Kana Mu Swana Sina Kota ya Lagani Auna?

MWA munzi o kwa mafelelezo a likamba la Port Moresby mwa Papua New Guinea, likombwa ze peli ne li kuta kwahae ku zwa mwa musebezi wa ku kutaza. Ha ne ba nze ba zamaya, ba bona kota ye buheha. Munna-muhulu a li: “Ha, ki lagani auna!” A sikuluhela ku mutangana mi a zwelapili a li: “Libizo leo li talusa kuli ‘kota ya ka silimo.’ Ka ku fapahana ni likota ze ñata za mwa libaka ze cisa hahulu, silimo ni silimo matali a kota yeo a felanga ku wa mi i bonahalanga inge ye shwile. Kono muta pula i kala ku nela, ya butuluhanga, ku tubula mapalisa, ni ku buheha sina sapili.”

Lu kona ku ituta nto ye ñwi kwa lagani auna. Bocaziba ba li ki ye ñwi ya likota ze ketalizoho ze tubula mapalisa a mande ka ku fitisisa mwa lifasi. Nihaike mapalisa ni matali a yona a felanga ku wa mwa nako ya mbumbi, kota yeo i bulukanga mezi a mañata. Mibisi ya yona i tomile ka ku tiya mi i kona ku hula ku yo tateza macwe a kwatasi-tasi mwa mubu. Ka nzila yeo, i isileleza kwa mañungwa a matuna. Ka bukuswani, lu kana lwa li i tiyelanga miinelo ye t’ata.

Lu kana lwa ipumana mwa miinelo ye lika tumelo ya luna. Ki nto mañi ye ka lu tusa ku tiyela litiko? Sina kota ya lagani auna, lwa kona ku nwa ni ku buluka mezi a bupilo a mwa Linzwi la Mulimu. Hape lu swanela ku kumalela ka t’ata kwa ‘licwe la luna’ yena Jehova hamoho cwalo ni kwa kopano ya hae. (2 Samuele 22:3) Kaniti, kota ya lagani auna ki mutala o munde wa kuli niha lu li mwa muinelo o t’ata, lwa kona ku zwelapili ku tiya ni ku buheha kwa moya haiba lu itusisa hande lika zeo Jehova a lu fa. Ka ku eza cwalo, lu ka “yola lisepiso” za file, ku beya cwalo ni sepiso ya bupilo bo bu sa feli.—Maheberu 6:12; Sinulo 21:4.