Tamaiso Ya Mulimu ya ku Taleleza Mulelo wa Hae

‘Mulimu u sebeza linto kamukana ka muhupulo wa tato ya hae.’ —Maefese 1:11.

1. Ki kabakalañi liputeho kaufela za Lipaki za Jehova ha li ka kopana la 12 April, 2006?

LA BULALU manzibwana, ili la 12 April, 2006, batu ba ba bat’o eza 16 milioni ba ka kopana kuli ba hupule Mulalelo wa Mulena. Mwa libaka kaufela ze ba ka kopanela, ku ka ba ni tafule fo ku ka beiwa sinkwa se si si ka ya mumela se si yemela mubili wa Kreste, ni veine ye fubelu ye yemela mali a hae a n’a suluzwi. Ibat’o ba kwa mafelelezo a ngambolo ye ka talusa Kupuzo ya lifu la Jesu, ku ka fitiswa liswanisezo ku ba ba ka fumaneha kaufela; ku ka fitiswa pili sinkwa, mi hamulaho kona ku ka fitiswa veine. Mwa liputeho li sikai za Lipaki za Jehova, ki mutu a li muñwi fela kamba ba sikai ba ba ka ca ni ku nwa liswanisezo zeo. Kono mwa liputeho ze ñata, ha ku na ya ka ca ku ba ba ka fumaneha. Ki kabakalañi ha ku canga fela Bakreste ba sikai, bona ba ba na ni sepo ya ku pila kwa lihalimu, hailif’o buñata bwa batu ba ba na ni sepo ya ku pila ku ya ku ile fa lifasi bona ha ba cangi?

2, 3. (a) Jehova n’a bupile cwañi lika ka ku ya ka mulelo wa hae? (b) Mulelo wa Jehova wa ku bupa lifasi ni batu ne li ufi?

² Jehova ki Mulimu wa milelo. Kuli a taleleze mulelo wa hae, u “sebeza linto kamukana ka muhupulo wa tato ya hae.” (Maefese 1:11) N’a kalile ku bupa Mwan’a hae wa libanda. (Joani 1:1, 14; Sinulo 3:14) Ku tuha f’o, ka ku itusisa Mwan’a hae, Jehova n’a bupile lubasi lwa kwa moya mi hasamulaho kona a bupa pupo ye lu iponela, ku beya cwalo ni lifasi ni batu mwateñi.—Jobo 38:4, 7; Samu 103:19-21; Joani 1:2, 3; Makolose 1:15, 16.

³ Jehova n’a si ka bupa lifasi kuli i be sibaka sa ku likela batu ku bona haiba ba kona ku ba bana ba hae ba ba ka yo pila kwa lihalimu, sina mo li lutela likeleke ze ñata za Krestendomu. N’a li bupile ka mulelo o sa cinci, wa kuli “li yahiwe.” (Isaya 45:18) Mulimu n’a bupile lifasi kuli batu ba pile ku lona. (Samu 115:16) Mulelo wa hae ne li wa kuli lifasi kaufela li be paradaisi ye yahilwe ki batu ba ba lukile, ili ba ne ba ka li lima ni ku li babalela. Bosinyalana ba pili ni kamuta ne ba sina sepo ya kuli hamulaho a nako ne ba ka be ba ile kwa lihalimu.—Genese 1:26-28; 2:7, 8, 15.

Mulelo wa Jehova Wa Lwaniswa

4. Mubusezo wa Jehova ne u lwanisizwe cwañi isali kwa makalelo?

⁴ Yo muñwi wa bana ba Mulimu ba kwa moya n’a ipanguzi mi n’a lelile ku palelwisa mulelo wa Jehova ka ku itusisa maswe mpo ya n’a filwe ki Mulimu ya m’ata a ku ikatulela ku eza lika. N’a lyanganisize kozo ye ne ba ikola libupiwa kaufela ze ne ipeya kwatas’a bubusi bwa Jehova ka ku lata. Satani n’a shongile batu  ba pili kuli ba ipangule ku Mulimu. (Genese 3:1-6) N’a si ka hana kuli Jehova u na ni m’ata, kono sa n’a lwanisize ne li mubusezo wa Hae, mi ka ku eza cwalo n’a lwanisa tukelo ya Mulimu ya ku busa. Kona mo ne i kaliselize kañi ye tuna ya bubusi bwa Jehova fa lifasi-mubu isali kwa makalelo.

