Kana Mwa Tabela ku Ba ni Balikani Sakata?

BATU ba bañata ba tabela ku ba ni balikani ba bande. Ku taluseza balikani ba mina ba batuna ze mu ipumani ku zona mwa bupilo ki nto ye tabisa mwa bupilo bwa mutu. Kono mu kona ku fumana cwañi balikani sakata? Lilimo ze bato kwana 2,000 kwamulaho, Jesu na bonisize kuli nto ya butokwa ye ba swanela ku ba ni yona batu haiba ba bata ku pilisana hande ki lilato le li si na moya wa buitati. Na lutile batu kuli: “Mo mu latela kuli batu ba mi eze, mu ba eze cwalo ni mina.” (Luka 6:31) Manzwi ao a bonisa kuli haiba mu bata ku ba ni balikani, mu swanela ku ba batu ba ba fana, ba ba otolohile lizoho. Ka bukuswani, haiba mu bata ku fumana mulikani, ni mina mu swanela ku ba ni moya wa silikani. Ka mukwa ufi?

Ku ba ni silikani se sinde, ili se si tiile ku nga nako. Kakuli esi mulikani hasi ndambo fela. Mulikani ki mutu ya mwa munahano wa mina. Kuli mu kone ku itama silikani se si tiile ni ku si bukeleza mu tokwa ku ikataza. Hañata mu tokwa ku iyakatwa pili za tokwa mulikan’a mina hasamulaho kihona mu ka talima za mina. Balikani ba tabanga hamoho haiba yo muñwi ku bona u tabezi mi ba utwelananga butuku haiba yo muñwi ku bona u mwa butata.

Mu kona ku bonisa silikani sakata sihulu haiba mu tusa mutu ya mwa butokwi ka ku mu omba-omba ni ku mu fa za tokwa kwa mubili. Liproverbia 17:17 i li: “Mulikan’a mutu wa mu lata ka nako ni nako, u pepezwi kuli a be mwanahabo mwa liziyezi za hae.” Mane balikani ba kona ku utwana hahulu ku fita banabamba. Liproverbia 18:24 i li: “Mutu ya ipatela balikani ba bañata u ipatela ku sinyehelwa; kono mulikani a ka ba teñi ya ka tusa ku fita mwanahabo mutu.” Kana mwa tabela ku ziba ze ñata ka za mo mu kona ku bela ni silikani se si cwalo? Kana mwa tabela ku swalisana ni sikwata sa batu ba ba zibahala ka moya wa ku bonisana lilato? (Joani 13:35) Haiba ku cwalo, Lipaki za Jehova ba ba mwa silalanda sa mina ba ka tabela ku mi bonisa mo mu kona ku fumanela balikani sakata.