Jehova u babalela ba ba ikokobeza

BUIKOKOBEZO ki bwa butokwa hahulu ku Jehova. Nihaike kuli Mulimu ha si ka cela batu sikoloti, u itukiselize ku bonisa sishemo sa hae kwa batu ba ba ikokobeza ku yena. Batu ba ba cwalo ba bonisa kuli ha ba isepi kamba ku itumbaeta, kono ba sepile Jehova mi ba bata ku eza tato ya hae. Kona libaka Jakobo muñoli wa Sikreste ya n’a susumelizwe ki moya wa Mulimu ha n’a bulezi kuli: “Mulimu u hanela ba ba ikuhumusa, kono u shemuba ba ba ikokobeza.”—Jakobo 4:6.

Nihaiba batu be ne ba ezanga ze maswe ba kona ku ikokobeza ku Jehova ni ku mu kupa kuli a ba shemube, mi wa kona ku ba utwa. Sina ka mutala, Mulena Manase na kelusize bayahi ba Juda ni Jerusalema ku “eza ze maswe ku fita macaba a n’a yundisize [Muñ’a] Bupilo fapil’a bana ba Isilaele.” Kono Jehova ha na mu tuhelezi ku isiwa mwa butanga ku mulena wa Asirya, Manase “a ikokobeza hahulu fapil’a Mulimu wa bondat’ahe. A mu lapela; mi Mulimu a amuhela tapelo ya hae, a utwa kupo ya hae, mane a mu kutiseza mwa Jerusalema, mwa mubuso wa hae; mi cwale Manase a ziba kuli [Muñ’a] Bupilo ki Yena Mulimu.” Kacwalo Manase na itutile ku ba ni buikokobezo.—2 Makolonika 33:9, 12, 13.

Mipuzo ya Buikokobezo

Mutu ya ikokobeza ku Mulimu wa kona ku etelelwa ki yena. Mupolofita Daniele ha na li mwa butanga mwa Babilona na shemubilwe hahulu muta lingeloi ne li bonahezi ku yena mwa pono ya Mulimu kakuli na ikokobelize ku Mulimu ka ku bata kuli a mu etelele ni ku mu fa kutwisiso.—Daniele 10:12.

Kono muikuhumusi ya bata ku tuma u ka swaba sina Mulena Oziasi wa Juda ya na ikuhumusize ni ku ikungela buprista ka ku loba mulao: “Ha s’a tiile ku ba ni mata, pilu ya hae ya ikuhumusa, mane a eza sibi, a foseza [Muñ’a] Bupilo Mulimu wa hae; kakuli a kena mwa Tempele ya [Muñ’a] Bupilo kuli a y’o ciseza mwateñi insense fa aletare ya insense.” Ha na halifezi baprista ba ne ba mu eleza, ona fo a natiwa ka sibali sa mbingwa.—2 Makolonika 26:16-21.

Buikokobezo bu kona ku tusa hahulu mutu ku tiyela matata. Ha ku ba ni matata, buikokobezo bu tusa mutu ku itiisa ni ku zwelapili ku sebeleza Mulimu. Mulena Davida na ipumani mwa matata a mañata. Mulena Saule na mu zumile sina sibulai. Kono ni kamuta na si ka tongokela Mulimu kamba ku pahamela mutoziwa wa Jehova. (1 Samuele 26:9, 11, 23) Muta mupolofita Natani na elelize Davida bakeñisa ku foseza Jehova ka ku buka ni Bati-Sheba, na ikokobelize ku Mulimu.—2 Samuele 12:9-23.

Buikokobezo ki Kalemeno ka Mulimu

Jehova Mulimu yena u ikokobeza ka ku bonisa sishemo ni mufelañeke kwa baezalibi ba ba ikokobeza. Ku shemuba nihaiba baezalibi ni ku fana Mwan’a hae kuli a liulule batu kwa sibi ku bonisa kuli Mulimu wa ikokobeza. Bakeñisa sishemo sa hae, Mulimu n’a shwezi makeke baikulya Adama ka ku ba fa kolo ya kuli ba fumane bupilo bo bu sa feli.—Maroma 8:20, 21.

Mulena Davida na lemuhile ni ku itebuha kalemeno ka Mulimu kao. Jehova ha sa mu silelelize kwa lila za hae kaufela, Davida na opezi kuli: “Ku pilisa kwa hao, ki yona tebe y’o ni file, mi musa wa hao, ki ona o ni ezize yo mutuna.” (2 Samuele 22:36) Jehova niha na ni kanya ye tuna ya ku yaha mwa mabaka a hae a pahami a kwahalimu-limu, u sa bulelwa kuli: “Ki mañi ya swana sina [Muñ’a] Bupilo Mulimu wa luna, ya yahile mwa mabaka a kwahalimu-limu, ya inamela ku ukumela ze mwa lihalimu ni lifasi? Ya maibile, u  mu zwisa mwa liluli, u zwisa mubotana mwa sileze; kuli a mu inise ni manduna mane ni makwambuyu a sicaba sa hae.”—Samu 113:5-8.