5. Ki kañi mañi ya bubeli ye ne i zusizwe, mi ki busepahali bwa bomañi bo ne bu lwanisizwe?

⁵ Mwa miteñi ya Jobo, Satani n’a zusize kañi ya bubeli ye swana ni kañi ya tukelo ya Jehova ya ku busa. Satani n’a hononile libaka libupiwa za Jehova ha li ipeya ku mu utwa ni ku mu sebeleza. Satani n’a bonisize kuli batu ne ba ipeya ku utwa Mulimu ni ku mu sebeleza ka buitati, ni kuli ha ne ba ka likwa ne ba ka mu fulalela. (Jobo 1:7-11; 2:4, 5) Nihaike kuli kañi yeo ne i ama mutang’a Jehova wa fa lifasi, hape ne i kopanyelelize ni bana ba Mulimu ba kwa moya, ku beya cwalo ni yena Mwan’a Jehova wa libanda.

6. Jehova n’a bonisize cwañi kuli wa sepahala kwa mulelo wa hae ni kwa libizo la hae?

⁶ Kuli a bonise kuli wa sepahala kwa mulelo wa hae ni taluso ya libizo la hae, Jehova n’a i tahisise ku ba Mupolofita ni Mupulusi. * N’a bulelezi Satani kuli: “Ni ka beya toyano mwahal’a mina, ni wena ni musali, ni mwahal’a peu ya hao ni peu ya musali; peu yeo i ka ku pyata toho, wena u i lume fa lisito.” (Genese 3:15) Ka ku itusisa Peu ya “musali,” kamba kalulo ya kwa lihalimu ya kopano ya hae, Jehova n’a ka tatulula kañi ya Satani ni ku fa bana ba Adama sepo ya tukuluho ni ya ku ba ni bupilo.—Maroma 5:21; Magalata 4:26, 31.

“S’a N’a Patile sa Tato ya Hae”

7. Ki mulelo mañi wa n’a patuluzi Jehova ka muapositola Paulusi?

⁷ Mwa liñolo la n’a ñolezi Bakreste ba kwa Efese, muapositola Paulusi u talusa hande-nde ka m’o Jehova a zamaiseza lika kuli a taleleze mulelo wa hae. Paulusi n’a ñozi kuli: “U lu zibisize s’a n’a patile sa tato ya hae, s’a n’a lelile pili, ka ku lata kwa hae; kikuli, [ku be ni tamaiso, NW] linako z’a n’a tomile ha li se li petahalile, a kubukanyeze linto kamukana ku Kreste, ni za kwa lihalimu ni za mwa lifasi.” (Maefese 1:9, 10) Mulelo wa Jehova o tabisa ki wa ku tahisa pupo ye swalisani ye yahilwe ki libupiwa ze ipeya kwatas’a bubusi bwa hae ka ku lata. (Sinulo 4:11) Ka ku eza cwalo, libizo la hae ne li ka keniswa, Satani n’a ka bonahala ku ba lihata, mi se si latwa ki Mulimu ne si ka ezwa “mwa lifasi, mo si ezezwa kwa lihalimu.”—Mateu 6:10.

8. Linzwi le li tolokilwe kuli ‘tamaiso’ li talusañi?

⁸ “Ku lata” kwa Jehova, kamba mulelo wa hae ne u ka talelezwa ka ku itusisa ‘tamaiso.’ Paulusi n’a itusisize linzwi le li talusa  “tamaiso ya mwa lapa.” Linzwi leo ha li talusi mubuso, inge cwalo Mubuso wa Mesiya, kono li talusa nzila ya ku zamaisa lika ka yona. * Nzila ye nde yeo Jehova n’a ka zamaisa lika ka yona kuli a taleleze mulelo wa hae ne i kopanyeleza “kunutu” ye ne i ka patululwa hanyinyani-hanyinyani.—Maefese 1:10; 3:9, litaluso za kwa tasi za mwa Bibele ya New World Translation.

