Kana Lwa Tokwa Mesiya?

NE MU kana mwa ipuza puzo yeo, ya kuli “Kana lwa tokwa Mesiya?” Kwa swanela luli ha ne mu ka ipuza haiba Mesiya n’a kabe a mi ezelize nto ye ñwi.

Mubonelo wa ba bañwi o mu kana mwa amuhela u kona ku mi kolwisa kuli kalabo ki ye bunolo ni ye sa kakanyehi ya kuli: Mwa mu tokwa luli Mesiya, sina fela mo ba mu tokwela batu kaufela. Mwa linako za baapositola, caziba wa mulao wa Sijuda n’a ñozi cwana ka za Mesiya: “Lisepiso za Mulimu kaufel’a zona ki E ku Yena.” Ka manzwi ao n’a koñomekile butokwa bwa musebezi wa peta Mesiya mwa tukiso ya Mubupi ya ku fuyola macaba kaufela a lifasi. (2 Makorinte 1:20) Musebezi wa Mesiya ki wa butokwa hahulu kuli mane bupolofita bwa Bibele bu kanatela fa ku taha kwa hae ni bupilo bwa hae. Mwa buka ye se i itusisizwe ki bolule-lule ka lilimo ze 70 ze felile, Henry H. Halley n’a ñozi kuli: “Testamente ya Kale ne i ñolezwi ku tahisa tibelelo kwa batu ya ku Taha kwa [Mesiya].” Kono kana ku taha kwa hae kwa swanela? Ki kabakalañi ha mu swanela ku iyakatwa kona?

Se li talusa luli linzwi la “Mesiya” kikuli “Ya Tozizwe” mi li na ni taluso ye swana ni ya libizo le li zibahala hahulu la “Kreste.” Yena Mesiya y’o ili ya bulezwi mwa Encyclopædia Britannica, hatiso ya 1970, kuli ki “muliululi yo mutuna,” n’a na ni ku taha bakeñisa bumaswe bwa batu ba pili, bo Adama ni Eva. Ne ba bupilwe ka ku petahala, inze ba na ni tibelelo ye nde ya bupilo bo bu sa feli mwa Paradaisi, kono ba latehelwa ki tibelelo yeo. Lingeloi la muipanguli, lona le ne li fetuhile Satani Diabulosi, ne li akalelize kuli Mubupi wa bona n’a ba imeza hahulu ka tulao-lao mi ni kuli ne ba ka kondisa ha ne ba ka iketela se sinde ni se si maswe.—Genese 3:1-5.

Eva n’a pumilwe mi a lumela buhata b’o. Ka mo ku bonahalela, Adama ka ku nga linyalo la hae ku ba la butokwa ku fita busepahali ku Mulimu, n’a abanile mwa bukwenuheli bo, bo ne bu kalisizwe ki Diabulosi. (Genese 3:6; 1 Timotea 2:14) Ka likezo za bona, ne ba si ka latehelwa fela ki tibelelo ya bona ya bupilo bo bu sa feli mwa paradaisi. Kono mane ne ba hozisize bana ba bona ba ne ba si ka pepiwa kale sibi ni ze tahiswa ki sona, lona lifu.—Maroma 5:12.

Kapili-pili, Jehova Mubupi wa luna a lukisa nzila ya ku feza ka yona bumaswe bo ne bu tahisizwe ki likezo za bukwenuheli b’o. N’a ka feza bumaswe ka ku itusisa sikuka sa ka mulao se ne si ka ba mutomo wa Mulao wa Mushe, sona sa kuli bupilo bu lifiwe ka bupilo. (Deuteronoma 19:21; 1 Joani 3:8) Sona sikuka sa ka mulao seo, ne si na ni ku sebeza kuli bana ba Adama ni Eva ba ba maibile ba fiwe  bupilo bo bu sa feli mwa paradaisi fa lifasi-mubu, sina mwa n’a lelezi Mubupi. Seo si lu isa ku Mesiya.

Jehova Mulimu ha n’a fa Diabulosi koto, n’a talusize cwana mwa bupolofita bwa pili bwa Bibele: “Ni ka beya toyano mwahal’a mina, ni wena ni musali, ni mwahal’a peu ya hao ni peu ya musali; peu yeo i ka ku pyata toho, wena u i lume fa lisito.” (Genese 3:15) Caziba yo muñwi wa Bibele n’a bulezi kuli “lisepiso ze ama Mesiya sina Mañolo mw’a boniseza li kala ka [ona] manzwi ao.” Caziba yo muñwi hape n’a ize kuli Mesiya ki siitusiso sa Mulimu se “si ka feza kozi ye tahisizwe ki sibi,” ni ku tahiseza batu limbuyoti.—Maheberu 2:14, 15.

Nihakulicwalo, mwa kona ku itemuhela kuli batu kacenu ni hanyinyani ha ba si ka fuyaulwa. Mane batu ba zwafile hahulu ni kutokwa sepo. Ki kabakaleo, The World Book Encyclopedia i talusa kuli “buñata bwa Majuda ba sa libelela ku taha kwa Mesiya” ni kuli a “to tatulula mafosisa ni ku tula lila za batu.” Kono Bibele i bonisa kuli Mesiya u tile kale. Kana ku na ni libaka la ku lumela seo Bibele i si bulela? Taba ye tatama i ka bonisa libaka.