Buikokobezo bwa Jesu Kreste

Jesu Kreste ha na li fa lifasi-mubu n’a tomile mutala o mutuna ka ku fitisisa wa mutanga wa Mulimu ya ikokobeza. Manzibwana pili a si ka shwa kale, Jesu a itama taulo, mi a tapisa ni ku taula mahutu a baapositola ba hae ba 12, ili musebezi o ne u eziwanga hahulu ki batanga. (Joani 13:2-5, 12-17) Na bulelezi balutiwa ba hae kuli: “Mutu ni mutu ya ipahamisa u ka kokobezwa; mi ya ikokobeza u ka pahamiswa.” (Mateu 23:12) Muapositola Pitrosi ya na fumanehile fa busihu bo, n’a hupuzi mutala o munde wa Jesu, mi kona libaka kwa nalule-lule ha na elelize balumeli ka yena kuli: “Mu ipeye ba bañwi kwatas’a ba bañwi kaufel’a mina . . . Kabakaleo mu ikokobeze mwatas’a lizoho la Mulimu le li na ni mata, kuli a mi hulise mwa nako ye swanela.”—1 Pitrosi 5:5, 6.

Muapositola Paulusi u susueza Bakreste ku ba ni maikuto a na li teñi ni ku Jesu Kreste. U bulela za situlo se si pahami sa n’a na ni sona Mwan’a Mulimu ha n’a sebelisana ni Ndat’ahe Jehova mwa lihalimu pili a si ka taha fa lifasi-mubu, ni za ku itoboha kwa hae ka ku nga sibupeho sa mutanga ni ku ikeza ya swana sina batu. Paulusi u ekeza kuli: “Mi h’a fumanwi a li sina mutu, a ikokobeza, a ipeya ku utwa ku isa kwa lifu, mane lifu la [kota ya linyando, NW].” Manzwi a Jesu ka za mipuzo ya buikokobezo a bonisizwe hande ku ze ne ezahezi ku yena, sina mwa taluseza muapositola kuli: “Kabakaleo Mulimu u mu pahamisize hahulu ni ku fita, mi u mu file Libizo le li fahalimw’a mabizo kamukana.”—Mafilipi 2:5-11.

Sa butokwa hahulu ni ku fita kikuli Kreste niha na ni situlo se si pahami cwalo, ha ka itusisa “bulena kaufela mwa lihalimu ni mwa lifasi” kwa ku peta tato ya Mulimu ka za lifasi, u ka zwelapili ku ba ni buikokobezo kwa mafelelezo a Puso ya hae ya Lilimo ze Sikiti. (Mateu 28:18; 6:10) Ku swanezi Mañolo a’ lu bulelela kuli: “Linto kamukana ha li se li beilwe mwatas’a hae, fohe ni yena Mwana u ka beiwa mwa mata a Hae, Yena ya beile linto kaufela mwatas’a hae, ilikuli Mulimu a be linto kamukana kwa batu kamukana.”—1 Makorinte 15:28.

Bakreste Ba Swanela ku Hulisa Buikokobezo

Ha na eleza Bakreste ka yena kuli ba apale mutu yo munca “ya nz’a shemunwa ka siswaniso sa ya mu bupile,” muapositola Paulusi u bulela kuli: ‘Cwale ha mu li ba ba ketilwe ki Mulimu, ba ba kenile, ba ba latwa, mu apale maikuto a na ni makeke, ni musa, ni buikokobezoI, ni bunolo, ni pilu-telele.’ (Makolose 3:10, 12) Hape u eleza kuli: “Mu be ni pilu i liñwi ba bañwi ku ba bañwi; mu si ke mwa bilaelela ze tuna, kono mu ise pilu ku ze nyinyani. Mu si ke mwa ipona butali.”—Maroma 12:16.

Buikokobezo bu tahisa kozo. Mutu ya ikokobeza ha lwanisi mizwale ba hae ba Sikreste kuli a pete “za bata.” Muapositola Paulusi na talusize kuli niha n’a kona ku eza lika kaufela, na ka eza fela lika ze yahisa, mi haiba muzwale yo muñwi na ka sitataliswa ki likezo za hae, na ka tuhela ku li eza.—Maroma 14:19-21.

Hape ku tokwa buikokobezo kuli ku be ni kozo ka ku mamele kelezo ya Jesu ya ku no swalela ba bañwi ha ba lu foseza. (Mateu 6:12-15) Mi mutu yo muñwi ha sitatalisa yo muñwi, u tokwa ku ba ni buikokobezo kuli a mamele taelo ya ku ya ku yo muñwi ni ku yo itumelela kuli u fosize, ni ku kupa swalelo. (Mateu 5:23, 24) Haiba ya foselizwe a nga muhato wa ku atumela ya mu foselize, ki lilato ni buikokobezo fela ze ka susueza sifosi ku itumelela mafosisa ni ku nga kapili muhato wa ku lukisa lika. (Mateu 18:15) Kozo ye tahiswa ki buikokobezo bo bu cwalo ku sifosi ni kwa kopano ki ya butokwa hahulu ku fita maswabi a’ kana a ikutwa, mi muhato wa hae wa ku kupa swalelo u ka mu tusa ku hulisa kalemeno kao ka buikokobezo.

Buikokobezo bu ka tusa Mukreste ku kolwa ka za na ni zona, ni ku ba ni tabo ni ku itikanelela mwa lika. Ba ba ikokobeza ba kona ku ba ni tabo niha ba foselizwe kamba ku nyandiswa ki batu ba ba inuneka ni ba ba ikuhumusa. Ba kona ku omba-ombiwa ki manzwi a li: “A mu bate [Muñ’a] Bupilo, mina kaufela ba ba ishuwa mwa lifasi, ba ba zamaya ka milao ya hae; a mu bate ze lukile, mu bate buikokobezo; mwendi mu ka suhana mu silelezwa mwa lizazi la buhali bwa [Muñ’a] Bupilo.”—Zefania 2:3.