Lipuzo Ze Zwa kwa Babali
Lipuzo Ze Zwa kwa Babali
Kana Josefa, mutang’a Jehova ya sepahala, n’a itusisize sinwiso se si ipitezi sa silivera kwa ku laula, sina mo ku kana kwa bonahalela kwa Genese 44:5?
Ha ku na bupaki bo bu bonisa luli kuli Josefa n’a itusisize mufuta o muñwi wa bulauli.
Bibele i patulula mubonelo luli wa Josefa ka za ku itusisa mabibo mwa ku ziba za kwapili. Sapili, ha n’a kupilwe ku sinula litolo za Faro, Josefa n’a kuta-kutezi ku bulela kuli ki Mulimu fela ya kona ku fa “kalabo” ya ze ka ezahala kwapili. Kabakaleo, Faro ka sibili n’a lumezi kuli Mulimu ya n’a lapela Josefa, yena Mulimu wa niti, isi m’ata a sidimona, ki yena ya n’a konisize Josefa ku ziba ka ku tala za kwapili. (Genese 41:16, 25, 28, 32, 39) Mwa Mulao o no filwe ku Mushe hasamulaho, Jehova n’a hanisize ku itusisa mabibo kamba ku laula, ili ku paka kuli ki Yena a nosi musinuli wa za kwapili.—Deuteronoma 18:10-12.
Ki kabakalañi he Josefa ka mutang’a hae ha n’a bonisize kuli n’a itusisize sinwiso sa silivera ‘ku laula ka sona’? * (Genese 44:5) Lu tokwa ku nyakisisa mo ne ku inezi ka nako ya n’a bulelwa manzwi ao.
Bakeñisa kuli lukupwe ne lu li lo lutuna mwa naha, bahulwani ba Josefa ne ba tamile musipili wa ku ya kwa Egepita ku yo leka lico. Lilimo-limo kwamulaho, bona bahulwani ba hae ba ba swana bao ne ba lekisize Josefa mwa butanga. Cwale ka ku sa mu ziba, ne ba kupile tuso ku munyan’a bona tota, ya na s’a bile muzamaisi wa lico mwa Egepita. Josefa n’a si ka itibahaza ku bona. Kono a ba lika. Ka swanelo, Josefa n’a bata ku ziba haiba ne ba bakile luli. Hape n’a bata ku ziba haiba ne ba lata hahulu munyan’a bona Benjamine, ni ndat’a bona Jakobo, ya n’a olisa hahulu Benjamine. Kacwalo, Josefa a itusisa mano.—Genese 41:55–44:3.
Josefa a laela sikombwa sa ndu ya hae ku taza masaka a bona ka buloto, ku kutiseza mali a yo muñwi ni yo muñwi mwa mulomo wa saka ya hae, ni ku kenya sinwiso sa Josefa sa silivera mwa mulomo wa saka ya Benjamine. Mwa taba yeo kaufela, Josefa n’a ba puma inge kuli ki muzamaisi wa mwa naha ya sihedeni. Ka likezo ni ka puo ya n’a ambola, n’a ikezize luli inge muzamaisi wa mwa naha ya sihedeni kwa bana bahabo yena ba ne ba sa zibi se siñwi.
Josefa ha n’a bonani ni bona, a zwelapili ni mano a hae, a ba buza kuli: “Kanti ha mu zibi kuli sina na, ni mutu ya ziba ku laula?” (Genese 44:15) Kacwalo, kwa bonahala hande kuli sinwiso seo ne li mano fela. Josefa n’a si ka laula ka sinwiso sina yena Benjamine ha n’a si ka uzwa sinwiso seo.
[Litaluso za kwatasi]
^ para. 5 The Holy Bible, With an Explanatory and Critical Commentary, ye ñozwi ki F. C. Cook, ha i ama ku za ku laula mwa miteñi ya kwamulaho i talusa kuli: “Ne ku eziwa ka ku nepela gauda, silivera, kamba daimani mwa mezi, mi hasamulaho ni ku tatuba ponahalo ya zona; kamba ka ku talima fela mwa mezi sina mwa siiponi.” Caziba wa Bibele Christopher Wordsworth u li: “Fokuñwi sinwiso ne si tazwa ka mezi, mi kalabo ne i fiwa ka ku itinga fa ponahalo ye tiswa ki lizazi ha li nata fa mezi a’ mwa sinwiso.”