloi, ne li mu bulelezi kuli: “Si ezi cwalo . . . Kubamela Mulimu.”—Sinulo 19:10.

Mangeloi A Fitisanga Mashango a Mulimu

Linzwi le li tolokilwe mwa Bibele kuli ‘lingeloi’ li talusa ‘mulumiwa’ mwa Sigerike ni mwa Siheberu. Kacwalo mangeloi hape a sebeleza Mulimu sina balumiwa ba hae kwa batu. Sina ka mutala, ‘lingeloi Gabriele ne li lumilwe ki Mulimu mwa munzi wa Galilea o bizwa Nazareta.’ Ku yo ezañi? Ku yo taluseza kalibe wa libizo la Maria kuli niha n’a sa li mwalyango, n’a ka ba fa mezi a manca, mi n’a ka pepa mwana wa mushimani, mi n’a ka mu beya libizo la Jesu. (Luka 1:26-31) Hape lingeloi ne li kile la lumwa kwa balisana ba ne ba li mwa naheñi ku yo ba zibisa kuli “Kreste Mulena” u pepilwe. (Luka 2:8-11) Mi hape mangeloi n’a fitisize mashango a Mulimu ku bo Abrahama, Mushe, Jesu, ni ba bañwi ba ba bulezwi mwa Bibele.—Genese 18:1-5, 10; Exoda 3:1, 2; Luka 22:39-43.

Kacenu mangeloi a sebeza cwañi sina balumiwa ba Mulimu? Ha mu nahane za musebezi w’o Jesu n’a taluselize balutiwa ba hae kuli ne ba ka u peta pili mafelelezo a muinelo wa linto a si ka fita kale. N’a bulezi kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:3, 14) Ka silimo, Lipaki za Jehova li tandanga lihora ze fitelela 1 bilioni kwa ku kutaza taba ye nde ya Mubuso wa Mulimu. Kono kana mwa ziba kuli mangeloi ni ona a sweli a tusa kwa ku peta musebezi w’o? Ka za pono ya n’a boni, muapositola Joani n’a bulezi kuli: “Hape  na bona lingeloi le liñwi . . . li sweli evangeli ya linako ze sa feli, ku i bulelela ba ba yahile mwa lifasi, ba masika kamukana, ni mishobo, ni lipuo, ni macaba.” (Sinulo 14:6, 7) Liñolo le li bonisa musebezi o mutuna o a sweli ku peta mangeloi kwa ku tusa batu kacenu.

Lipaki za Jehova ba iponela bupaki bwa kuli mangeloi a sweli a ba tusa ha ba nze ba peta musebezi wa bona wa ku kutaza fa ndu ni ndu. Hañata ba kopananga ni batu ba ne ba sa zo feza ku lapela kuli mutu yo muñwi a ba tuse ku utwisisa milelo ya Mulimu. Bakeñisa ku tusiwa ki mangeloi ni buikatazo bwa Lipaki, batu ba ba eza likiti ze mianda-nda ba fitanga fa ku ziba Jehova silimo ni silimo. Haike mu fumane tuso kwa musebezi o pilisa wo o sweli ku petwa ka tuso ya mangeloi.

Mangeloi A Fitisanga Katulo ya Mulimu

Nihaike kuli mangeloi h’a si ka lumelezwa ku atula batu, h’a iputi fela makata. (Joani 5:22; Maheberu 12:22, 23) Bakeñisa kuli a sebeza sina bafitisi ba katulo ya Mulimu, n’a kile a fitisa katulo ya Mulimu mwa linako za kwamulaho. Sina ka mutala, Mulimu n’a itusisize mangeloi kwa ku lwanisa Maegepita ba kwakale ba ne ba hapile Maisilaele. (Samu 78:49) Mi “Lingeloi la [Muñ’a] Bupilo” ne li bulaile masole ba 185,000 mwa mafulo a lila za batu ba Mulimu mwa busihu bu li buñwi.—2 Malena 19:35.

Kwapili hape, mangeloi a ka fitisa katulo ya Mulimu. Jesu u ka taha “ni mangeloi a m’ata a hae, mwa malimi a mulilo; kuli a nate ka koto ba ba sa zibi Mulimu, ni ba ba sa ipeyi kwatas’a evangeli.” (2 Matesalonika 1:7, 8) Kono katulo yeo i ka tela fela ba ba sa amuheli lushango lo lu sweli ku kutazwa mwa lifasi kaufela ka tuso ya mangeloi. Ba ba bata Mulimu ni ku mamela lituto ze mwa Mañolo ba ka banda katulo yeo.—Zefania 2:3.

Lu swanela ku itebuha hahulu mangeloi a sepahala ao, a sweli ku peta z’a laelwa ki Mulimu! Jehova u itusisa ona kwa ku tusa ni kwa ku sileleza batanga ba hae ba ba sepahala ba fa lifasi. Seo sa lu tiisa pilu luli kakuli ku na ni libupiwa za moya ze bizwa badimona ze bata ku lu holofaza.

Badimona—Ki Bomañi?

Mwahal’a lilimo ze 1,500 ku zwa f’o Satani n’a kwashekezi Eva mwa Edeni, lubasi lwa Mulimu lwa mangeloi ne lu boni kuli Satani Diabulosi n’a konile ku kwenula batu kaufela ku Mulimu kwand’a ba sikai fela ba ne ba sepahalile ba ba cwale ka Abele, Enoke, ni Nuwe. (Genese 3: 1-7; Maheberu 11:4, 5, 7) Mangeloi a mañwi n’a yauluzwi ki Satani. Bibele i biza mangeloi ao kuli ki mioya ye n’e si ka ipeya ku utwa “mwa mazazi a Nuwe.” (1 Pitrosi 3:19, 20) Ku sa ipeya ku utwa kwa ona ne ku bonisizwe cwañi?