9. Jehova n’a patuluzi cwañi kunutu ya tato ya hae hanyinyani-hanyinyani?

⁹ Ka ku itama bulikani ni batu ba ba shutana-shutana, Jehova n’a kalile ku patulula hanyinyani-hanyinyani mo ne u ka talelelezwa mulelo wa hae ka za Peu ye ne i sepisizwe mwa Edeni. Bulikani bwa n’a itamile ni Abrahama ne bu patuluzi kuli Peu ye ne i sepisizwe ne i ka pepwa mwa lusika lwa Abrahama mi ka yona peu yeo, “macaba kamukana a lifasi” n’a ka fiwa mbuyoti. Bulikani b’o hape ne bu bonisize kuli ba bañwi ne ba ka swalisana ni kalulo ya pili ya peu yeo. (Genese 22:17, 18) Bulikani bwa Mulao bwa n’a itamile Jehova ni Isilaele ne bu patuluzi mulelo wa hae wa ku ba ni “mubuso wa baprisita.” (Exoda 19:5, 6) Bulikani bwa n’a itamile ni Davida ne bu bonisize kuli Peu n’a ka ba Mulena wa Mubuso ku ya ku ile. (2 Samuele 7:12, 13; Samu 89:3, 4) Bulikani bwa Mulao ha ne bu isize Majuda ku Mesiya, Jehova n’a patuluzi likalulo ze ñwi za ku talelezwa kwa mulelo wa hae. (Magalata 3:19, 24) Batu ba ne ba ka swalisana ni kalulo ya peu ya pili ne ba ka ba “mubuso wa baprisita” mi ne ba ka kenywa mwa “bulikani bo bunca” ka ku ba “Isilaele” yo munca, yena  Isilaele wa kwa moya.—Jeremia 31:31-34; Maheberu 8:7-9. *

10, 11. (a) Jehova n’a patuluzi cwañi Peu ye ne i sepisizwe? (b) Ki kabakalañi Mwan’a Mulimu wa libanda ha n’a tile fa lifasi?

¹⁰ Ka ku ya ka tamaiso ya mulelo wa Mulimu, nako ya fita ya kuli Peu ye sepisizwe i tahe fa lifasi. Jehova n’a lumile lingeloi Gabriele ku to bulelela Maria kuli n’a ka pepa mwana wa mushimani ya n’a ka bizwa Jesu. Lingeloi ne li mu bulelezi kuli: “Yena u ka ba yo mutuna, a bizwe Mwana wa Muambakani-ya-Pahami, mi Mulena u ka mu fa situlo sa bulena sa Davida, ndat’ahe. U ka busa ba ndu ya Jakobo ku ya ku ile; mi bulena bwa hae ha bu na ku fela.” (Luka 1:32, 33) Kacwalo Peu ye ne i sepisizwe ne i fitile fa ku zibwa hande.—Magalata 3:16; 4:4.

¹¹ Mwan’a Jehova wa libanda n’a na ni ku taha fa lifasi kuli a t’o likwa ku isa lifu. Kalabo ye nepahezi kwa kañi ya Satani ne i ka itinga fa bupilo bwa Jesu. Kana n’a ka zwelapili ku sepahala ku Ndat’ahe? Taba yeo ne li kunutu. Muapositola Paulusi hamulaho n’a talusize kalulo ya peta Jesu, ha n’a ize: “Kunutu ya bulapeli ki ye tuna: Yena ya bonahezi mwa nama, u ezizwe ya lukile ka Moya, u bonwi ki mangeloi, u bulezwi kwa macaba, u lumezwi mwa lifasi, u kambamiselizwe kwa kanya.” (1 Timotea 3:16) Ka ku tundamena ku sepahala ku isa lifu, Jesu n’a file kalabo ye nepahezi kwa kañi ya n’a zusize Satani. Kono likalulo ze ñwi za kunutu yeo ne li si ka patululwa kale.

‘Kunutu ya Mubuso wa Mulimu’

12, 13. (a) Ki ifi kalulo ye ñwi ya ‘kunutu ya mubuso wa Mulimu’? (b) Ki lifi za n’a ezize Jehova ha n’a keta palonyana ya batu kuli ba ye kwa lihalimu?