Mwa linako za Nuwe, palo ye si ka pundiwa ya mangeloi a bakwenuheli n’a siile litulo za ona mwa lihalimu ni ku taha fa lifasi ku to ipetula batu. Libaka? Ne a bile ni takazo ya ku eza tobali ni basali. Seo ne si tisize kuli ba pepe bana ba ne ba bizwa likwenyepa, ili ba ne ba li mahobohobo a m’ata. Mane ‘bumaswe bwa batu ne li bo butuna mwa lifasi, ni kuli mihupulo kamukana ya lipilu za bona ne li ye maswe fela, ka mazazi kamukana.’ Kono Jehova Mulimu n’a si ka tuhelela bumaswe bwa batu b’o ku zwelapili. N’a tisize Munda o ne u ambekile lifasi kaufela, ni ku yundisa batu ba ba maswe kaufela homohocwalo ni likwenyepa. Batu ba ne ba pilisizwe fela ne li batanga ba Mulimu ba ne ba sepahala.—Genese 6:1-7, 17; 7:23.

Mangeloi a baipanguli n’a bandukile sinyeho ka nako ya Munda. N’a tubuzi mibili ya ona ya nama ni ku kutela kwa lihalimu sina libupiwa za moya. Hamulaho wa f’o, n’a bizizwe kuli ki badimona. A swalisana ni Satani Diabulosi, yena ya bizwa “mulena wa mioya ye maswe.” (Mateu 12:24-27) Ka ku swana ni mulen’a bona, badimona ba bata kuli batu ba ba lapele.

Badimona ba maswe, kono ha lu swaneli ku ba saba. M’ata a bona ki a makutelakaufi. Mangeloi a baipanguli h’a na kutezi kwa lihalimu, n’a si ka lumelezwa ku ba mwahal’a lubasi lwa Mulimu lwa mangeloi a sepahala. Kono n’a kaulezwi ku sa bona kanya ya Mulimu, ni ku sa ba ni sepo ya kwapili. Kaniti, n’a beilwe mwa muiinelo wa lififi la kwa moya o bizwa Tartarus. (2 Pitrosi 2:4) Jehova n’a a ‘tamile mwa lififi ku ya ku ile,’ kuli a be mwa lififi la kwa moya. Mi mane h’a sa kona ku ipetula hape.—Juda 6.

Mu Swanela Ku Ezañi?

Kana badimona ba sa kona ku yaulula batu? Ba kona ku eza cwalo ka ku itusisa “makilikicani a maswe,” a swana ni a mulen’a bona, Satani Diabulosi. (Baefese 6:11, 12, Bibele ye Kenile, Hatiso ya 1984) Kono lwa kona ku hanyeza badimona ka ku tiya haiba lu mamela kelezo ye mwa Linzwi la Mulimu. Mane batu ba ba lata Mulimu ba silelezwa ki mangeloi a m’ata.

Kacwalo ki kwa butokwa kuli mu itute zeo Mulimu a tokwa sina mo li boniselizwe mwa Mañolo ni ku mamela ze mu ituta! Mwa kona ku ituta ze ñata ka za Bibele ka ku atumela Lipaki za Jehova ba ba mwa silalanda sa mina kamba ku ñolela kwa bahatisi ba magazini ye. Lipaki za Jehova ba ka tabela ku ituta Bibele ni mina ku si na tifo ka nako ye mu bata.

[Litaluso za kwatasi]

[Mbokisi fa likepe 6]

MISEBEZI YA MANGELOI

Jehova u na ni lubasi lo lutuna lwa mangeloi lo lu peta misebezi sina cwana:

Lingeloi le li m’ata hahulu ni le li na ni m’ata a tamaiso ki Mikaele yena nduna ya mangeloi, kamba Jesu Kreste. (1 Matesalonika 4:16; Juda 9) Liserafimi, likerubimi, ni mangeloi a mañwi a mwatas’a hae.

Liserafimi li na ni buikalabelo bo butuna mwa tukiso ya Mulimu. Li sebeza sina bababaleli ba lubona lwa Mulimu. Musebezi wa zona u kopanyeleza ku shaela bukeni bwa Mulimu ni ku kenisa batu ba hae kwa moya.—Isaya 6:1-3, 6, 7.

Likerubimi li sebeleza kwa lubona lwa Mulimu ni ku bubanisa bubusi bwa Jehova.—Samu 80:1; 99:1; Ezekiele 10:1, 2.

Mangeloi a mañwi ona ki bayemeli ba Jehova, mi a peta tato ya hae.

[Siswaniso se si fa likepe 4]

Mangeloi n’a matiselize Lota ni bana ba hae ba basizana kwa sibaka sa silelezo

[Siswaniso se si fa likepe 5]

Muapositola Joani ha n’a batile ku lapela lingeloi, ne li mu bulelezi kuli: “Si ezi cwalo!”

[Siswaniso se si fa likepe 6]

Mangeloi a fitisanga katulo ya Mulimu

[Siswaniso se si fa likepe 7]

Kana mwa fumana tuso kwa musebezi wa ku kutaza o sweli ku petiwa ka tuso ya mangeloi?