¹² Muta o muñwi Jesu ha n’a iz’o kutaleza kwa Galilea, n’a bonisize kuli kunutu ne i zamaelela ni mulonga wa hae wa Mubuso wa Bumesiya. N’a bulelezi balutiwa ba hae kuli: “Kabakala kuli mina mu filwe ku ziba likunutu za mubuso wa kwa lihalimu [“mubuso wa Mulimu,” Mareka 4:11].” (Mateu 13:11) Kalulo ye ñwi ya kunutu yeo ne li ya ku keta “mutapinyana” wa batu b’a 144,000 ba ne ba ka yo swalisana ni Mwan’a hae ka ku ba kalulo ya peu, ili ku busa ni yena kwa lihalimu.—Luka 12:32; Sinulo 14:1, 4.

¹³ Bakeñisa kuli batu ne ba bupilwe kuli ba pile fa lifasi, ne ku tokwahala kuli ba bañwi ba ‘bupiwe sinca’ ki Jehova ilikuli ba ye kwa lihalimu. (2 Makorinte 5:17) Pitrosi, ka ku ba sina yo muñwi wa ba banyinyani ba ne ba na ni sepo ya ku ya kwa lihalimu, n’a ñozi kuli: “Ku lumbwe Mulimu, Ndat’ahe Mulen’a luna Jesu Kreste, kakuli mwa butuna bwa sishemo sa hae u lu pepile la bubeli, kuli ka ku zuha kwa Mulena kwa bafu, lu be ni sepo ye pilisa; mi lu fiwe sanda sa bufumu bo bu sa boli, bo bu sa nyazahali, bo bu sa undi, bo bu bulukezwi mina kwa lihalimu.”—1 Pitrosi 1:3, 4.

14. (a) Batu be si Majuda ne ba kenyizwe cwañi mwa ‘kunutu ya mubuso wa Mulimu’? (b) Lu koniswa ki nto mañi ku utwisisa lika “ze tungile za Mulimu” zeo?

¹⁴ Kalulo ye ñwi ya kunutu ye ama mulonga wa Mubuso wa kwapili ne li tato ya Mulimu ya ku kopanyeleza ni batu be si Majuda mwa palonyana ya ba ne ba ka bizezwa ku yo busa ni Kreste kwa lihalimu. Paulusi n’a talusize kalulo yeo ya ‘tamaiso’ ya Jehova, kamba nzila ya ku taleleza ka yona mulelo wa hae, ha n’a ize: “Ili [kunutu] ye ne si ka zibiswa bana ba batu ba masika a kale, sina ha i sa zw’o patululelwa baapositola ba ba kenile, ni bapolofita ba Kreste, ka Moya. Kunutu yeo, kikuli: Bamacaba ki ba ba yola sanda hamoho ni bana ba Isilaele, ku ba mubili u li muñwi ni bona; ba abezwi hamoho ni bona kwa sepiso ye li ku Jesu Kreste ka Evangeli.” (Maefese 3:5, 6) Kutwisiso ya yona kalulo ya kunutu yeo ne i patululezwi “baapositola ba ba kenile.” Kambesi ku tusiwa ki moya o kenile, ni luna kacenu ne lu si ke lwa utwisisa lika “ze tungile za Mulimu” zeo.—1 Makorinte 2:10; 4:1; Makolose 1:26, 27.

15, 16. Ki kabakalañi Jehova ha n’a ketile ba ba ka yo busa ni Kreste mwahal’a batu?

 ¹⁵ “Ba ba eza 144,000” ba ne ba bonwi inge ba yemi ni “Ngunyana” fa Lilundu la Sione la kwa lihalimu ba bulezwi kuli ba “liuluzwi mwa lifasi,” “ba liuluzwi mwahal’a batu, kuli ba be mitamuno ku Mulimu ni ku Ngunyana,” yena Kreste Jesu. (Sinulo 14:1-4) Jehova n’a ketile mweli wa bana ba hae ba kwa lihalimu kuli a be kalulo ya pili ya peu ye ne i sepisizwe mwa Edeni, kono ki kabakalañi ha n’a ketile ba ba ka yo busa ni Kreste mwahal’a batu? Muapositola Paulusi u talusa kuli palonyana yeo ne i “bizizwe ka mulelo wa hae,” ili “ka ku lata kwa hae.”—Maroma 8:17, 28-30; Maefese 1:5, 11; 2 Timotea 1:9.

¹⁶ Jehova u lelile ku kenisa libizo la hae le lituna ni le li kenile ni ku bubanisa bubusi bwa hae bwa pupo kamukana. Ka ‘tamaiso’ ya hae, kamba nzila ya zamaisa lika ka yona ye sa koni ku bapanywa, Jehova n’a lumile Mwan’a hae wa mweli fa lifasi, ili fa n’a likezwi ku isa lifu. Mi hape Jehova n’a lelile kuli mulonga wa Mubuso wa Bumesiya wa Mwan’a hae u be ni batu ba ba sepahalile kwa bubusi bwa Hae ku isa lifu.—Maefese 1:8-12; Sinulo 2:10, 11.

17. Ki kabakalañi ha lu kona ku tabiswa ka ku ziba kuli Kreste ni ba ka busa ni bona ba kile ba pila sina batu?

¹⁷ Jehova n’a bonisize lilato la hae le lituna kwa bana ba Adama ka ku luma Mwan’a hae fa lifasi ni ka ku keta ba bañwi mwahal’a batu ba ne ba ka yo busa hamoho ni Mwan’a hae mwa Mubuso wa kwa lihalimu. Ku eza cwalo ne ku ka tusa cwañi batu ba bañwi ba ba sepahalile ku Jehova, ku kala ka Abele ku ya cwalo kwapili? Bakeñisa kuli batu ba ba si ka petahala ba pepilwe ba li batanga ba sibi ni lifu, ne ba ka tokwa ku foliswa kwa moya ni kwa mubili ni ku ezwa ba ba petehile ku likana ni mulelo wa Jehova wa makalelo ka za batu. (Maroma 5:12) Kaufela ba ba libelezi bupilo bo bu sa feli fa lifasi ba tiiswa hahulu pilu ka ku ziba kuli Mulen’a bona u ka ba lata ni ku ba utwisisa ka sishemo sina mwa n’a ezelize balutiwa ba hae ka nako ya bukombwa bwa hae bwa fa lifasi-mubu! (Mateu 11:28, 29; Maheberu 2:17, 18; 4:15; 7:25, 26) Mi ba wiswa lipilu ka ku ziba kuli ba ba ka busa ni Kreste ni ku ba baprisita kwa lihalimu ki banna ni basali ba ba sepahala ba ba kile ba kopana ni mifokolo ni matata a bupilo a swana ni e lu kopana ni ona!—Maroma 7:21-25.

Mulelo wa Jehova O Sa Pali

18, 19. Ki kabakalañi ha lu kona ku utwisisa hande manzwi a Paulusi a kwa Maefese 1:8-11, mi ki lika mañi ze lu ka nyakisisa mwa taba ye tatama?

¹⁸ Se lu kona cwale ku utwisisa hande taluso ya manzwi a Paulusi a n’a ñolezi Bakreste ba ba tozizwe, a kwa Maefese 1:8-11. N’a bulezi kuli Jehova n’a ba zibisize “s’a n’a patile sa tato ya hae,” ni kuli ne ba “ezizwe ba ba ka yola sanda” ni Kreste, mi ni kuli ne ba “lelilwe pili, ka mulelo wa hae Yena ya sebeza linto kamukana ka muhupulo wa tato ya hae.” Se lu utwisisa kuli kwa swanela ku ba cwalo mwa ‘tamaiso’ ye makaza ya lika ya Jehova ya ku taleleza mulelo wa hae. Mi hape seo si lu tusa ku utwisisa libaka ha ku banga ni Bakreste ba banyinyani fela ku ba ba fumanehanga fa Mulalelo wa Mulena ba ba canga ni ku nwa liswanisezo.

¹⁹ Mwa taba ye tatama, lu ka nyakisisa ze i talusa Kupuzo ya lifu la Kreste kwa Bakreste ba ba na ni sepo ya ku ya kwa lihalimu. Mi hape lu ka ituta libaka bolule-lule batu ba ba na ni sepo ya ku pila ku ya ku ile fa lifasi-mubu ha ba swanela ku bata ku ziba taluso ya Kupuzo.

[Litaluso za kwatasi]

Lundululo

• Ki kabakalañi Jehova ha n’a bupile lifasi ni ku beya batu ku lona?

• Ki kabakalañi Mwan’a Jehova wa libanda ha n’a swanela ku to likiwa fa lifasi?

• Ki kabakalañi Jehova ha n’a ketile ba ba ka yo busa ni Kreste mwahal’a batu?

[Lipuzo za Tuto]